Jean 5 - Ma Zhiklè

Yèsu a mʼmbel ndo a sam nhèyè-va iyam

¹ Te deɓaʼa ndohi Juif ta gu ngolala. A Yèsu a ndo Jérusalem.

² A ntamagi kokwar Jérusalem, man ta baha na ntamagi tambakhai, nhèyè-va iyam a zhè a pa. Ta baha na a ma Hébreu, Béthesda. Ntamagi zlam a pa,

³ a ndohi matakwan kumba, ndohi mandazlai, ndohi vedal, ndohi man ta gwora [ta zhèr aman iyam a gidè va.

⁴ A pats ngiɗè, pats ngiɗè, gol Bi Zhiklè a shkèhai a sam nhèyè-va iyam, a ngeda iyam. Aman iyam a gidè va, ndo man a dè a pa nshèlèkuraʼa, a mbél na, ko matakwan mèmè a nʼnga na.]

⁵ Ndo ngiɗè a zhè a pa, mʼmana tʼhai a matakwan, mvi 38.

⁶ Aman Yèsu a nrkaʼa, a ntsenaʼa, a mʼmana tʼhai nʼnzi a zhè, a ngaɗa na: Ka woy a ka mbél ngaya te matakwan dè?

⁷ Ndo matakwan a ngaɗa na: Bai, i ngatsa ndo man a ndyè a iyam ɓai. Aman iyam a dè gidè va, a i shkè, ndo ngiɗè nʼngelamay ma.

⁸ A Yèsu a ngaɗa na: Slambaɗa, co sam mʼmènè ngaya, a ko do!

⁹ A nasa nasa ndo matsa mʼmbela, a nco sam mʼmènè na, a ndo. A pats nasa, pats nshèk va.

¹⁰ A ndohi Juif ta gaɗa na ndo man a mbel na: A patsna pats nshèk va, ambaɓai aman ka zhüɓ sam mʼmènè ngaya.

¹¹ A ndo matsa a ngaɗa ta: Nengaʼa man a mbelyè, a ngaɗayè: Co sam mʼmènè ngaya, a ko do!

¹² A ta dzhoɗo: Ngaɗa ka wa, ngaɗa ka, co sam mʼmènè ngaya, a ko do, wa?

¹³ Aman ndo man mʼmbela a sun ndo mʼmbulo ɓai. A nʼngatsa Yèsu ɓai, a géɗ man ndohi kumba a samaʼa.

¹⁴ Te deɓaʼa Yèsu a nʼngots ndo matsa te gi Zhiklè, a ngaɗa na: Na haha, ka mbela ma, anai ka gu mali asaɓai! Man ka da gau, skwi mwuɗitpa holholaʼa a da ga ka.

¹⁵ A ndo matsa a mdo, a nʼngreda ta ndohi Juif: Ndo man a mbelyè sa, nengaʼa Yèsu.

¹⁶ A ndohi Juif ta pi va a Yèsu, a géɗ man a gu skwi ar haha a pats nshèk va.

¹⁷ A Yèsu a ngaɗa ta: Bab ga a gi mizlinè ani haha ba, a i ba i gi mizlinè.

¹⁸ A ndohi Juif ta woy maya aman ta keɗaʼa holholaʼa, a géɗ man a ngu mizlinè a pats nshèk va genè ka ɓai, aman a géɗ man a baha na Zhiklè Bab ga, a lèmdè va na a Zhiklè.

Wuɗi kra Zhiklè

¹⁹ A Yèsu a mʼmbeɗa ta a ma: A vava, a vava, i gaɗa kinè: Kra a slaha man a gi skwi a ri na azɓai, ko staɗ. Sèi skwi man a rka, Bab na a giaʼa. A skwi man nengaʼa a giaʼa, kra nengaʼa ba, a giaʼa.

²⁰ A bab kra a woy kra nengaʼa, a nʼngra na skwi tèlèba man a giaʼa. A di a ngra na skwi mbiaʼa holholaʼa, a kin da rzl kinè a pa.

²¹ Ara man Zhiklè a slèmbèɗdè ndohi mʼmetsaʼa, a va ta nshèffè, lèmèlèmè kra nengaʼa, a vi nshèffè a ndo man a woyaʼa.

²² Zhiklè a gi kita a ndo azɓai. Aman kita tèlèba a feda a ri kra,

²³ aman ndohi tèlèba ta da slébèrdè kra, ara man ta slébèr-dè Bab na. Ndo man a slébèrdè kra azɓai, a slébèrdè Bab na man a zlindkoɗa azɓai lèmèlèmè arsa.

²⁴ A vava, a vava, i gaɗa kinè: Ndo man a tsena ma ga, a nco ma nengaʼa man a zlindekayè a ndav na, a nʼngotso nshèffè a mèdèp, a ngècè kita a gèɗ na azɓai, aman a ntsoko gèɗ na auda te mʼmetsai, a nʼndo a nshèffè.

²⁵ A vava, a vava, i gaɗa kinè: Patsa a di a shkè, ani a zhè ma, aman ndohi mʼmetsaʼa ta tsena daʼai kra Zhiklè. A tengahi man ta tsenaʼa, ta da nzi a nshèffè.

²⁶ Ara man nshèffè a zhè te ri Babaʼa, lèmèlèmè a mva na kra nengaʼa, a nshèffè a zhè te ri na.

²⁷ A mva na wuɗi-bai, aman a slaha a ngi kita, te man nengaʼa kra-ndo.

²⁸ Kin hur gèɗ ɓai! Pats ngiɗè ndohi dzavihai tèlèba ta da tsena daʼai nengaʼa.

²⁹ A ta da shkè auda. Ndohi man ta gu skwi man amba, ta slambaɗkaɗauda a nshèffè. A ndohi man ta gu skwi man ambaɓai, ta slèmbèdè a kita.

Ndohi malwuɗihi Yèsu

³⁰ I slaha a i gi skwi a géɗ ga ɓai; i bèzlè kita, ara man i tsenaʼa. Kita ga nzuraʼa. I woy skwi ara man iyè i woya ka ɓai, aman skwi man nengaʼa man a zlindekayè a woyaʼa.

³¹ Aman i goɗ a géɗ va ga, ar skwi man i ngreda kinè, skwi nzura ka ɓai.

³² Aman ndo ngiɗè a hodko kinè malwuɗi ga, a i suna, skwi man a ngreda kinè a géɗ ga, zuraʼa.

³³ Kin zlündo ndo a sam Jean, a nengaʼa a nʼngreda kinè ma zuraʼa.

³⁴ I ngreda kinè ma ndo ka ɓai, aman i gaɗa kinè ma haha, a kin mbél kinè.

³⁵ Nengaʼa skwi nhél sam nday-ndayaʼa. A kin woy a kin wuffè nʼnzi kètè a sam man a helaʼa.

³⁶ Aman ma malwuɗi ga a fena ma malwuɗi Jean. A mizlinè man Bab ga a mvayè man i giaʼa, aman i ndevaʼa, mizlinè sa a ngredyè a sam kinè, ara man Bab ga a nzlindekayè.

³⁷ A Bab ga man a zlindekayè, a ngredyè a sam kinè. Kin tsena daʼai nengaʼa ɓai, kin rka va nengaʼa ɓai.

³⁸ A ma nengaʼa a nzi te ndav kinè azɓai, te man kin cè nengaʼa man a zlündo, a ndav kinè ɓai.

³⁹ Va-war te ɗèlèwèr Zhiklè! Kin hur, kin ngècè nshèffè a mèdèp te nengaʼa. Nengaʼa a ngredyè a sam kinè.

⁴⁰ Kin woy a kin shkè a sam ga a kin ngècè nshèffè ɓai.

⁴¹ I woy aman ndohi ta slebardyè ɓai.

⁴² Aman i sen kinè, mwoy-ndo Zhiklè a te ndav kinè ɓai.

⁴³ I shkè a nzlembaɗ Bab ga, a kin cyè ɓai. Aman ndo ngiɗè a shkè a nzlembaɗ na, kin da cè nengaʼa.

⁴⁴ Aman kin woy aman ndohi ta slebarde kinè, kin woya man a Zhiklè ka ɓai, ncè-a-ndav kinè mè?

⁴⁵ Kin hur ɓai, i da pin kinè a sam Bab ga. Ndo ngiɗè a pin kinè, nengaʼa Moise, man ndav kinè a zhèr skwi te ri nengaʼa.

⁴⁶ Aman kin co ma Moise a ndav kinè, ar agassa kin cyè ba; aman nengaʼa a Windo a géɗ ga.

⁴⁷ Aman kin ca ɗèlèwèr nengaʼa a ndav ɓai, kin cè ma ga a ndav kinè ɗè?