Jean 17 - Ma Zhiklè

Ntsi ri Yèsu a gèɗ ndohi hi nengaʼa

¹ Aman Yèsu a nʼndeva ma haha, a mpu di a zhiklè, a ngaɗa: Bab ga, tiɗè sama ma! Nzala kra ngaya, aman kra ngaya ba da nzal ka!

² Ka va na wuɗi-bai a géɗ ndohi tèlèba, a skwi tèlè man ka va na, a va ta ndohi ba, a nshèffè a mèdèp ba.

³ Na haha nshèffè a mèdèp, aman ta sen ka, ka Zhiklè nzuraʼa staɗgenè, a nengaʼa man ka zlündo, Yèsu Kristi.

⁴ I nzal ka a géɗ herkeda, a i ndeva mizlinè ngaya, man ka vayè a i giaʼa.

⁵ Antanta nzalyè, Bab ga, a nʼnjèlè man i ngotso, man herkeda nʼnga di ɓai.

⁶ I ngreda ta nzlembaɗ ngaya a ndohi man ka vayè tʼherkeda. Tengaʼa a ngaya, a ka pay a iyè, a ta fu gèɗ a ma ngaya.

⁷ Antanta ta suna, skwi tèlèba man ka vayè, a shkè te ka.

⁸ Aman ma man ka vayè, i va ta ma, a ta co. Ta sun a vava, i shkè te ka, a ta co a ndav, ka, ka nzlindekayè.

⁹ I tsi ri a géɗ tengaʼa. I tsi ri a géɗ ndohi herkeda ka ɓai, aman a géɗ tengaʼa man ka payè, tengaʼa a ngaya.

¹⁰ Aman skwi ga tèlèba, skwi ngaya. Skwi ngaya, a ga ga, a nʼnjèl ga nʼngreda auda a sam tengaʼa.

¹¹ Anai iyè az tʼherkeda ɓai; aman tengaʼa ta zhè tʼherkeda. Iyè, i dè a sam ngaya. Bab ga nkezlaʼa, ɓer ta ndohi man ka payè, a nzlembaɗ ngaya, a ta gi a nstaɗ, lèmèlèmè ara nga.

¹² Aman i nza a sam tengaʼa, i ɓer ta ndohi man ka payè, a nzlembaɗ ngaya. A i war ta, ko staɗ te va tengaʼa a nze ɓai, sèi man a nzi ba, ngedassa ma, nengaʼa a nze na, ara ɗèlèwèr Zhiklè a gaɗa.

¹³ Aman antanta i dè a sam ngaya; aman ma haha i gèɗè tʼherkeda, a ndav tengaʼa da ndha a mwuffè ga.

¹⁴ A i va ta ma ngaya; a ndohi herkeda ta ga ta shèwa, te man tengaʼa ta a herkeda ka ɓai, lèmèlèmè ara iyè a herkeda ka ɓai.

¹⁵ I tsi ri azɓai, aman ka helka ta auda tʼherkeda. Aman i tsi rai, aman ka ɓer ta te ri nengaʼa man ambaɓai.

¹⁶ Tengaʼa ta a herkeda ka ɓai, lèmèlèmè ara iyè man iyè a herkeda ka ɓai.

¹⁷ Kezla ndav ta a ma nzuraʼa. Ma ngaya, ma nzuraʼa.

¹⁸ Lèmèlèmè ara man ka zlindekayè a herkeda, i zlinde ta a herkeda ba.

¹⁹ I kezla ndav ga a ri ga a gèɗ tengaʼa, aman ndav tengaʼa ba, nkezla te ma nzuraʼa.

²⁰ Aman i tsi rai a géɗ tengaʼa genè ka ɓai, aman a géɗ tengaʼa ba, man ta ciyè a ndav ta, a géɗ malwuɗi tengaʼa.

²¹ Aman ta tèlèba ta gi a nstaɗ, lèmèlèmè ara nga, ka Bab ga, te iyè, a iyè te ka, a tengaʼa ba, ta te nga; a herkeda da co a ndav na, ka nzlindekayè.

²² A nʼnjèlè man ka vo-koyè, i va ta tengaʼa, aman ta gi a nstaɗ, lèmèlèmè ara nga, nga gi a nstaɗ.

²³ Iyè te tengaʼa, ka te iyè, aman ta gi a nstaɗ, jèlèlèʼa; a herkeda da suna, ka nzlindekayè, ka woy ta a ndav ngaya, lèmèlèmè ara man ka woy iyè a ndav ngaya.

²⁴ Bab ga, i woya aman tengaʼa man ka pokoyè, ta zhè a sam ga, a ta rka nʼnjèl ga man ka vokoyè, a géɗ man ka woy iyè a ndav ngaya, aman herkeda nʼnga di ɓai.

²⁵ Bab nzuraʼa! Herkeda a sen ka ɓai; aman iyè i sen ka, a tengaʼa ba ta suna, ka nzlindekayè.

²⁶ A i ngreda ta nzlembaɗ ngaya; a i ngréɗèʼa dai. Aman mwoy-ndo ngaya man ka woy iyè a vna, da zhè a sam ta, a iyè te tengaʼa.