Jean 3 - Ma Zhiklè

Yèsu a Nicodème

¹ Ndo ngiɗè a zhè, te va ndohi pharisie, nzlembaɗ na Nicodème, ndo mbiaʼa a sam ndohi Juif.

² Nengaʼa a mshkè a sam Yèsu a vaɗ, a ngaɗa na: Rabbi, nga suna, ka ndo man Bi Zhiklè a zlindka ka aman ka jèngè nga. Nrkedi man ka giaʼa, ndo ngiɗè a slaha ɓai, sèi man Zhiklè a zhè a sam na kla.

³ Yèsu a mʼmbeɗa na a ma: A vava, a vava i gaɗa ka: Aman ndo a yakaɗi mɓuaʼa te Zhiklè ka ɓai, a slaha man a nrka kokwar-Bi-Zhiklè ɓai.

⁴ A Nicodème a ngaɗa na: Ndo man nhala ma, a nyakaɗi mɓuaʼa ɗè? A slaha a mʼminè a deɓa a hwaɗ mam na, a yi macecèwaʼa za dè?

⁵ A Yèsu a ngaɗa na: A vava, a vava i gaɗa ka: Sèi ndo a yakaɗi a iyam a Mèzhèɓ Zhiklè, man bai a slaha a ndè a kokwar-Bi-Zhiklè azɓai.

⁶ Skwi man a yaka te va ndo, ndo. Skwi man a yaka te Mèzhèɓ Zhiklè, Mèzhèɓ.

⁷ Gar haha ka hur gèɗ ɓai, aman i gaɗa ka, sèi kin yakaɗi mɓuaʼa te Zhiklè te géɗèʼa.

⁸ Kozlar a gi a sam man a woyaʼa. Ka tsena kuɗ nengaʼa. Aman sam man a shkè te pa, ka sun ɓai, sam man a dè a pa, ka sun ɓai. Lèmèlèmè ndo man a ya te Mèzhèɓ Zhiklè.

⁹ A Nicodème a mʼmbeɗa na a ma: Skwi haha a gi a nkèkèkè?

¹⁰ A Yèsu a mʼmbeɗa na a ma: Ka ndo njèngè ma te kokwar Israel, a ka sun bi dè?

¹¹ A vava, a vava i gaɗa ka, nga gèdè skwi man nga suna, a nga ngréɗè skwi man nga rkaʼa, a kin cè malwuɗi nga azɓai.

¹² Kin cè a ndav azɓai, aman i ngreda kinè skwi nte herkeda haha, te deɓaʼa aman i senda kinè skwi nte zhiklè, kin slaha kin cè a ndav dè?

¹³ Ndo ngiɗè a dè zhiklè azɓai, sèi ndo man a shkè te zhiklè, nengaʼa kra-ndo man a zhè te zhiklè.

¹⁴ Ara Moise a nzlatseda zhüzhok tʼhèshèked, ta da zlècèdè kra-ndo.

¹⁵ Ko wawa man a cè nengaʼa a ndav na, a ngè-cè nshèffè a mèdèp.

¹⁶ Gar haha Zhiklè a woy herkeda a ndav na, a mva ta kra nengaʼa, kra nengaʼa staɗgenè, aman ko wawa man a nco nengaʼa a ndav na, a zi azɓai, a nʼngotso nshèffè a mèdèp.

¹⁷ Zhiklè a nzlündko kra nengaʼa a herkeda, a ngi kita herkeda ka ɓai. A nzlündo, aman herkeda a mbél na a géɗ nengaʼa.

¹⁸ Ko wawa man a nco a ndav na, ta ga na kita a gèɗ azɓai. Aman ko wawa man a nca a ndav ɓai, kita a zhè a gèɗ nengaʼa ma, te man a nca nzlembaɗ kra Zhiklè, kra Zhiklè staɗgenè, a ndav na ɓai.

¹⁹ Na haha kita: skwi nhél, sam a mshkè a herkeda, a ndohi ta woya ruva a fena skwi nhél sam, te man skwi man ta gau, ambaɓai.

²⁰ Ndo man a gi skwi man ambaɓai, a woy skwi nhél sam ɓai, a dè a sam nhelaʼa azɓai; man bai skwi man a giaʼa a ngréɗè auda.

²¹ Aman ndo man a gi skwi nzuraʼa, nengaʼa a dè a sam nhelaʼa, a skwi man a giaʼa, a shinè auda, te man a gau ara man Zhiklè a woyaʼa.

Nenga a mbiaʼa, iyè nkèshèʼa

²² Te deɓ nasa Yèsu a golahi nengaʼa to do a kokwar Judée, a ta nza a pa, a nengaʼa a ngu baptême.

²³ Jean ba a ngu bap-tême te kokwar Enon, ndul ndul a kokwar Salim, aman te pa iyam kumba. A to do a pa, a Jean a nʼnga ta baptême.

²⁴ Ta gsa Jean a dangi di ɓai.

²⁵ Te va golahi Jean ngiɗè ta hüno a ta verslè a ndo Juif ngiɗè, a géɗ mpèn va.

²⁶ A to do a sam Jean, a ta gaɗa na: Rabbi, ndo man a nʼnza a sam ngaya te wud woyam Jourdain, nengaʼa man ka ngra nga, anai a gi baptême, a ndohi tèlèba ta dè a sam na.

²⁷ Jean a mʼmbeɗa ta a ma: Ndo a slaha a ngècè skwi azɓai, man Zhi-klè a nva na ɓai.

²⁸ Kinè a ri kinè ndohi malwuɗihi ga, aman i gaɗa kinè, i Kristi ka ɓai, ta zlindekayè a ma nengaʼa genè.

²⁹ Ndo man a ngots medemai, nengaʼa ntsim na. Mandal ntsima a wuffè a vata, aman a tsena daʼai ntsima. Mwuffe ga aranta a zhè ma.

³⁰ Sèi nengaʼa da gra a gi a mbiaʼa a ma ma, iyè sèi i minèhi a hai a i gi a nkèshèa.

Nengaʼa man a shkè te zhiklè

³¹ Nengaʼa man a shkè te géɗèʼa, a fena tèlèba. Ndo man a shkè tʼherkeda, ndo herkeda, a gèɗè skwi ntʼherkeda. Nengaʼa man a shkè te zhiklè, a zhè a géɗ skwi tèlèba.

³² A ngreda skwi man a rkaʼa, a tsenaʼa; aman ndohi ta cè skwi malwuɗi nengaʼa azɓai.

³³ Aman ndo man a nco, a gi malwuɗihi, Zhiklè nzuraʼa a vava.

³⁴ Ndo man Zhiklè a zlündo, a gèɗè ma Zhiklè. Zhiklè a vi Mèzhèɓ na a livè azɓai.

³⁵ Bab kra a woy kra na a ndav na, a mva na skwi tèlèba a ri nengaʼa.

³⁶ Ndo man a nco kra Zhiklè a ndav na, a nʼngotso nshèffè a mèdèp. Ndo man a fi gèɗ a kra Zhiklè azɓai, a rkè nshèffè a di azɓai, aman Zhiklè a gi ndav a gèɗ nengaʼa.