Jérémie 10 - Ma Zhiklè

Zhiklè man a zhè a nshèffè

¹ I Kinè ndohi Israel, va-tsena ma man Ndo nzi pèc pècèk a goɗ a géɗ kinè!

² Ndo nzi pèc pècèk a goɗ ar haha: Kin dzodzor maya ndohi nte deɓa ɓai! Kin gu zlau skwi man kin rka a giɗfèk ɓai! Ndohi nte deɓa ta gi zlauaʼa.

³ Mʼmbèh skwi ndohai, skwi ambalai. Skwi man ta pata a wof te dak, skwi man ri ndo a mpataʼa a dzana,

⁴ a ta dzazla a verzhègenè a guro, ta dizla a sulom a gaɗa züdo, aman ta gidè va azɓai.

⁵ Ta ara kslah kokwai te gi dau, ta slaha ta gèɗè azɓai, sèi ta zuɓ ta nzhɗɓè, ta slaha ta dè a sak ɓai. Kin gu zlau tenga ɓai, ta ga kinè skwi ambaɓiaʼa azɓai; aman ko skwi man amba ta slaha ɓai.

⁶ Ndo nzi pèc pècèk, ngiɗè ngar ka azɓai. Ka mbiaʼa, nzlembaɗ ngaya mbiaʼa, a géɗ wuɗi ngaya.

⁷ Ngi zlau ngay azɓi wa? Ka bi ndohi herkeda. A woy ta gi zlau ngaya, te man te va ndohi maya herkeda tèlèba, te kokwar-bihi tengaʼa tèlèba, ngiɗè ngar ka azɓai.

⁸ Ta tèlèba, maya ta azɓai, ta rzla, wof ambalai,

⁹ zi pats man ta ckoɗi te Tarsis, guro te Uphaz. Ndo a mpoto, ndo mviɗè guro a ngau, maslaka tengaʼa vèvèzh mʼmadza a vèvèzh nduzoʼa. Ta tèlèba, ri ndo nsun mizlinè sa a ngau.

¹⁰ Aman Ndo nzi pèc pècèk, nengaʼa Zhiklè nzuraʼa, Zhiklè man a zhè a nshèffè, bi a mèdèp. Te ri ndzoan nengaʼa herkeda a gudzai, ndohi herkeda ta slaha ta dishè ndzoan nengaʼa ɓai.

¹¹ Gar haha kin da gaɗa ta: Zhiklèhi man ta ga giɗfèk a herkeda ɓai, sèi da zeda a géɗ herkeda ba, tʼhwaɗ giɗfèk ba.

¹² Zhiklè a ngau herkeda a wuɗi nengaʼa, a ngeda pa a maya na, a ngu giɗfèk a géɗ man a sun ngiaʼa.

¹³ A gèɗè, ara ntsi iyam, ara iyam a ndhè te giɗfèk, a gi aman vani a slèmbèdè te verzi gai. A gi aman iyam a ndi dai, a iyam a shkè, a nzlündko kozlar a sam man a pa.

¹⁴ Ndo staɗ staɗ tèlèba, nrzla, maya na azɓai, ndo mviɗè guro tèlèba, skwi mbèh skwi tengaʼa a pa ta hori a dai. Aman skwi man a vɗɗo, skwi ncèkèlma, nshèffè a te tengaʼa ɓai.

¹⁵ Skwi ambalai, skwi man ta ngwèshè a pa, a pats kita ta, ta zi ta.

¹⁶ Jacob a nʼngatsa aranta ɓai. Skwi man a nʼngotso, Zhiklè, man a ngau gedam tèlèba. Israel ndohi nʼndi gi na. Nzlembaɗ na Zhiklè bi mbiaʼa.

Zhiklè a da wushede ndohi auda te kokwar

¹⁷ Ka man ka nza te matakwan, ɓica kolongwi ngaya tʼherkeda.

¹⁸ Aman Ndo nzi pèc pècèk a gaɗa: Na haha, i wusheda ndohi auda te kokwar, a i da gats ta tèlèba.

¹⁹ Wobayè, a géɗ skwi man a gedas-syè! Mblè man a va ga a dzay kumba. I gaɗa: Nfay a gèɗ, i dishè mènè.

²⁰ Gi ga ngedassa, nciɓè gi ga mpasl na, wudahi ga azɓai, skwi kuɗom ga azɓai. Ntilay gi ga wa, mpelassa gi ga wa?

²¹ Ndohi mɓer skwai ta rzla, ta dérɗè Ndo nzi pèc pècèk; a géɗ nengaʼa manam ta azɓai, rèwè tengaʼa tèlèba a vendè gèɗ na.

²² Ntsenka mè? Nhèzlèwè mbiaʼa te civèɗ man a géɗèʼa, aman a ndeda kokwar Juda a hèshèkèɗ, a gi skwi dak.

²³ Ndo nzi pèc pècèk, i suna, ndo a slaha a gèɗè a ri na ɓai: i bizh ga auna. Ndo nshèwèlè a ncè sak a ri na ɓai.

²⁴ Ngatsay maya, Ndo nzi pèc pècèk! Aman zuraʼa, a ndav ka ɓai; man ɓai i gedassa a mèdèp.

²⁵ Ga ta ndzoan ngaya a gèɗ a ndohi nte deɓa, man ta sen ka ɓai, a gèɗ verzi ndohai, man ta tsi ri a nzlembaɗ ngaya azɓai. Aman ta ndeda Jacob a ma, ta ndeda ma, ta ndevaʼa, a ta gedassa gi na.