Jean 18 - Ma Zhiklè

Ta gshè Yèsu

¹ Aman Yèsu a nʼndeva ma haha, to do a golahi nengaʼa a wud woyam Cédron. Gi lak te pa. A to do a pa a golahi nengaʼa.

² Aman Judas ha, man a nga na ri a gèɗ Yèsu, a sun samaʼa, te man pats ngiɗè pats ngiɗè Yèsu a nda golahi nengaʼa ta ɓicada va a pa.

³ Aman Judas a mbaha ta golahi bihi ndohi mvi skwi a Zhiklè, a ndohi pharisie, a ta shkè a pa, a pitirla, a skwi ntiv vogwa, a skwi var.

⁴ Yèsu a sun skwi tèlèba, man a da ga na, a nda ta ma, a ngaɗa ta: Kin woy wa?

⁵ A ta gaɗa na: Yèsu, ndo Nazareth. Yèsu a ngaɗa ta: Na iyè! A Judas ba, man a nga na ri a gèɗ, a nzlatsa a sam tengaʼa.

⁶ Aman Yèsu a ngaɗa ta: Na iyè! to do a deɓa a deɓa a ta wush ta hai.

⁷ A Yèsu a ndzhad ta zaʼa: Kin woy wa? A ta gaɗa na: Yèsu, ndo Nazareth.

⁸ A Yèsu a mʼmbeɗa ta a ma: I gaɗa kinè, iyè, i nengaʼa! Aman kin woy iyè, va-jèke ta ndohi haha!

⁹ Aman a gi ara ma nengaʼa man a gaɗa: te va ndohi man ka payè, ko staɗ i zede ɓai.

¹⁰ Simon Pierre, kafahi gwèsh na a zhè, a mprokoɗauda, a ntsahama na zlembaɗ civèɗ ri mandai a ɓèl bi ndohi mvi skwi a Zhiklè. Nzlembaɗ ɓèl matsa Malchus.

¹¹ A Yèsu a ngaɗa na Pierre: Ciɓda kafahi gwèsh a gi na! Kokwi man Bab ga a vayè, a i siaʼa, i siaʼa azɓi ɗè?

Yèsu a sam bi ndohi mvi skwi a Zhiklè

¹² Nhèyè ndo a bi sojè a golahi ndohi Juif ta gso Yèsu, a ta dzawaʼa,

¹³ a ta daʼa nshèlèkuraʼa a sam Anne. Caiphe, baki dem na, a vi sa, bi ndohi mvi skwi a Zhiklè.

¹⁴ Nengaʼa ndo man a ngaɗa ta ndohi Juif: Dara ndo staɗ a metsi na te di man a ndohi tèlèba.

Pierre a cèkèlma a géɗ Yèsu

¹⁵ A Simon Pierre a ndzodzor Yèsu, ta a gol ngiɗè. A bi ndohi mvi skwi a Zhiklè a sun gol ngiɗè, a nengaʼa a ndo a gala bi ndohi mvi skwi a Zhiklè a nda Yèsu.

¹⁶ A Pierre a nzlatsa a dalmagai. A gol ngiɗè, man bi ndohi mvi skwi a Zhiklè a suna, a nʼndo auda, a ta goɗa a ngwoz mɓer ntamagai, te deɓaʼa a nʼnda Pierre a gai.

¹⁷ A ngwoz mɓer ntamagai, a ngaɗa na Pierre: Ka ba ka te va golahi ndo haha ka ɓi ɗè? A Pierre a ngaɗa: I a te va ɓai.

¹⁸ A sojè a ɓèlèlihi ta vatsa vogwa a vovar, mtasl a gai, a ta dzi vogwa. A Pierre ba nzlatsa a nda tengaʼa, a dzi vogwa.

Bi ndohi mvi skwi a Zhiklè a jhèɗè Yèsu

¹⁹ A bi ndohi mvi skwi a Zhiklè a ndzhoɗo Yèsu a gèɗ golahi nengaʼa, a gèɗ njè-ma nengaʼa.

²⁰ A Yèsu a ngaɗa na: I goɗ maʼa a sam di ndohi tèlèba, pèc pècèk. I senda ta te gi njèngè ma Zhiklè, te gi Zhiklè, a sam man ndohi Juif tèlèba ta ɓica va, i goɗa metsar ka ɓai. Ka dzhadyè èhèmè?

²¹ Dzhaɗ ta, man ta tsena ma man i gaɗa ta. Na haha, tengaʼa ta sun skwi man i njè ta.

²² Aman a ngoɗ ma arsa, bigol ngiɗè man nzlatsa a pa, a ntsama na bazlazlam, a ngaɗa na Yèsu: Ta mbeɗa na a ma a bi ndohi mvi skwi a Zhiklè ar haha dè?

²³ A Yèsu a mʼmbeɗa na a ma: Aman i goɗ ambaɓai, ngreday skwi ambaɓia man i goɗ mènè! Aman i goɗ zuraʼa, ka tsyè èhèmè?

²⁴ Anne, nengaʼa man a dzawaʼa, a nzlinda a sam Caiphe, bi ndohi mvi skwi a Zhiklè.

Pierre a cèkèlma a géɗ Yèsu zaʼa

²⁵ A Simon Pierre nzlatsa, a dzi vogwa. A ta gaɗa na: Ka ba ka staɗ te va golahi nengaʼa ka ɓi dè? A Pierre a ntsokol ma, a ngaɗa: I ka ɓai.

²⁶ Staɗ te va ɓèlèlihi bi ndohi mvi skwi a Zhiklè, gwoli ndo man Pierre a ntsahama na zlembaɗ, a ngaɗa: I rka ka a sam gi lak a tsagi nengaʼa ka ɓi dè?

²⁷ A Pierre a ntsokol ma zaʼa. A nasa nasa ngarah a ntsu daʼai.

Yèsu a sam Pilate

²⁸ A ta da Yèsu te gi Caiphe, a gi ngomna, a sam prèk. To do a gi kita ɓai. Ta woy a ta lizhè ndav ta ɓai, a gèɗ man ta da ndi ngolala Pâque.

²⁹ A Pilate a ndo auda a sam ta, a ngaɗa ta:

³⁰ Kin pün ndo haha a gèa mè? A ta mbeɗa na a ma: Aman ndo haha ndo ambaɓia ka ɓai, ar nga gskoɗi a kita ɗè?

³¹ A Pilate a ngaɗa ta: Vo-co ar kinè, va-gu kita nengaʼa ara ɗèlèwèr ma kita kinè a ngreda kinè! A ndohi Juif ta gaɗa na: Nga slaha a nga keɗe ndo ɓai.

³² A ngu ara ma Yèsu man a gaɗa; a ngreda mʼmetsi nengaʼa man a da metsi a gèɗèʼa.

³³ A Pilate a mdo a deɓa a gala na, a mbaha na Yèsu, a ngaɗa na: Ka bi ndohi Juif dè?

³⁴ A Yèsu a mʼmbeɗa na a ma: Ka goɗ ma haha te gèɗ ngaya dè, dè ndohi ngiɗè a ngaɗa ka a géɗ ga dè?

³⁵ A Pilate a ngaɗa na: I ndo Juif dè? Ndohi ngaya a ndohi mvi skwi a Zhiklè mbibihiaʼa ta ncka ka a kita a sam ga. Ka ga mè?

³⁶ A Yèsu a ngaɗa na: Kokwar-bi ga az tʼherkeda haha ɓai. Aman agassa kokwar-bi ga tʼherkeda haha, ar golahi ga ta gi var, aman ta viyè a kita ndohi Juif azɓai. Aman antanta kokwar-bi ga az tʼherkeda ɓai.

³⁷ A Pilate a ngaɗa na: Kos man ar haha, ka bi dè? A Yèsu a ngaɗa na: Ara ngèɗè ngaya; i bai. I shkè a herkeda, aman i gi a ndo malwuɗi ma nzuraʼa. Ndo staɗ staɗ tèlèba, man ndo nzuraʼa, a tsena daʼai ga.

³⁸ A Pilate a ngaɗa na: Ma nzuraʼa, na mè? Aman a goɗ ma haha, a ndo auda zaʼa a sam ndohi Juif, a ngaɗa ta: I ngatsa mali mʼmetsi a sam na ɓai.

Ta ngela na kita mʼmetsai a gèɗ Yèsu

³⁹ Aman ara man kin gia pèc pècèk a sam ngolala Pâque, i pra kinè ndo staɗ. Kin woy a i pra kinè bi Juif dè?

⁴⁰ A ndohi tèlèba ta boho a wuɗai: Nengaʼa ka ɓai, sèi Barabbas! Aman Barabbas ndo nked ndo.