Jérémie 13 - Ma Zhiklè

Di maslaka

¹ Gar haha Ndo nzi pèc pècèk a ngaɗayè: Do a ka sum skwi deɓa, di maslaka, a ka dzawa va a vna, ka ruɓa a iyam ɓai.

² A i sum skwi deɓa ara man Ndo nzi pèc pècèk a gaɗayè, a i dzawa va a vna.

³ Ndo nzi pèc pècèk a ngaɗayè ma-cecèwaʼa:

⁴ Co skwi deɓa man ka suma, man ka dzawa va a vna. Slambaɗa, do a ma woyam Euphrate, a ka da ngheda a slrats za.

⁵ A i do, a i ngheda a ma woyam Euphrate, ara man Ndo nzi pèc pècèk a gadayè.

⁶ Te deɓ nʼnzi a zhè, Ndo nzi pèc pècèk a ngaɗayè: Slambaɗa, do a ma woyam Euphrate, a ka cko skwi deɓ ngaya auda te pa, man i gaɗa ka ngheda pa!

⁷ A i do a ma woyam Euphrate, a i woykodi skwi deɓa a sam man i ngheda a pa. Aman i rka, skwi deɓa nhusl na ma, amba mʼmènè a deɓa ɓai.

⁸ Te deɓaʼa Ndo nzi pèc pècèk a ngaɗayè:

⁹ Ndo nzi pèc pècèk a goɗ ar haha: Lèmèlèmè aranta i da gedassa nʼnjèl Juda, a nfi va Jérusalem mbiaʼa.

¹⁰ Ndohi ambaɓihiaʼa haha, man ta woy a ta tsena ma ga ɓai, ndohi man ta jèjèr ndav tengaʼa man nsassay a, a ta jèjèr zhiklèhi ngiɗè tsaɗ, a ta tsi ri a tengaʼa, a ta gurɓahi a sam tengaʼa, ta da ndi arsa lèmèlèmè ara skwi deɓ haha man amba a ta gi skwa a vna asaɓai.

¹¹ Lèmèlèmè ara man skwi deɓa haha mʼmana te deɓ ndo, ar ndohi Israel tèlèba ta zleɓa a va ga, a ndohi Juda ba, Ndo nzi pèc pècèk a gaɗa, a ta gi a ndohi ga, a nʼnjèl ga, a nslébèrdè ga, a skwi va ga. Aman ta tsena ɓai.

Duzlakhi zom

¹² Gar haha ka gaɗa ta ma haha: Ndo nzi pèc pècèk, Zhiklè Israel, a goɗ ar haha: Duzlakhi tèlèba ta ndha a zom. A ta gaɗa: Zom a nʼndha te duzlak tèlèba, nga sun ɓi dè?

¹³ Te deɓaʼa ka gaɗa ta: Ndo nzi pèc pècèk a goɗ ar haha: I da gi aman zom a keɗ ta ndohi kokwar haha tèlèba, a bihi a géɗ sam nʼnzi bi David, a ndohi mvi skwi a Zhiklè, a ndohi nhadka ma, a ndohi kokwar Jérusalem tèlèba.

¹⁴ Te deɓaʼa i tseda ta gèɗ, babhi a nda wudahi ta, Ndo nzi pèc pècèk a gaɗa. Ta da siyè te va azɓai, i jèke ta azɓai, i gedas ta, a laydyè asaɓai.

Zhiklè a baha na Juda

¹⁵ Va-tsenaʼa, va-fu zlembaɗ, kin gra gèɗ ɓai, te man Ndo nzi pèc pècèk a ngoɗa.

¹⁶ Va-nzala Ndo nzi pèc pècèk, Zhiklè kinè, ga ruva a gai, ga kin wushahi a sam nkezawa te za ma. Kin zhèr skwi nhél sam, – ruva a nda shkè; Zhiklè a ngwoda skwi nhél sam, – ruva a nda shkè; Zhiklè a ngwoda skwi nhél sam a sam tèdèdikaʼa.

¹⁷ Aman kin fi zlembaɗ azɓai, ndav ga a kuɗi tʼhwaɗaʼa. A géɗ nfi va kinè, kuɗa a pay a dai. I kuɗai, a géɗ man ta hel ta ndohi Ndo nzi pèc pècèk a ɓèlè.

¹⁸ Gada ta nda hai a mam na: Va-nze kinè, aman skwi mpèɗè gèɗ bi mbelaʼa nkalkaɗ na auda te gèɗ kinè ma.

¹⁹ Kokwarhi te dukwaɗ ta pizlèa ma, ndo mwinèa azɓai. Ndohi Juda tèlèba ta hel ta a ɓèlè, a ɓèlè tèlèba.

²⁰ Pu dai a ka rka ndohi man ta shkè te man a géɗèʼa! Rèwè skwi man ka ngotso, rèwè skwi ngaya mbelaʼa, na tema?

²¹ Ka da gèɗè kè, aman ndohi man ka gu mphömè a nda ta, ta gi bi a géɗ ngaya? Ka da ɗish va ara ngwoz man a yi kra azɓi dè?

²² Aman ka jhèdèʼa: Skwi haha a gay èhèmè? A géɗ mali ngaya tèlèba, i ca ka maslaka auda a va, a ka ngècè hori a dai.

²³ Ndo mʼmadzaʼa a slaha a nslekaɗa va na dè? Kokoya a slaha a nponko ncècèsl na auda te va gwots na dè? A kinè, man kin senda skwi man ambaɓai a hai, kin slaha kin gi skwi man amba dè?

²⁴ Gar haha i woya a i ksar ta ara kuza man kozlar hèshèkèɗ a hilèʼa.

²⁵ Nasa skwi man i tsaka ka, a i va ka, Ndo nzi pèc pècèk a gaɗa, a géɗ man i pca ka a gèɗ, a ka co ncèkèlma a ndav.

²⁶ I cè ka maslaka auda a gèɗ a ri ga, a ta rka iyam di hori ngaya.

²⁷ Mphömè ngaya, ntétékè baki ngaya, mphömè ngaya holholaʼa man hori te pa. A géɗ za, te dak, i rka skwi ngaya man a ndèrè a ndo. Woba ka, Jérusalem! Ka pan ɓai, ka lizhè genè pèc pècèk, ta ngèmè?