Jean 4 - Ma Zhiklè

Yèsu a ngwoz te kokwar Samarie

¹ Aman Bai Yèsu a suna, ndohi pharisie ta gaɗa, golahi Yèsu ta zhè a vata, a nʼnga ta baptême, a fena man a Jean.

² Yèsu a ri na a nʼnga baptême a ndo ɓai, sèi golahi nengaʼa.

³ A Yèsu a njèkeda kokwar Judée, a mʼmen na a deɓa a kokwar Galilee.

⁴ Civèdèʼa a mbezda a ndev kokwar Samarie.

⁵ A mshkè a kokwar ngiɗè, nzlembaɗ na Sychar, te Samarie, ndul ndul a sam gi dau, man Jacob a va na Joseph, kra na.

⁶ Thal iyam Jacob a zhè. A Yèsu a nʼngeza a nshèwèlè, a nʼnza a ma thal iyam, a géɗ pats.

⁷ A ngwoz ngiɗè a mshkè te kokwar Samarie, a mɓèl iyam. A Yèsu a ngaɗa na: Ɓedzay iyam, a i siaʼa!

⁸ Golahi nengaʼa ta kal ta a kokwar, a ta da shum skwi nʼndai.

⁹ A ngwoz Samarie a ngaɗa na: Ka dzhoɗo iyam te ri ga èhèmè? Ka ndo Juif, iyè, i ngwoz Samarie? (ndohi Juif ta humde a ndohi Samarie azɓai).

¹⁰ A Yèsu a mʼmbeɗa na a ma: Aman agassa ka sun skwi man Zhiklè a vi a ndohai, a ka sun nengaʼa man a gaɗa ka: Ɓedzay iyam a i siaʼa, ar ka jhèɗè nengaʼa, a nengaʼa a nva ka iyam nshèffè.

¹¹ A ngwoz a ngaɗa na: Bai, skwi man a ka kèl iyam a vna, azɓai; thal iyam nra a vata. Ka ngècè iyam nshèffè tema?

¹² Ka fena Jacob, bab nga, man a va nga thal iyam haha dè? Nengaʼa a wudahi nengaʼa, a skwi nengaʼa, ta sau te pa.

¹³ A Yèsu a mʼmbeɗa na a ma: Ndo man a si iyam haha, iyam a da dza na te deɓaʼa zaʼa.

¹⁴ Aman ndo man a si iyam man i va na, iyam a da dza na te deɓaʼa asaɓai a mèdèp. Aman iyam man i viaʼa, a da gi te ndav nengaʼa ara nlèlè iyam nshèffè man ahi a mèdèp.

¹⁵ A ngwoz a ngaɗa na: Bai, vay iyamaʼa, aman iyam a da dzayè te deɓaʼa asaɓai, a i shkè a deɓa asaɓai, aman i da ɓéj iyam.

¹⁶ A Yèsu a ngaɗa na: Do, baha na baki ngaya, a kin shkè!

¹⁷ A ngwoz a mʼmbeâa na a ma: Baki ga azɓai! A Yèsu a ngaɗa na: Ka goɗ zuraʼa, baki ngaya azɓai.

¹⁸ Ko do a gi bakihi zlam, a nengaʼa man ka te pa antanta, baki ngaya ka ɓai. Narsa, a vava.

¹⁹ A ngwoz a ngaɗa na: Bai, i rka, ka, ka ndo nhadka ma.

²⁰ Babhi nga ta tsu ri a Zhiklè a géɗ za haha, a kinè, kin gaɗa sam ntsi ri Zhiklè a zhè te kokwar Jérusalem.

²¹ Yèsu a ngaɗa na: Ngwoz, co ma ga! Patsaʼa a di a shkè, aman kin da tsi ri a Bab Zhiklè a géɗ za ka ɓai, te kokwar Jérusalem ka ɓai.

²² Kin tsi ri a skwi man kin sun ɓai. Aman nga, nga tsi ri a skwi man nga suna: skwi mʼmbel ndo a shkè te ndohi Juif.

²³ Aman patsaʼa a shkè, ani a zhè ma, aman ndohi man ta tsi ri Zhiklè zuraʼa, ta tsi ri a Bab Zhiklè te Mèzhèɓ Zhiklè, a nzuraʼa. Aman Bab ga a woya a ta tsi ri arsa.

²⁴ Zhiklè, Mèzhèɓ, a ndohi man ta woya a ta tsi riaʼa, sèi ta tsi riaʼa te Mèzhèɓ, a nzuraʼa.

²⁵ Ngwoz a ngaɗa na: I suna, Messie a di a shkè, ta baha na Kristi. Aman nengaʼa a da shkè ma, a da senda nga skwi tèlèba.

²⁶ Yèsu a ngaɗa na: Nengaʼa iyè, man nga gèɗè a ka, haha.

²⁷ Te va man ta gèɗè, golahi nengaʼa ta shkè, a ta rzl ta: ta gaɗa ma mè a ngwoz haha? Aman ko staɗ a ndzhaɗa ɓai: ka njè na ma mè?

²⁸ A ngwoz a njèkeda duzlak nengaʼa, a ndo a kokwar, a ngaɗa ta ndohai:

²⁹ Vo-washkè, va-rka ndo ngiɗè man a gaɗayè skwi tèlèba man i gau. Nengaʼa Kristi ka ɓi ɗè?

³⁰ A to do a sam na.

³¹ A golahi nengaʼa ta tétika na skwi nʼndi a gèɗ a Yèsu, a ta tsa na rai: Rabbi, ndau!

³² Aman Yèsu a ngaɗa ta: I ngots skwi nʼndi man kin sun bai.

³³ A golahi Yèsu ta goɗ a va ta: Ndo ngiɗè a ncko na skwi nʼndi dè?

³⁴ A Yèsu a ngaɗa ta: Na haha, skwi nʼndi ga, aman i gi skwi man ndo nzlindekayè a woya i giaʼa, a i ndivè mizlinè nengaʼa.

³⁵ Kin gèɗè azbi dè? Na haha, njèkè ki faɗ, a ta da bicè skwai. Na haha, i gaɗa kinè: Va-ngul dai, a kin rka gi dau. Skwi nʼnga ma, aman ta ɓicèʼa antanta.

³⁶ A ndo man a tsi dau, a ngècè skwi ntul na, a bicè skwi a nshèffè a mè-dèp. A ndo nzlekai, a ndo ntsi dau, ta wuffè a géɗèʼa cèw ta ba.

³⁷ Na haha ma nzuraʼa: Ndo ngiɗè a zlekiaʼa, ndo ngiɗè a ɓicèʼa.

³⁸ I zlinde kinè aman kin bicè skwai a sam man kin ga mizlinè a pa ɓai; ndohi ngiɗè ta gu mizlinè, a kin kèlè a gèɗèʼa.

³⁹ A ndohi Samarie kumba te kokwar ta co Yèsu a ndav, a géɗ ma man ngwoz a gaɗa ta, man a nʼngreda ta: A ngaɗayè skwi tèlèba man i gau.

⁴⁰ Aman ndohi Samarie ta shkè, ta tsu riaʼa, aman a nzi a sam ta. A Yèsu a nʼnza a sam ta mʼmèn cèw.

⁴¹ A ndohi kumba ta co a ndav, a géɗ njè-ma nengaʼa, a ta gaɗa na ngwoz:

⁴² Anai nga co Yèsu a ndav a géɗ ma ngaya genè ka ɓai. Aman nga ba, nga tsena, a nga suna a ri nga, nengaʼa ndo mʼmbel herkeda a vava.

Yèsu a mʼmbel kra bi soje te matakwan

⁴³ Te deb mʼmèn cèw a njèkeda kokwar, a ndo a kokwar Galilée.

⁴⁴ Aman Yèsu a nʼngreda a ri na, a ngaɗa: Ta cè ma ndo nhadka ma te kokwar bab na azɓai.

⁴⁵ Aman a mdo a kokwar Galilée, ndohi Galilée ta feda Yèsu a gai, aman ta rka skwi tèlèba man a gu te kokwar Jérusalem te ngolala. Tengaʼa ba to do ngolala.

⁴⁶ A Yèsu a mshkè a deɓa a kokwar Cana te Galilée, a sam man a ngwoda iyam a barassa.

⁴⁷ Bigol bi ngiɗè a zhè, kra nengaʼa mbelakaɓai te kokwar Capernaum. Nengaʼa a ntsenaʼa, Yèsu a mshkè te kokwar Judée, a ndè a kokwar Galilée, a ndo a sam na, a ntsu riaʼa, aman a shkè, a ntakaha kra na. Skwa a ndza na a vata, a woy mʼmetsai.

⁴⁸ A Yèsu a ngaɗa na: Aman kin rka skwi malwuɗi a nrkedi ɓai, kin cè a ndav azɓai!

⁴⁹ A bigol bai a ngaɗa na: Bai, washkè, ga kra ga a metsai!

⁵⁰ A Yèsu a ngaɗa na: Do, kra ngaya a zhè a nshèffè. A ndo matsa a nco ma Yèsu a ndav, a ndo.

⁵¹ Aman a ndo, a ta zli gèɗ a ɓèlèlihi nengaʼa, a ta ngra na: Kra ngaya a zhè a nshèffè!

⁵² A nengaʼa a ndzhoɗo: Nʼnga na dara a sam tèkè? A ta gaɗa na: Adatsa a géɗ pats, vogwa a va a ndal na.

⁵³ A bab kra a suna, nasa sam man Yèsu a ngaɗa na: Kra ngaya a nzi a nshèffè. A nengaʼa, a gi nengaʼa tèlèba, ta co Yèsu a ndav.

⁵⁴ Nasa nrkedi macecèwaʼa, man Yèsu a gau, aman a shkè te kokwar Judée, a ndo a kokwar Galilée.