Jean 2 - Ma Zhiklè

Ngolala nfi ngwoz a gai te Cana

¹ Te mʼmèn mamakarʼa ta gu ngolala nfi ngwoz a gai te kokwar Cana, te Galilée.

² A mam Yèsu a zhè a pa. A ta baha na Yèsu a golahi nengaʼa ba a ngolala.

³ A barassa a ndeva ta gèɗ, a mam Yèsu a ngaɗa na Yèsu:

⁴ Barassa a nʼndev na. A Yèsu a ngaɗa na: Ma ngaya dè, ngwoz! Pats man a ga a mshkè di ɓai.

⁵ A mam na a ngaɗa ta ndohi mizlinè: Skwi mèmè man a da gaɗa kinè, va-gau!

⁶ Kreblomhi 6 a pa. Ta peda a pa, a ndohi Juif ta pèn va a vna. Kreblom staɗ, duzlakhi te pa 5.

⁷ A Yèsu a ngaɗa ta: Va-ndha kreblomhi a iyam! A ta ndheda.

⁸ Yèsu a ngaɗa ta: Va-ngelaʼa, va-da a sam bi skwi nʼndai! A ta daʼa.

⁹ Aman bi skwi nʼndai a ntor barassa man a matsa iyam (a sun sam man a shkè te pa ɓai, sèi ndohi mizlinè man ta ɓol iyam, ta suna), bi skwi nʼndai a mbaha na baki ngwoz sa, a ngaɗa na:

¹⁰ Ndohi tèlèba ta vi barassa man a jèn nshèlèkuraʼa; te deɓaʼa man a keɗ ta ndohi ma, ta sa na njénɓiaʼa a gèɗ. Aman ka ngheda barassa njénaʼa, a ka ckoɗ a deɓa.

¹¹ Nasa nrkedi nshèlèkuraʼa, man Yèsu a gau, te kokwar Cana, te Galilée, a nʼngreda nʼnjèl nengaʼa auda. A golahi nengaʼa ta co a ndav.

¹² Te deɓ skwi haha, Yèsu a mam na, a kramamhi na, a golahi na, to do a kokwar Capernaum, aman ta nza a pa a vata ɓai.

Yèsu a til gi Zhiklè

¹³ Ndul ndul ar ngolala Pâque ndohi Juif. A Yèsu a mdo a kokwar Jérusalem.

¹⁴ A nʼngots ndohi mpre zlè, ndohi mpre tambakhai, ndohi mpre nkuɗhomhai, a ndohi nhumbèɗè sulai te gi Zhiklè, man ta nza te pa.

¹⁵ A Yèsu a ntsaffa mènèwèɗ teɓa, a ndzar ta tèlèba auda te gi Zhiklè, a tambakihi ha, a zlehi ba. A wusheda Suli ndohi nhumbèɗè Suli aussa, a nzukda table aussa, a ngaɗa ta ndohi mpre nkuɗhomhai:

¹⁶ Va-helda skwi kine auda, kin ngwoda gi Bab ga a gi luma bai!

¹⁷ A golahi nengaʼa ta hur ma haha, ara man a Windo te ɗèlèwèr Zhiklè: Srak a keɗyè a hai a géɗ gi ngaya.

¹⁸ A ndohi Juif ta mbeɗa na a ma: Ka nga skwi ga nga nrkedi mè aman a ka gi a haha?

¹⁹ Yèsu a mʼmbeɗa ta a ma: Va-mbeɗda gi Zhiklè nkezlaʼa haha aussa, te mʼmèn makar i ɗizlèʼa.

²⁰ A ndohi Juif ta gaɗa: Ta rom gi Zhiklè nkezlaʼa haha mvi 46. Ka, ka woy a ka ɗizlèʼa te mʼmèn makar genè ɗè?

²¹ Aman Yèsu a ngaɗa ta a géɗ gi Zhiklè nkezlaʼa, a géɗ va na.

²² Aman a nslambaɗkaɗauda te ndev ndohi mʼmetsaʼa ma, golahi nengaʼa ta hur ma haha, ara man a gaɗa ta. A ta co ma ɗèlèwèr Zhiklè a ndav ta, a ma man Yèsu a gaɗa ta.

Yèsu a sun ndohi tèlèba

²³ Aman Yèsu a zhè te kokwar Jérusalem, te ngolala Pâque, ndohi kumba ta rka nrkedi man a gau, a ta co nzlembaɗ na a ndav.

²⁴ Aman Yèsu, nengaʼa a nfa gèɗ a tengaʼa ɓai. Aman nengaʼa a sen ta tèlèba.

²⁵ Ko ndo ngiɗè a nʼngra na ɓai, a sun skwi man a zhè te ndav ndo.