Jean 9 - Ma Zhiklè

¹ Aman Yèsu a dè a civèɗ, a rka ndo mandazlai, daga nyakaɗ na.

² A golahi nengaʼa ta dzhoɗo, a ta gaɗa: Rabbi, ngu mali haha wa, aman ta yu nengaʼa mandazlai: Nengaʼa dè, bab na dè, mam na dè?

³ A Yèsu a ngaɗa: Ko nengaʼa, ko mam na, ko bab na, ta ga mali ɓai. Nengaʼa mandazlai, a skwi man Zhiklè a giaʼa, a ngréɗè auda a sam na.

⁴ Sèi nga gi mizlinè nengaʼa man a zlindekayè, aman pats ani a zhè dai. Vaɗ a shkè, aman ko ndo staɗ a slaha a ngi mizlinè ɓai.

⁵ Aman i zhè tʼherkeda, i skwi nhél sam herkeda.

⁶ Aman a goɗ ma haha, a njfeda slèslèɓ a herkeda, a mbsomaʼa, a mfada na a di mandazlai ara madzaf,

⁷ a ngaɗa na: Do a sam nhèyè va iyam Siloé (ara ngèɗè: ta zlündo) a ka pana di ngaya! A nengaʼa a mdo, a mpana di na, a mshkè a deɓa, a rka di ma.

⁸ A nslamagihi nengaʼa, a ndohi man ta rkaʼa halaʼa ndo njhèɗè skwai, ta gaɗa: Na haha ndo man halaʼa a nza tʼhai, a jhèɗ skwi ka ɓi dè?

⁹ Ndohi ngiɗè ta gaɗa: Nengaʼa. Ndohi ngiɗè: Aʼai, ngal ta va. Aman nengaʼa a ri na a ngaɗa: I nengaʼa.

¹⁰ A ta gaɗa na: Di ngaya a mwin na nkèkè?

¹¹ A nengaʼa a ngaɗa: Ndo ngiɗè, nzlembaɗ na Yèsu, a mbsoma herkeda, a mfaɗay a di ga, a ngaɗa: Do a sam nhèyè va iyam Siloé, a ka pana di ngaya!

¹² A i do, a i pana di ga, a i rka di ma. A ta gaɗa na: Nengaʼa tema? A ngaɗa: I sun ɓai.

Ndohi pharisie ta njénjèr ma mandazlai

¹³ A ta da ndo man a matsa mandazlai, a sam ndohi pharisie.

¹⁴ A pats man Yèsu a mbsoma herkeda, man a winè di ndo mandazlai, pats nshèk va.

¹⁵ A ndohi pharisie ta dzhoɗo zaʼa: Di ngaya mwin na nkèkè? A nengaʼa a ngaɗa ta: A mbsoma herkeda, a mfaɗay a di ga, a i pana di ga, a i rka di ma.

¹⁶ A ndohi pharisie tsaɗ tsaɗ ta gaɗa: Ndo sa a shkè te Zhiklè ka ɓai, aman a hér pats nshèk va azɓai. Tengaʼá ngiɗè ta gaɗa: Ndo malai a slaha a ngi nrkedi arsa dè? A ta kezlaʼa.

¹⁷ A ta gaɗa na ndo mandazlai: Ka gad kè, a géɗ ndo mwinè di ngaya? A nengaʼa a ngaɗa: Nengaʼa ndo nhadka ma.

¹⁸ A ndohi Juif ta ca ɓai, a ta gaɗa: Nengaʼa man antanta a rka dai, halaʼa ndo mandazlai ka ɓai. A ta baha na mam na a bab na.

¹⁹ A ta dzhoɗo, a ta gaɗa: Na haha kra kinè, man kin gaɗa ndo mandazlai te nyakaɗ na dè? A gu kè aman a rka dai?

²⁰ A bab na a mam na ta mbeɗa ta a ma: Nga suna, nengaʼa kra nga, te nyakaɗ na mandazlai.

²¹ A géɗ man a rka di antanta a haha, a ndo man a wina na di haha, nga sun ɓai. Aman nengaʼa ngra ma, vo-dzhoɗo a sam na! Sèi nengaʼa da ngra kinè!

²² Bab a mam na ta goɗ arsa, a géɗ man ta gi zlau ndohi Juif. Aman ndohi Juif ta tsomma, ko wawa man a gaɗa: nengaʼa Kristi, ta dzomkoɗauda te gi njèngè ma Zhiklè tengaʼa.

²³ A géɗ nasa bab na a mam na ta gaɗa: Nengaʼa ngra ma, vo-dzhoɗo a sam na!

²⁴ A ta baha na ndo man a matsa mandazlai zaʼa, a ta gaɗa na: Goɗ skwi zuraʼa a sam di Zhiklè! Nga suna, ndo sa ndo malai.

²⁵ A nengaʼa a mʼmbeɗa ta a ma, a ngaɗa: Gar nengaʼa ndo malai, i sun ɓai. Skwi staɗ i sun a vava: Adatsuta i mandazlai, anai i rka di ma.

²⁶ A ta gaɗa na zaʼa: A ga ka mè? A mwina ka di ngaya kè?

²⁷ A nengaʼa a ngaɗa: I gaɗa kinè antanta ma, kin tsena ɓi ɗè? Kin woy a kin cinè zaʼa èhèmè? Kinè ba, kin woy a kin ndi a golahi nengaʼa ɗè?

²⁸ A ta ga na ndzoan a vata, a ta gaɗa na: Ka gol nengaʼa! Aman nga, nga golahi Moise.

²⁹ Nga suna, Zhiklè a ngaɗa na Moise. Aman sam man ndo haha a shke te pa, nga sun ɓai.

³⁰ A ndo mandazli a matsa a mʼmbeɗa ta a ma: Nengaʼa a mwinay di ga. Nʼnga kinè mè, aman kin sun sam man a shke te pa ɓai?

³¹ Aman nga suna, Zhiklè a tsena ndohi malihi azɓai, aman a tsena ndo man a pi ndav a Zhiklè, a gi skwi man nengaʼa a woyaʼa.

³² Daga zlèzlèa ba, nga tsena ma ndo man a winè di ndo man mandazlai daga nyakaɗ na ɓai.

³³ Aman nengaʼa a shkè te Zhiklè ka ɓai, a slaha a ngi ar haha ɓai.

³⁴ A ta gaɗa na: Ta yeka ka tʼhwaɗ malai, a ka senda nga ɗè? A ta dzardauda.

³⁵ A Yèsu a ntsenaʼa, ta dzardauda ma. Aman a ngotso, a ngaɗa na: Ka co krando a ndav ngaya dè?

³⁶ A nengaʼa a mʼmbeɗa na a ma: Bai, nengaʼa wa, man i cèʼa a ndav ga.

³⁷ A Yèsu a ngaɗa na: Ka rka nengaʼa. Nengaʼa man kin gèɗè a vna.

³⁸ A nengaʼa a ngaɗa: Bai, i co a ndav ga. A nkalahai a deɓ sak nengaʼa.

³⁹ A Yèsu a ngaɗa: I shkè a herkeda haha, aman i gi kita, a tengaʼa man ta rka di ɓai, ta rka dai; a ndohi man ta rka dai, ta ndi a ndohi mandazlai.

⁴⁰ Ma haha, ndohi pharisie tsaɗ tsaɗ man ta zhè a sam na, ta tsenaʼa, a ta gaɗa na: Nga ba, nga ndohi mandazli dè?

⁴¹ Yèsu a ngaɗa ta: Aman agassa kinè ndohi mandazlai, ar mali kinè azɓai. Aman anai kin gaɗa: Nga rka dai, mali kinè a nzi dai.