Jean 6 - Ma Zhiklè

Ndohi 5.000 ta ngècè skwi nʼndai

¹ Te deɓaʼa Yèsu a mdo a wud woyam mbiaʼa Tibériade, te Galilee.

² A ndohi rèdèdèa ta dzodzora, te man ta rka nrkedai man a gu a sam ndohi matakwan.

³ Aman Yèsu a golahi nengaʼa to do a géɗ za, a ta nzahi a pa.

⁴ Ndul ndul Pâque, ngolala ndohi Juif.

⁵ A Yèsu a nʼngul dai, a nrka ndohi ta haya a sam na, a ngaɗa na Philippe: Nga da shum skwi nʼndi ndohi haha tema?

⁶ Ma haha a goɗa, a woya a njkédèʼa. Yèsu a sun skwi man a woya a ngiaʼa.

⁷ A Philippe a ngaɗa na: Ko skwi te di gozhèm cèw a ga ta ma azɓai.

⁸ Staɗ te va golahi nengaʼa, nzlembaɗ na André, kramam Simon Pierre, a ngaɗa na:

⁹ Kra ngiɗè a zhè a haha, movar zlam a klèf cèw te rai. Aman a sam ndohi kumba, kala mè?

¹⁰ A Yèsu a ngaɗa ta: Va-gaɗa ta ndohi aman ta nzahai! Kuza kumba a samaʼa. A ndohi 5.000 ta nzahai.

¹¹ Yèsu a nco movar, a nshüd gèɗ, a nkezla ta ndohi man ta nza tʼhai. Lèmèlèmè klèf ba, a ta ndau a ta ngeza.

¹² Aman a ngeza ta ma, Yèsu a ngaɗa ta golahi nengaʼa: Va-ɓica njèkèdiaʼa, da ksar na ɓai!

¹³ A ta ɓicaʼa njekèdi movar zlam, man ta ndaha, gadagar 12.

¹⁴ Aman ndohi ta rka nrkedi haha, man Yèsu a gau, ta gaɗa: Nengaʼa ndo nhadka ma, man ta gaɗa, a di a shkè a herkeda, a vava.

¹⁵ Aman Yèsu a rka, ta woy a ta shkè a ta gshèʼa, a ta woy a ta fi a bai, a ndo na a deɓa a za zaʼa. Nengaʼa a géɗ na.

Yèsu a de a géɗ iyam mbiaʼa

¹⁶ Adakwaɗ golahi Yèsu to do a ma woyam, a to do ta a wurom, a ta shkè a wud woyam mbiaʼa a kokwar Capernaum.

¹⁷ Vaɗ ma; Yèsu a mshkè a sam ta di ɓai.

¹⁸ A kozlar a ngai, a nslambaɗda iyam te woyam mbiaʼa.

¹⁹ A ta wurr wurom, a gi km 5, a ta rka Yèsu, man a shkè a géɗ iyam, ndul ndul a ma wurom, a ta gu zlau.

²⁰ A Yèsu a ngaɗa ta: I zhè! Kin gu zlau ɓai!

²¹ A ta woy a ta cè a wurom, a nasa nasa wurom a ndikè a dzah.

Ndohi ta hesh Yèsu

²² Te mangoslèmaʼa, ndohi nhayaʼa te wud woyam, a dzah, ta rka wurom ngiɗè ɓai, sèi man a golahi Yèsu, man ta shkè a vna. Ta suna, a ta gaɗa. Yèsu to do te pa a golahi nengaʼa ɓai. Sèi golahi nengaʼa man to do a vna.

²³ Te deɓaʼa wuromhi ngiɗè ta shkè te kokwar Tibériade, ndul ndul a sam man ta ndau movar, tedeɓ nshid gèɗ Bai Yèsu.

²⁴ Aman ndohi ta rkaʼa, Yèsu azɓai, a golahi nengaʼa tʼazɓai, tengaʼa ba to do a wuromhai, a ta shkè a kokwar Capernaum, a ta hèsh Yèsu.

Yèsu, movar nshèffè

²⁵ Aman ta ngotso tʼwud woyam mbiaʼa, ta gaɗa na: Rabbi, ka shkè haha a ngèmè?

²⁶ A Yèsu a mʼmbeɗa ta a ma: A vava a vava i gaɗa kinè, kin woy iyè a géɗ man kin rka nrkedi ka ɓai, aman a géɗ man kin ndau movar man a ngeza kinè.

²⁷ Kin gu mizlinè a géɗ skwi nʼndi man a di agédèsh na ɓai, aman a géɗ skwi man a va kinè nshèffè a mèdèp, nengaʼa man kra-ndo a di a va kinè, kra-ndo man Zhiklè, Bab na, a tsoko na va,

²⁸ A ta gaɗa na: Nga da gi be kè, aman nga gi mizlinè Zhiklè?

²⁹ A Yèsu a mʼmbeɗa ta a ma: Na haha mizlinè Zhiklè, aman kin cè nengaʼa man Zhiklè a zlündkoɗa, a ndav kinè.

³⁰ A ta gaɗa na: Ka ngra nga nrkedi mè, a nga ce ka a ndav? Ka gi mè?

³¹ Bababhi nga ta ndau manna tʼhèshèkèɗ, ara man ta Windo te ɗèlèwèr Zhiklè: A mva ta movar te zhiklè.

³² Yèsu a ngaɗa ta: A vava, a vava, i gaɗa kinè, Moise a mva kinè movar te zhiklè ka ɓai. Aman Bab ga a va kinè skwi nʼndi zuraʼa te zhiklè.

³³ Nasa movar Zhiklè, man a shkèhi te zhiklè, a va ta nshèffè a ndohi herkeda.

³⁴ Ta gaɗa na: Bai, va-nga movar haha pèc pècèk!

³⁵ Yèsu a ngaɗa ta: Iyè movar nshèffè. Ko wawa man a shkè a sam ga, mi a da keɗaʼa te deɓaʼa azbai; ko wawa man a cyè a ndav na, iyam a da dza na te deɓaʼa azɓai.

³⁶ Aman i gaɗa kinè, kin rkayè, aman kin cyè a ndav ɓai.

³⁷ Ndohi tèlèba man Bab ga a payè, ta shkè a sam ga. Ko wawa man a shkè a sam ga, i ckoɗauda azɓai.

³⁸ I shkè te zhiklè, a i gi skwi ara ndav ga man a woya ka ɓai. I shkè, aman i gi skwi man nengaʼa man a zlindekayè a woyaʼa.

³⁹ Nasa skwi man nengaʼa man a zlindekayè a woyaʼa: aman te va ndohi tèlèba man a payè, ko staɗ i zhidè azɓai, aman i slambaɗda ta a pats nʼndikèma skwai.

⁴⁰ Aman nasa skwi man nengaʼa man a zlindekayè a woyaʼa. Aman ko wawa man a rka kra na, a cè nengaʼa a ndav na, a ngècè nshèffè a mèdèp, a i slambaɗda a pats nʼndikèma skwai.

⁴¹ A ndohi Juif ta gu ma a géɗ ma nengaʼa, man a gaɗa: Iyè movar man a shkè-hai te zhiklè. A ta gaɗa:

⁴² Nengaʼa Yèsu, kra Joseph, man nga sun bab na, a mam na, ka ɓi ɗè? A gaɗ haha mè, man a gaɗa: I shkèhai te zhiklè?

⁴³ A Yèsu a mʼmbeɗa ta a ma: Kin gu ma a va kinè ɓai!

⁴⁴ Ndo ngiɗè a slaha a nshkè a sam ga azɓai, sèi man Bab ga man a zlindekayè a vütkoɗa, a i slèmbèɗè nengaʼa a pats nʼndikèma skwai.

⁴⁵ Ta Windo te ɗèlèwèr ndohi nhadka ma: Zhiklè a slebda ta tèlèba. Ndo man a tsena ma Zhiklè, a shindè ma nengaʼa, nengaʼa a shkè a sam ga.

⁴⁶ A géɗ man ndo a rka Bab ga a di ɓai. Sèi nengaʼa man a shkè te Bi Zhiklè, nengaʼa a rka Bab na a di na.

⁴⁷ A vava, a vava, i gaɗa kinè: Ko wawa man a co a ndav na, a nʼngotso nshèffè a mèdèp.

⁴⁸ Iyè movar nshèffè.

⁴⁹ Bababhi kinè ta ndau manna tʼhèshèkèɗ, a ta bazl ta.

⁵⁰ Na haha movar man a shkèhai te zhiklè. Ndo man a ndiaʼa, a metsi azɓai.

⁵¹ Iyè movar a nshèffè te pa, man a shkèhai te zhiklè. Ndo man a ndi movar haha, a nzi a nshèffè a mèdèp. A movar man i va na, zluèɗ va ga, man i vi a géɗ nshèffè ndohi herkeda.

⁵² A ndohi Juif ta gu ndzoan a va ta, a ta gaɗa: Nengaʼa a slaha a va nga zluèɗ va na, aman nga ndiaʼa ɗè?

⁵³ A Yèsu a ngaɗa ta: A vava, a vava, i gada kinè: Aman kin ndi zluèɗ va krando azɓai, kin si Pombaz va nengaʼa azɓai, kin ngècè nshèffè te ndav kinè azɓai.

⁵⁴ Ndo man a ndi zluèɗ va ga, a si Pombaz va ga, a nʼngotso nshèffè a mèdèp, a i da slambaɗdeko nengaʼa auda a pats nʼndikè ma skwai.

⁵⁵ Zluèd va ga, skwi nʼndi nzuraʼa; Pombaz va ga, skwi nsi nzuraʼa.

⁵⁶ Ndo man a ndi zluèɗ va ga, a si Pombaz va ga, a nzi te iyè, a iyè i nzi te nengaʼa.

⁵⁷ Ara man Bab ga, man a zhè a nshèffè, a zlindekayè, a i nzi a nshèffè man a Bab ga, lèmèlèmè ko wawa man a ndi zluèɗ va ga, a nzi a nshèffè a géɗ ga.

⁵⁸ Na haha movar man a shkèhai te zhiklè. Ara man a bababhi kinè ka ɓai, man ta ndau, a ta bazl ta. Ndo man a ndi movar haha, a nzi a nshèffè a mèdèp.

⁵⁹ Ma haha a njè ta te gi njèngè ma Zhiklè te kokwar Capernaum.

Ma nshèffè a mèdèp

⁶⁰ Golahi nengaʼa kumba, man ta tsenaʼa, ta gaɗa: Na haha ma mwuɗitpa, nslaha man a ncinèʼa wa?

⁶¹ Aman Yèsu a sun te ndav na, golahi nengaʼa ta gu ma a géɗ ma haha, a ngaɗa ta: Ma haha a slafadama kinè sak dè?

⁶² Aman te deɓaʼa kin da rka kra-ndo, man a dè deɓaʼa sam man a shkè te pa, kè?

⁶³ Sèi Mèzhèɓ Zhiklè a vi nshèffè. Zluèɗ-va-ndo, skwi ambalai. Ma man i gèɗèʼa, nengaʼa Mèzhèɓ Zhiklè a nshèffè.

⁶⁴ Aman ndohi tsaɗ tsaɗ ta zhè te ndev kinè, ta cè a ndav azɓai. Te nhinkaɗ na Yèsu a sen ta ndohi man ta da cè a ndav azɓai, a ndo man a da ga na ri a gèɗ.

⁶⁵ A ngaɗa ta: Gar haha i gaɗa kinè: Ndo ngiɗè a slaha a nshkè a sam ga azɓai, sèi Bab ga a va na civèɗ.

⁶⁶ Te deɓ nasa golahi nengaʼa kumba ta men ta a deɓa, a ta dzadzara te deɓa asaɓai.

⁶⁷ A Yèsu a ngaɗa ta 12: Kinè ba, kin woy a kin min kinè a deɓa dè?

⁶⁸ A Simon Pierre a ngaɗa na: Bai, nga dè a sam ngè? Ka ngots ma nshèffè a mèdèp.

⁶⁹ A nga co a ndav nga, a nga suna, ka, ka ndo nkezlaʼa man a shkè te Bi Zhiklè.

⁷⁰ Yèsu a ngaɗa ta: I par kinè 12 ka ɓi dè? Staɗ te va kinè, nengaʼa ndo madzagai.

⁷¹ A ngoɗ ma a géɗ Judas Iscariot, kra Simon, nengaʼa man te deɓa a nʼnga na ri a gèɗ. Nengaʼa staɗ te va 12.