Jérémie 1 - Ma Zhiklè

Zhiklè a baha na Jérémie

¹ Ma Jérémie, kra Hilkija, staɗ te va ndohi mvi skwi a Zhiklè man ta zhè te Anathoth, te kokwar Benjamin.

² Ndo nzi pèc pècèk a ngaɗa na ma nengaʼa, te va man Josias, kra Amon, bi te Juda, te mvi 13 aʼa.

³ A ngaɗa na a vaʼa te va man Jojakim, kra Josias, bi te Juda, ha Sédécias, kra Josias, bi Juda, te mvi llaʼa, ha ta hel ta ndohi auda te Jérusalem, a ki mazlamaʼa.

⁴ Ndo nzi pèc pècèk a ngaɗayè ma haha:

⁵ Ga man i fe ka a hwaɗ mam ngaya, i sen ka. Ga ka yakaɗa, i fe ka hi a mizlinè Zhiklè, i cka ka auda a ka gi a ndo nhadka ma kokwar bihi tʼherkeda.

⁶ I gaɗa: Aʼai, aʼai, Bi Zhiklè Ndo nzi pèc pècèk, i sun ngèɗè ɓai, i wudahi dai!

⁷ Ndo nzi pèc pècèk a ngaɗayè: Ka goɗ a ka gaɗa i wudahi di ɓai! Sèi ka dè a sam ndohi tèlèba man i zlinde ka a sam ta, a ma tèlèba man i njè ka a gèɗ, ka gèɗèʼa.

⁸ Ka gu zlau tenga ɓai, i zhè a nda ka, aman i da mbélde ka. Ndo nzi pèc pècèk a gaɗa.

⁹ Te deɓaʼa Ndo nzi pèc pècèk a ncko ri na, a ntarda a ma ga. A ngaɗayè:

¹⁰ Na haha, i feda ma ga a ma ngaya. Na haha i va ka wuɗai a géɗ ndohi herkeda a kokwar bihai. Ka da hel ta auda, ka tsede ta hai, ka gedas ta, ka zede ta, ka mende ta a pa, ka zlatsede ta a pa zaʼa.

¹¹ Ndo nzi pèc pècèk a ngaɗay ma nengaʼa ar haha: Jérémie, ka rke mè? I gaɗa: I rka ri wof.

¹² Ndo nzi pèc pècèk a ngaɗayè: Ka rka gokwèn. I giaʼa, ara man i goɗa.

¹³ Ndo nzi pèc pècèk a ngaɗayè ma nengaʼa macecèwaʼa ar haha: Ka rke mè? I gaɗa: I rka shiɗèf man skwi a hu-bètè te pa, a shkè te civèɗ man a géɗèʼa.

¹⁴ Ndo nzi pèc pècèk a ngaɗayè: Matakwan a kalka ta a gèɗ a ndohi kokwar tèlèba te civèɗ man a géɗèʼa.

¹⁵ I baha ta kokwar-bihi tèlèba te man a géɗèʼa, Ndo nzi pèc pècèk a gaɗa. A tengaʼa ta da shkè a kokwar Juda tèlèba, staɗ staɗ tèlèba ta feda sam nʼnzi bi ta a ntamagi kokwar Jérusalem, ta nza ta a ma zlazlar man ta tèuda a pa tèlèba.

¹⁶ I da bèzlè kita a géɗ Jérusalem, a géɗ shèwa tengaʼa tèlèba, a géɗ man ta jèkyè, a ta mbèh skwai, a ta tsi rai a skwi man ta gu a ri ta.

¹⁷ Aman ka, mana ndav ngaya, slambaɗa, a ka da gaɗa ta ma tèlèba man i da njè ka a gèɗ. Ka gu zlau tengaʼa ɓai, man ɓai i pra ka zlau a va a sam tengaʼa.

¹⁸ Na haha iyè a ri ga i ge ka a gi ndakmaʼa a patsna, a sakgi züdo, a zlazlar züdo a géɗ kokwar tèlèba, a géɗ bihi Juda a wud bihi nengaʼa, a géɗ ndohi mvi skwi a Zhiklè, a ndohi kokwar tèlèba.

¹⁹ Ta da gi var a ka, aman ta da fen ka azɓai, a géɗ man i zhè a nda ka, Ndo nzi pèc pècèk a gaɗa, aman i da mbélde ka.