Jérémie 14 - Ma Zhiklè

Iyam man nshkè ɓai

¹ Ndo nzi pèc pècèk a ngaɗa na Jé-rémie a géɗ iyam man nshkè ɓai.

² Juda a lèyè, ta tiɗè a mi iyam tʼhwaɗ kokwar, ta wusha tʼhai, ndohi Jérusalem ta tsi lalau a géɗèʼa.

³ Ndohi mbibihiaʼa ta zlündo ɓèlèlihi ta a iyam. Aman ta ngatsa iyam ɓai, ta shkè a deɓa a motozl duzlak. Ta gu horai, gèɗ ta ndzakaɓa, ta ngheda di ta.

⁴ Ta gi mizlinè te gi dau azɓai, a géɗ iyam man nshkè ɓai. Ndo mpizhè a hér gèɗ, a feda gèɗ a hi zumbutoʼa.

⁵ Ko mènèɗ te dak, man nya kra ma, tsam-tsam a jèkeda kra na a pa, a géɗ man skwi nʼndi na azɓai.

⁶ Kɗèh dak a zlècè a ntskal, sam nkurndazlndazlaʼa, a ta nzi a nèʼèn tʼuda fala-falaʼa, di ta helwuslaʼa tʼhwaɗaʼa.

⁷ Mali a ngwoda nga va a gèɗ! Ndo nzi pèc pècèk, takaha nga, a géɗ nzlembaɗ ngaya! Nga jèke ka, a nga gu mali a sam ngaya kumba.

⁸ Ka man ndohi Israel ta zhèr ka. Ka man ka mbel ta a pats matakwan. Ka ara ndo mbrok te kokwar, ara ndo nshèwèlè man a dè a gi sèi a vad èhèmè;

⁹ Ka ara ndo man zlau a dza na èhèmè, ara ngul ndo man a slaha a mbel ndo ɓai èhèmè? Aman ka te ndev nga, Ndo nzi pèc pècèk; ta baha nga a nzlembaɗ ngaya. Ka jèke nga ɓai!

Jérémie a kuɗi a sam Zhiklè

¹⁰ Aranta Ndo nzi pèc pècèk a ngaɗa ta ndohi haha: Ambaha ta aman ta hi auna, ta hi auna, ta hérè a géɗèʼa azɓai. Aman Ndo nzi pèc pècèk a wuffè a géɗ tengaʼa azɓai. A hér mali ta, a ga ta kita a gèɗ mai i ta.

¹¹ Te deɓaʼa Ndo nzi pèc pècèk a ngaɗayè: Ka tsu ri a géɗ ndohi haha man a nga ta dara ɓai!

¹² Ko man ta jèkeda skwi nʼndai, a ta tsi rai, i cinè azɓai. Ko ta ndaray a ta vay skwai, i cè azɓai. I wuffè a géɗ tengaʼa azɓai, sèi i da zede ta a tsakwal, a mai, a gidiɓèr.

¹³ A i gaɗa: Aʼ – aʼ – aʼ – Ndo nzi pèc pècèk, bi ga! Na haha ndohi nhadka ma ta gaɗa ta: Kin gu zlau tsakwal ɓai, mi a da gi azɓai, i va kinè gumi ga a sam haha.

¹⁴ Aman Ndo nzi pèc pècèk a ngaɗayè: Ndohi nhadka ma ta cèkèl ma a nzlembaɗ ga. Iyè nzlinde ta ka ɓai, i va ta ma ga ɓai, i gaɗa ta ɓai. Ta hodko ma ncèkèlma, ta njè kinè ma ncèkèlma, skwi ambalai man ta ngul te gèɗ ta.

¹⁵ Gar haha Ndo nzi pèc pècèk a goɗ ar haha a géɗ ndohi nhadka ma, man ta hodko ma a nzlembaɗ ga, man i zlinde ta ɓai, a ta gaɗa: tsakwal a mai a gi a kokwar haha azɓai. Ndohi nhadka ma haha sèi da bazl ta a tsakwal, da teɗ ta a mai!

¹⁶ A ndohi man ta hada ta ma, ta tiɗ ta a mai a civèɗ Jérusalem, a ta kèlèhi a géɗ tsakwal, ndo nda re ta azɓai, tengaʼa a ngwozi ta, a wudahi a dalahi ta. Aranta i da ngwoda ta shèwa tengaʼa a gèɗ.

¹⁷ Ka da gaɗa ta ma haha: I kuɗi sreffsreffaʼa, a pats a vad, i shèk va azɓai. Aman bidalai, dem ndohi ga, nkala tʼhi ma, mblè mbiaʼa a va.

¹⁸ Aman i dè auda a dala, nckondohi ndohi mbazlaʼa kumba; aman i dè a kokwar, ta tiɗè a mai. Ko ndo nhadka ma, ko ndo mvi skwi a Zhiklè, ta shèwèlè te kokwar, ta sun sam man ta dè a pa ɓai.

¹⁹ Kos ka kwola Juda dè? Sion nʼngezla ka a gèɗ dè? Ka bazl nga aranta, ndo ntakaha nga azɓai, èhèmè? Nga zhor gumai – a shkè azɓai; nga zhor skwi mʼmbél nga – zlau a mshkè.

²⁰ Ndo nzi pèc pècèk, nga sun shèwa nga, nga sun mphömè babhi nga, nga gu malai a sam ngaya.

²¹ Ka kwol nga ɓai, a géɗ nzlembaɗ ngaya! Ka pa na hori a di a sam nʼnzi bi ngaya ɓai! Huro! Ka pra ma nderzlè-ma nga a ka ɓai!

²² Te va zhiklè-hi mbèh skwai ndohi herkeda, man ta gi iyam, a zhi dè? Giɗfek a gi iyam a ri na dè? Ka, Ndo nzi pèc pècèk, Zhiklè nga, ka ɓi dè? Nga zhèrè te ri ngaya; aman ka, ka ngu skwi haha tèlèba.