Jean 20 - Ma Zhiklè

Nslambaɗkaɗauda te mʼmetsai

¹ A pats nshèlèkuraʼa te pats luma, Marie Magdala a mdo, a prèk vaɗ, a sam gi dzavai, a nrka ngezlambar kwa ngudumbela auda a ma gi dzavi ma.

² A nengaʼa a mhu a sam Simon Pierre, ta a gol ngiɗè, man Yèsu a woyaʼa, a ngaɗa ta: Ta ceda Bi nga auda te gi dzavai, a nga sun sam man ta feda a pa ɓai.

³ A Pierre a mdo, ta a gol ngiɗè, a to do a sam gi dzavai.

⁴ Ta cèw man ta hu a vna; a ngiɗè nʼngelda Pierre a pa, a nʼndika a sam gi dzavi nshèlèkuraʼa,

⁵ a mpu di a pa, a nrka maslaka gogumi tʼhi te pa.

⁶ Aman a nda a pa ɓai. A Simon Pierre a mshkè, a ndzodzora, a mdo a gi dzavai,

⁷ a nrka mberzlèdai az a sam maslaka gogumi ɓai, mpaɗaʼa a géɗ na, a sam tsaɗ.

⁸ Te deɓaʼa gol matsa a mdo a pa, nengaʼa man a ndika a sam gi dzavi nshèlèkuraʼa. Nrke na, a nco a ndav na.

⁹ Aman ta sun ɗèlèwèr Zhiklè di ɓai, ara man a gaɗa: Sèi a slèmbèɗè te ndev ndohi mʼmetsaʼa.

¹⁰ A golahi to do ta a ngwai.

Yèsu a ngudoko na va a di a Marie Magdala

¹¹ Aman Marie nzlatsa a sam gi dzavai, tʼuda, a kuɗai. Aman a kuɗai, a nzerɗda di a gi dzavai.

¹² A nrka golahi Zhiklè cèw, a maslaka nslekaɗaʼa, ta nza a ma gi dzavai man va Yèsu te pa, staɗ te géɗèʼa, staɗ a sam sak na.

¹³ Tengaʼa ta gaɗa na: Ngwoz, ka kuɗ mè? A nengaʼa a ngaɗa ta: Ta ceda Bi ga a ma, a i sun sam man ta feda a pa ɓai.

¹⁴ Aman a ngoɗ ma haha, a mpu di a deɓa, a nrka Yèsu, nzlatsa a pa, aman nengaʼa a sun a ngaɗa Yèsu ɓai. A Yèsu a ngaɗa na:

¹⁵ Ngwoz, ka kuɗ mè? Ka woy wa? A nengaʼa a nhuro, ndo mɓer gi lak, a ngaɗa: Bai, aman ka zuɓda a sam ngiɗè, ngredayè sam man ka feda a pa, aman i da ckoɗa deɓa.

¹⁶ A Yèsu a ngaɗa na: Marie! A nengaʼa a nʼngwoda ma a deɓa, a ngaɗa na a ma hèbreu: Rabbuni! Ara ngèɗè: Ndo njèngè ma!

¹⁷ A Yèsu a ngaɗa na: Ka gsiyè a ri ɓai, aman i da a deɓa a sam Bab ga di ɓai! Aman do a sam kramamhi ga, a ka gaɗa ta: Na haha, i dè a sam Bab ga, a sam Bab kinè, a sam Zhiklè ga, a sam Zhiklè kinè.

¹⁸ A Marie Magdala a ndo, a njè ta ma haha a golahi Yèsu: I rka Bai, a nengaʼa a ngaɗay kata kata!

Yèsu a ngudoko ta va a dai a golahi nengaʼa

¹⁹ A pats nasa, dakwaɗ ma, pats nshèlè-kuraʼa te pats luma; gi man golahi Yèsu te pa, mpizlèʼa. Ta gu zlau ndohi Juif. A Yèsu a mshkè, nzlatsa a ndev tengaʼa, a ngaɗa ta: Gumi a nda kinè!

²⁰ Aman a ngoɗ ma haha, a nʼngreda ta ri na, a zlazlar na. A golahi nengaʼa ta wuffè a vata, aman ta rka Bi ta.

²¹ A Yèsu a ngaɗa ta zaʼa: Gumi a nda kinè! Lèmèlèmè ara man Bab ga a nzlindekayè, i ba i zlinde kinè.

²² Aman a ngaɗa ta ma haha, a nfte ta, a ngaɗa ta: Vo-co, Mèzhèɓ Zhiklè nkezlaʼa!

²³ Ndohi man kin pra ta malai, mali tengaʼa mpraʼa. Ndohi man kin pra ta mali azɓai, mali tengaʼa ta nza.

Thomas a nca a ndav ɓai

²⁴ Thomas, staɗ te va 12, man ta baha na tsakalai, az a sam ta ɓai, a pats man Yèsu a mshkè.

²⁵ A golahi ngiɗè ta gaɗa na: Nga rka Bai! Aman nengaʼa a ngaɗa ta: Sèi i rka Vovi züdo a ri nengaʼa, a i taraha Vovi züdo a ri ga, a i lama na zlazlar na a ri ga, man ɓai i cè a ndav azɓai.

²⁶ Te deɓ mʼmèn tsamakaɗ, golahi nengaʼa ta zhè te gi zaʼa; Thomas a nda tengaʼa. Gi mpizlèʼa. A Yèsu a mshkè, nzlatsa a ndev tengaʼa, a ngaɗa: Gumi a nda kinè!

²⁷ Te deɓaʼa a ngaɗa na Thomas: Cko kra-ri ngaya! Taraha rihi ga! Torko ri ngaya, a ka lama na zlazlar ga! Ambaɓai aman ka ca a ndav ɓai. Co a ndav!

²⁸ A Thomas a mʼmbeɗa na a ma: Bi ga, Zhiklè ga!

²⁹ A Yèsu a ngaɗa na: Ka co a ndav ngaya, a géɗ man ka rkayè ma. Mwuffè a sam ndohi man ta co a ndav ta, ko ta rkaʼa a di ɓai.

Verzi ɗèlèwèr haha

³⁰ Yèsu a ngu skwi malwuɗi tsaɗ tsaɗ a sam di golahi nengaʼa, aman ta windeda ɗèlèwèr haha ɓai.

³¹ Aman skwi malwuɗihi haha ta Windo, aman kin cè a ndav, Yèsu, nengaʼa Kristi, kra Zhiklè. A géɗ ncè-a-ndav kinè kin da ngècè nshèffè a nzlembaɗ na.