Jérémie 11 - Ma Zhiklè

Nderzlè-ma mpraʼa

¹ Ndo nzi pèc pècèk a ngaɗa na ma nengaʼa a Jérémie aranta:

² Va-tsena ma nderzlè ma haha! Kin njè ta a ndohi Juda, a ndohi Jérusalem!

³ Ka da gaɗa ta: Ndo nzi pèc pècèk, Zhiklè Israel, a goɗ ar haha: Ndo man a fi gèɗ a ma nderzlè-ma haha azɓai, da phomda!

⁴ Ma nderzlè-ma man i va ta babhi kinè a pats man i helka ta auda te kokwar Egypte, te gezla, a i gaɗa ta: Va-tsena ma ga, va-gu skwi haha tèlèba man i njè kinè, a kin gi a ndohi ga, a iyè i gi a Zhiklè kinè,

⁵ a i ndikeda ara mʼmbèd ga man i mbaɗa ta babhi kinè, man i gaɗa: i da va kinè herkeɗa man wa a vongwom a hi te pa, ara man kin ngotso a patsna. A i mbeɗa na a ma, a i gaɗa: Da gu arsa, Ndo nzi pèc pècèk!

⁶ Ndo nzi pèc pècèk a ngaɗayè: Njè ta ma haha tèlèba te kokwar Juda, a civèɗ Jérusalem, a ka gaɗa: Va-tsena ma nderzlè-ma haha, va-dzodzora!

⁷ Aman i mbaɗa ta babhi kinè a ma gèjau te pa, a pats man i helka ta auda te kokwar Egypte, ha patsna, a i mbaɗa ta lèk lèk, a i gaɗa ta: Va-tsena ma ga!

⁸ Aman ta tsena ɓai, ta fa na zlembaɗ a ma ga ɓai, staɗ staɗ tèlèba ta dzodzor ndav tengaʼa man ambaɓai; a skwi tèlèba man i goɗ te nderzlè-ma ga man i gaɗa ta, aman ta jè-jèrèʼa, a ta dzadzara ɓai, i ngwoda ta a gèɗ.

⁹ Te deɓaʼa Ndo nzi pèc pècèk a ngaɗayè: Ndohi Juda a ndohi Jérusalem ta vhe ma:

¹⁰ Ta men ta a deɓa a sam mali babhi ta man ta gu mèdègèɗ a sam ma ga, a to do a verzi zhiklèhi mbèh skwai, a ta gu mizlinè tengaʼa. Ndohi Israel a ndohi Juda ta tawaɗaha nderzlè-ma man i derzla a nda babhi ta.

¹¹ Gar haha Ndo nzi pèc pècèk a gaɗa: Na haha i ngwoda ta matakwan a gèɗ, man ta slaha ta mbelè auda te pa azɓai. Ta da kuɗi a sam ga, aman i da cinè ma tengaʼa azɓai.

¹² Te deɓaʼa kokwar Juda a ndohi Jérusalem ta dè a ta kuɗi a sam zhiklèhi mbèh skwai man ta zla ta skwi pèc pècèk. Aman ta slaha ta takaha ta a pats matakwan ɓai.

¹³ Aman zhiklèhi mbèh skwi ngaya kumba, Juda, ta kokwarhi ngaya. Sam mʼmbèh skwi ngaya man hori te pa, ta zhè a civèɗ Jérusalem tèlèba, sam mvi skwi a Baal.

¹⁴ Aman ka, ka tsu ri a gèɗ ndohi haha ɓai, ka gu mbuh mbuh ɓai, ka dzhoɗo a géɗ tengaʼa ɓai; aman i cinè ma tengaʼa azɓai, aman ta kuɗi a sam ga a pats matakwan.

¹⁵ Medemi ga a gi te gi ga mè? A hér skwi man ambaɓai. Mbeza a zluèd man ta va na Zhiklè ta takaha ka te matakwan dè? Ka mbel ngaya a vna dè?

¹⁶ Ndo nzi pèc pècèk a baha ka: ‘Wof tsna man a dai, man nyi nengaʼa amba’! Vogwa a ndiaʼa, nasa nhèzlèwè mbiaʼa, a jèkeda ri wofhi a pa sungwaʼa.

¹⁷ Zhiklè bi mbiaʼa man a nge ka a pa, a ga ka matakwan a géɗ shèwa ngaya, a géɗ mali man ndohi Israel a ndohi Juda ta pokoy gèɗ ndav auda a vna, aman ta ndara na skwi a Baal.

Ta vhè ma a géɗa Jérémie

¹⁸ Ndo nzi pèc pècèk a sendayè, a i suna. I rka maya ta nte hwaɗaʼa.

¹⁹ Iyè ara tambak man ta da zli daiaʼa. Ta vhè ma a géɗ a iyè, i sun ɓai: Ngo-gedossokoy wof man a yi dai, ngo-zudokoy auda tʼherkeda man ndohi ta nza te pa a nshèffè, a ta slefi nzlembaɗ nengaʼa asaɓai!

²⁰ Zhiklè bi mbiaʼa a gi kita nzuraʼa, a jkeda maya ndo tʼhwaɗaʼa. Adi, di ga a rkaʼa, aman ta da pilèʼa. Aman i jèka ka ma ga a ri a ka.

²¹ Gar haha Ndo nzi pèc pècèk a goɗ aranta, a géɗ ndohi Anathoth man ta woy a ta zeday nshèffè ga, a ta gaɗa: ka hodko ma a nzlembaɗ Ndo nzi pèc pècèk ɓai, man ɓai nga keɗ ka!

²² Gar haha Zhiklè a goɗ ar haha: Na haha sèi ta pilèʼa: golahi ta da bèzl ta a tsakwal, wudahi a dalahi tengaʼa ta da tiɗè a mai.

²³ I jèkaha ta ko staɗ azɓai; aman i da ga ta matakwan a ndohi Anathoth, a pats kita ga.