Jean 15 - Ma Zhiklè

Yèsu, wof barassa

¹ Iyè, wof barassa nzuraʼa. Bab ga, ndo mɓer wof barassa.

² Ri wof ga staɗ staɗ tèlèba man a yi wuda azɓai, a ngeldaussa. Staɗ staɗ tèlèba man a yi wuda, a sliɗèʼa, aman a yi wuda holholaʼa.

³ Antanta kin tila ma, a géɗ ma ga man i njè kinè. Va-nza te iyè, a i nzi te kinè.

⁴ Lèmèlèmè ara ri wof a slaha a nyi wuda a ri na azɓai, sèi man na godozlom wof, lèmèlèmè kinè ba, sèi kin nzi te iyè.

⁵ Iyè, wof barassa, kinè ri wof ga. Ndo man a nzi te iyè, a i te nengaʼa, ara wof man a yi wuda kumba. Aman kinè dra a sam ga, kin slaha a kin gi skwi ɓai.

⁶ Aman ndo a nzi te iyè ka ɓai, ta kaldaussa ara ri wof, a gwèr na, a ta ɓiceda vogwa, a vogwa a nʼndeda ma.

⁷ Aman kin nzi te iyè, a ma ga a nzi a sam kinè, skwi ko mèmè kin jhèɗèʼa, a gi a sam kinè.

⁸ Gar haha nʼnjèl Bab ga, aman nyi nshèffè kinè a zhè kumba, a kin ndi a golahi ga.

⁹ Lèmèlèmè ara Bab ga a woy iyè a ndav na, i ba i woy kinè a ndav ga. Va-nza temwoy-ndo ga!

¹⁰ Aman kin fi gèɗ a ma nkwèr ga, kin nzi te mwoy-ndo ga, lèmèlèmè ara man i fi gèɗ a ma nkwèr Bab ga, a i nzi te mwoy-ndo nengaʼa.

¹¹ Ma haha i gaɗa kinè, aman mwuffè ga a zhè a sam kinè, a mwuffè kinè a gi jèlèlèʼa.

¹² Na haha ma nkwèr man i va kinè: Va-woy va kinè, ngiɗè da woy ngiɗè, ngiɗè da woy ngiɗè a ndav na, lèmèlèmè ara man i woy kinè a ndav ga.

¹³ Sèi ndo man a vi nshèffè na a géɗ mandalahi na, ndo ngiɗè a fena mwoy-ndo nengaʼa azɓai.

¹⁴ Kinè mandalahi ga, aman kin gi skwi tèlèba man i gaɗa kinè.

¹⁵ Anai i baha kinè bèlèlihi ka ɓai. Aman ɓèlè a sun skwi man bab nengaʼa a gia ɓai. Aman i baha kinè mandalahi ga, aman skwi tèlèba man i tsena te ma Bab ga, i ngreda kinè.

¹⁶ Kinè nʼngatskayè auda ka ɓai. Aman i par kinè, a i ge kinè, aman nyi nshèffè kinè da zhè, a nyi nshèffè kinè a nzi dai, a skwi ko mèmè kin jhèɗè te ri Bab ga a nzlembaɗ ga, a da va kinè.

¹⁷ Ma nkwèr haha i va kinè: va-woy va kine, ngiɗè da woy ngiɗè, ngiɗè da woy ngiɗè a ndav na.

Ndohi man herkeda a ga ta shèwa

¹⁸ Aman ndohi herkeda ta gi shèwa a kinè, va-suna, ta gu shèwa a iyè, ga ta gi shèwa a kinè.

¹⁹ Man kinè a herkeda, ar ndohi herkeda ta woy skwi ta. Aman kinè a herkeda ka bai. I par kinè auda te va ndohi herkeda. Gar haha ndohi herkeda ta gi shèwa a kinè.

²⁰ Va-hur ma man i gaɗa kinè: Bèlè a fena bab-gi na azɓai. Aman ta parahayè, ta da paraha kinè lèmèlèmè. Aman ta cè ma ga, ta da cè ma kinè lèmèlèmè.

²¹ Aman skwi haha tèlèba, ta da ga kinè a géɗ nzlembaɗ ga, a géɗ man ta sun nengaʼa man a zlindekayè ɓai.

²² Man a matsa i shkè ɓai, a i gaɗa ta ma ga bai, ar mali ta azɓai. Aman antanta ta slaha ta nghédè mali ta azɓai.

²³ Ndo man a gi shèwa a iyè, a gi shèwa a Bab ga lèmèlèmè.

²⁴ I ga skwi a sam ta, man ndo ngiɗè a slaha a ngia ɓai. Man a matsa i da gu ɓai, ar mali ta azɓai; aman antanta ta rkaʼa, ta gi shèwa a iyè, a Bab ga lèmèlèmè.

²⁵ Aman skwi haha a gi ara man ta Windo te ma kita Zhiklè: Ta gu shèwa a iyè ambalai.

²⁶ Aman nengaʼa man a nzaka kinè a deɓa a shkè ma, nengaʼa man i woy a i zlinda kinè te Bab ga, Mè-zhèɓ nzuraʼa, man a shkè te Bab ga, a da gi malwuɗi a sam kinè a géɗ ga.

²⁷ Aman kinè ba, kin ndi a ndohi malwuɗihai, a géɗ man kin nza a sam ga te nhinkaɗ na.