Jean 8 - Ma Zhiklè

¹ A Yèsu a mdo a za oliviers.

² A prèk te gai a mshkè a deɓa a gi Zhiklè, a ndohi tèlèba ta shkè a sam na. A Yèsu a nʼnzahai, a nsenda ta.

³ A ndohi malamhai, a ndohi pharisie, ta cko ngwoz ngiɗè a sam na, man ta gso a géɗ mphömè, a ta feda a ndev nhèyè ndo,

⁴ a ta gaɗa na Yèsu: Ngwoz haha, nga gskoɗai a géɗ mphömè antanta.

⁵ Moise a ngaɗa nga te ma kita Zhiklè, ndo man a gu aranta, nga keɗaʼa a kwa. Ka gad ar ka kè?

⁶ Ma haha ta gaɗa na, aman ta jkedaʼa. Ta woy maya aman ta pinèʼa. A Yèsu a nguɓda deɓa a hai, a mwindè tʼherkeda a rai.

⁷ Aman ndohi ta jhèɗè genè, ta jèka ɓai. A nengaʼa a nslambaɗda deɓa, a ngaɗa ta: Ndo man a zhè te ndev kinè, man mali na azɓai, da co kwa, da kolo nshèlèkuraʼa.

⁸ A Yèsu a nguɓda deɓa a hi zaʼa, a mwindè tʼherkeda.

⁹ A ndohi man ta tsena ma nengaʼa, to do ta, ngiɗè a jèjèr ngiɗè te deɓa, ngiɗè a jèjèr ngiɗè te deɓa, a hüno te ndohi nhalaʼa. A ta jèkeda Yèsu a ngwoz matsa a pa a géɗ ta.

¹⁰ A Yèsu a nslambaɗda deɓa, aman a rka ndo ngiɗè ɓai, a ngaɗa na ngwoz: Ngwoz, ta tema? Ko ndo staɗ a ga ka kita a gèɗ azɓi dè?

¹¹ A ngwoz a ngaɗa na: Bai, ko staɗ ba. A Yèsu a ngaɗa na: Anai ko iyè, i ga ka kita a gèɗ azɓai. Do ngaya! Aman te deɓ nta ka da gu mali asaɓai!

Yèsu, skwi nhel sam herkeda

¹² A Yèsu a ngaɗa ta zaʼa: Iyè, skwi nhél sam herkeda. Ko wawa man a dzadzar-kayè, a dè te ruva azɓai, aman a ngècè skwi nhèl sam nshèffè.

¹³ A ndohi pharisie ta gaɗa na: Ka ngreda va ngaya auda a ri ngaya. Malwuɗi ngaya haha nzura ka ɓai.

¹⁴ A Yèsu a mʼmbeɗa ta a ma: Aman i ngreda va ga auda a ri ga, malwuɗi ga nzuraʼa. Aman i sun sam man i shkè te pa, a i sun sam man i dè a pa. Kinè, kin sun sam man i shkè te pa a sam man i dè a pa ɓai.

¹⁵ Kin gi kita ara ndohi herkeda; iyè i gi kita a ndo azɓai.

¹⁶ Aman agassa i gi kita, kita ga nzuraʼa. Aman iyè a géɗ ga ka ɓai. Aman nga a Bab ga, man a zlindekayè.

¹⁷ Te ma kita kinè, ta windo, aman malwuɗi ndohi cèw, malwuɗi nzuraʼa.

¹⁸ Iye, i gi malwuɗi va ga a ri ga, a Bab ga man a zlindekayè a gi malwuɗi ba.

¹⁹ A ta gaɗa na: Bab ngaya tema? A Yèsu a ngaɗa ta: Kin senyè bai, kin sun Bab ga ɓai. Aman agassa kin senyè, ar kin sun Bab ga ba.

²⁰ Ma haha Yèsu a ngaɗa ta a sam koti sulai, man ta cèkèlè Suli a Zhiklè. A njè ta ma te gi Zhiklè, aman ta gsa ɓai, ko staɗ, te man tiɗè sam mana nengaʼa di ka ɓai.

A sam man i dè a pa, kin slaha kin de a pa ɓai

²¹ A Yèsu a ngaɗa ta zaʼa: A di i dè ga, a kin hassyè te deɓaʼa, a kin metsi kinè te mali kinè. A sam man i dè a pa, kin slaha kin dè a pa ɓai.

²² A ndohi Juif ta gaɗa: A woya a nkeda va na a ri na ɗè? Aman a gaɗa: A sam man i dè a pa, kin slaha kin dè a pa ɓai.

²³ A Yèsu a ngaɗa ta: Kinè, kin shkè te godok; aman iye, i shkè te géɗèʼa. Kin shkè tʼherkeda haha; iyè, i shkè tʼherkeda haha ka ɓai.

²⁴ Gar haha i gaɗa kinè, kin da metsi kinè te mali kinè. Aman kin cè a ndav kinè ɓai, i nengaʼa, kin da metsi kinè te mali kinè.

²⁵ A ta gaɗa na: Ka wa? A Yèsu a ngaɗa ta: I nengaʼa man i gaɗa kinè ma.

²⁶ Ma ga a zhè kumba, man i gèɗè a géɗ kinè, a kita a zhè man i bazla kinè a gèɗ. Aman nengaʼa man a zlindekayè, nengaʼa nzuraʼa, a skwi man i tsena te nengaʼa, i gaɗa ta ndohi herkeda.

²⁷ Aman nengaʼa a njè ta ma Bab na, ta sun bai.

²⁸ A Yèsu a ngaɗa ta: Aman kin da Zlatseda kra-ndo ma, kin da senyè; a kin da suna, i gi skwi a ri ga azɓai, sèi i gèɗèʼa ara man Bab ga a sendayè.

²⁹ A nengaʼa man a zlindekayè a zhè a sam ga. A jèkyè a pa a géɗ ga azɓai, te man i gi skwi man ambaha pèc pècèk.

³⁰ Aman a goɗ ma haha, ndohi kumba ta co a ndav.

Ma nzuraʼa a pre ta ndohi auda

³¹ A Yèsu a ngaɗa ta ndohi Juif, man ta co a ndav: Aman kin nzi te ma ga, kinè golahi ga a vava.

³² A di kin da shin ma nzuraʼa, a ma nzuraʼa a da pra kinè auda.

³³ A ta gaɗa na: Nga verzi Abraham, nga ɓèl ndo ka ɓai, ko halaʼa. Ka gad kè, a da pre kinè auda?

³⁴ A Yèsu a ngaɗa ta: A vava, a vava, i gaɗa kinè. Ndo man a gi malai, nengaʼa ɓèl malai.

³⁵ Ɓèlè a nzi te gi a mèdèp azɓai. Kra ngwai a nzi a mèdèp.

³⁶ Aman kra Zhiklè a pre kinè auda, kin praʼa a vava.

³⁷ I suna, kinè verzi Abraham. Aman kin woy maya a kin kedyè, a géɗ man ma ga ambaha kinè ɓai.

³⁸ I gèɗè ara man i rka skwi a sam Bab ga. Lèmèlèmè kinè gi skwi ara man kin tsena te ma bab kinè.

Madzagi, bab kinè

³⁹ Ta mbeɗa na a ma: Abraham bab nga. A Yèsu a mʼmbeɗa ta a ma: Aman kinè wudahi Abraham, kin gi mizlinè Abraham ba.

⁴⁰ Aman antanta kin woy a kin keɗye, i ndo njè kinè ma nzuraʼa, ma nzuraʼa man i tsena a sam Zhiklè. Abraham a nʼnga ar haha ɓai.

⁴¹ Kin gi mizlinè bab kinè. A ta gaɗa na: Nga wud ndo a dala ambali ka ɓai. Bab nga staɗgenè, Zhiklè.

⁴² A Yèsu a ngaɗa ta: Aman agassa Zhiklè Bab kinè, ar kin woy iyè a ndav kinè. I shkè te Bab Zhiklè, i shkè a ri ga ka ɓai. Aman nengaʼa a nzlinde-kayè.

⁴³ Kin tsena ngèɗè ga ɓi èhèmè? Aman kin slaha kin tsena ma ga ɓai.

⁴⁴ Kinè wudahi bi madzagai, bab kinè, a kin jèjèr ntétékè nengaʼa. Nengaʼa ndo nkeɗe ndo te nhinkaɗ na, a nzi te ma nzuraʼa azɓai, a ma nzuraʼa a te ndav na ɓai. Aman a cèkèlma, di man a na. Nengaʼa ndo ncèkèlma, bab ncèkèlma.

⁴⁵ Aman iyè, aman i gaɗa kinè ma nzuraʼa, kin cè ma ga azɓai.

⁴⁶ Ndo wa te ndev kinè, man a slaha a ngray mali ga? Aman i gaɗa kinè ma nzuraʼa, kin ciyè a ndav kinè azɓai èhèmè?

⁴⁷ Ndo man ndo Zhiklè, a tsena ma Zhiklè. Gar haha kin tsena ɓai, te man kinè ndohi Zhiklè ka ɓai.

Man Abraham az di ɓai, i zhè ma

⁴⁸ A ndohi Juif ta mbeɗa na a ma: Nga goɗ a vava ka ɓi dè, ka ndo Samarie, madzagi a ga ka!

⁴⁹ A Yèsu a ngaɗa ta: Madzagi a gay azɓai; aman i slébèrdè Bab ga, a kin derdyè.

⁵⁰ I woya nʼnjèl ga ka ɓai. Aman ngiɗè a zhè man a woyaʼa, a nengaʼa a gi kita.

⁵¹ A vava, a vava, i gaɗa kinè: Ndo man a fi gèɗ a ma ga, a rkè mʼmetsi a di azɓai a mèdèp.

⁵² A ndohi Juif ta gaɗa na: Antanta nga suna, madzagi a ga ka. Abraham a mʼmets na, ndohi nhadka ma ta bazl ta; a ka gaɗa: Ndo man a fi gèɗ a ma ga, a di a tèr mʼmetsi azɓai a mèdèp.

⁵³ Ka fena Abraham, bab nga, man a mets na ɗè? A ndohi nhadka ma ba ta bazl ta. Ka fu va ngaya a wa?

⁵⁴ A Yèsu a ngaɗa ta: Aman i nzala va ga a ri ga, nʼnjèl ga skwi ambalai. Aman Bab ga a nzalyè, nengaʼa man kin baha na Zhiklè kinè.

⁵⁵ Kin sun nengaʼa ɓai. Aman iyè, i sun nengaʼa. Aman i gaɗa: I sun nengaʼa ɓai, i ndo ncèkèlma, lèmèlèmè ara kinè. Aman i sun nengaʼa, a i fi gèɗ a ma nengaʼa.

⁵⁶ Abraham bab kinè a wuffè a vata, a géɗ man a di a rka pats ga. A nengaʼa a nrka ma, a wuffè ma.

⁵⁷ A ndohi Juif ta gaɗa na: Mvi ngaya az 50 di ɓai, a ka rka Abraham ma dè?

⁵⁸ A Yèsu a ngaɗa ta: A vava, a vava, i gaɗa kinè: Aman Abraham az di ɓai, i zhè ar iyè ma.

⁵⁹ A ta por kwa, a ta kèlèʼa. Aman Yèsu a ngheda va na, a mdo auda te gi Zhiklè.