Jérémie 12 - Ma Zhiklè

Jérémie a hér gèɗ

¹ Ndo nzi pèc pècèk, ka zura gokwèn. I slaha a i ga ka ma a va azɓai. A nasa ba, i woy a nga verslè a ka genè: Ndohi nderɗe Zhiklè ta nzi a gumi èhèmè? Ndohi nʼngwèdè ndo, skwa a ga ta azɓi èhèmè?

² Ka nge ta a pa, ta tsu zluzlor ma ba, ta grè amba, ta yi wuda. Ka ndul ndul te ma ta, aman te ndav ta dra.

³ Ka Ndo nzi pèc pècèk, ka senyè, ka rkayè, ka jkeda ndav ga a sam ngaya. Preka ta auda ara tambakihai man ta zli daʼai ta. Pe ta a ri ndo mbazl ta!

⁴ Kokwar da loyo, skwi mɓayaʼa te dak da gwor na, ta ngèmè? Skwi dak a ɗiakihai ta azɓai a géɗ shèwa ndohi na, man ta gaɗa: Zhiklè a rka civèɗ nga azɓai.

⁵ Aman ka ngeza a verzi ndohi man ta dè a sak, ka slaha kin lèmdè nhi a plèsh ɗè? Te kokwar man gumi te pa, ka nzi zuraʼa. Ka woy a ka gi te woyam Jourdain man a grè a grè, kè?

⁶ Ko kramamhi ngaya, ko ndohi gi bab ngaya, ta cèkèl ma a géɗ ngaya. Ta ɗèfè ka ri a dengai. Ka co a ndav ɓai, ko ta gaɗa ka ma nhènèkèʼa!

⁷ I jèkeda ndohi gi Israel, i kwola skwi nʼndi gi ga, i pa ta nshib ga a ri a mayamhi na.

⁸ Skwi nʼndi gi ga a nʼnga a sam ga ara marizhèlè te dak, a nhumdokoy va a gèɗ, aranta i ga a ndo mayam na.

⁹ Skwi nʼndi gi ga ara mangayak vezai, mangayakihi ngiɗè ta hi a verziaʼa. Vo-do, skwi dakhi tèlèba, vo-hoy ko va, a ta shkè a ta ndiaʼa.

¹⁰ Ndohi mɓer skwi kumba ta gedassa gi lak ga, ta gatseda gi dau ga a hi a sak. Ta ngwoda sam nwèr skwi ga mbelaʼa a mèdèp, a nde na tazli hèshèkèɗ.

¹¹ Ta ngwoda a hèshèkèɗ, ngedassaʼa a sam di ga, a lèyè. Kokwar tèlèba ngedassa, a layde ta ndohi azɓai.

¹² A géɗ za tʼhèshèkèɗ tèlèba, ndohi metsarhi ta zhè. Ndo nzi pèc pècèk a gidè tsakwal te rai, a bèzlè ndohi te verzi herkeda ngiɗè, a kèlè man a verzi herkeda ngiɗè. Ndohi tèlèba ta nzi a gumi azɓai.

¹³ Ta zleku dau, ta tsi nkuɗdzarai. Ta ngeza a mizlinè, skwi man ta ɓica a pa, a pa ta hori a dai, a géɗ Ndo nzi pèc pècèk man a gi ndav worworaʼa.

¹⁴ Gar haha Ndo nzi pèc pècèk a gaɗa: A géɗ nslamagihi ga man ambaɓi tèlèba, man ta tara na ri a di a skwi nʼndi gi Israel, ndohi ga: na haha i bazl ta auda te kokwar ta; ndohi gi Juda, i dumdaussa te ndev tengaʼa.

¹⁵ Aman i dumdaussa ma, ta da siyè te va zaʼa, i da helka ta a deɓa, staɗ staɗ tèlèba a sam skwi nʼndi gi na, staɗ staɗ tèlèba a kokwar na.

¹⁶ Aman te deɓaʼa ta slebi civèɗ ndohi ga, a ta mbèɗè a nzlembaɗ ga, a ta gaɗa: Ndo nzi pèc pècèk a zhè! Ara man ta senda ta ndohi ga a ta mbaɗa a nzlembaɗ Baal, i til ta a pa zaʼa, te ndev ndohi ga.

¹⁷ Aman ta da fi gèɗèʼa azɓai, i da gedas ta ndohi haha, i da dzam ta auda, i da zede ta, Ndo nzi pèc pècèk a gaɗa.