Jean 10 - Ma Zhiklè

Ngèlègèɗ ma a gèɗ kuɗom tambakihai

¹ A vava, a vava, i gaɗa kinè: Ndo man a bizhè a pa a ntamagi kuɗom tambakihi azɓai, aman a bizhè a pa a sam ngiɗè, nengaʼa ndo metsar, ndo nzlinè gai.

² Aman ndo man a bizhè a pa a ntamagai, nengaʼa ndo mɓer tambakihai.

³ Ndo mɓer ntamagai a winè na, a tambakihi ta tsena daʼai nengaʼa. A nengaʼa a baha ta tambakihi a nzlembaɗ ta staɗ staɗ, a lè ta auda.

⁴ Aman a lè tambakihi nengaʼa tèlèba auda ma, a ndè a ma, a tambakihi ta jèjèrèʼa, te man ta sun daʼai nengaʼa.

⁵ Aman ndo mbrok ngiɗè ta jèjèrèʼa azɓai, a ta hi ta a pa, a géɗ man ta sun daʼai ndo mbrok ɓai.

⁶ Yèsu a ngaɗa ta ngèlègèâ ma haha. Aman ta tsena skwi man a gaɗa ta ɓai.

Yèsu ndo mɓer skwi man amba

⁷ A Yèsu a ngaɗa ta zaʼa: A vava, a vava, i gaɗa kinè: Iyè ntamagi tambakihai.

⁸ Ndohi tèlèba man ta shkè ga iyè, metsarhai, ndohi nzlinè gai, tambakihi ta tsena daʼai tengaʼa ɓai.

⁹ Iyè ntamagai. Aman ndo a bizhè a iyè, a mbél na, a dè auda, a shkè a deɓa, a ngècè skwi nʼndi na.

¹⁰ Ndo metsar a shkè sèi man a gi metsar, a gshèʼa, a kéɗèʼa. Iyè i shkè aman tambakihai ta ngècè nshèffè, a ta tèkwènè skwi azɓai.

¹¹ I ndo mɓer skwi man amba. Ndo mɓer skwi man amba a vi nshèffè na a géɗ tambakhi na.

¹² Aman ndo man ta feda a tambakhai, bab skwi ka ɓai, tambakhi nengaʼa ka ɓai. Aman a rka kokoya a shkè, a hi na, a jèka ta tambakhi a pa, a kokoya a kala ta a va, a tambakhi ta ngezl ta.

¹³ Ndo man ta feda a tambakhai, a hi na, a géɗ man nengaʼa ndo mizlinè; a hér tambakhi ara bab tambakhi ka ɓai, a ngaɗa: A ga ga a pa mè?

¹⁴ Iyè ndo mɓer skwi man amba, i sun skwi ga, a skwi ga ta senyè,

¹⁵ ara Bab ga a senyè, a i sun Bab ga. A i vi nshèffè ga a géɗ tambakhai.

¹⁶ A i ngots tambakhi ngiɗè, ta tʼhwaɗ zlazlar haha di ɓai. Tengaʼa sèi i lèka ta a haha, a ta tsena daʼai ga, a ta gi a rèwè staɗ, a ndo mɓer ta staɗgenè.

¹⁷ Gar haha Bab ga a woy iyè a ndav na, a géɗ man i vi nshèffè ga. Aman i cèʼa te deɓaʼa zaʼa.

¹⁸ Ndo ngiɗè a cè nshèffè ga azɓai; aman i via a ri ga. Wuɗi ga a zhè, aman i jèkeda; wuɗi ga a zhè, aman i cè a deɓa. Ma nkwèr haha i ngotso a sam Bab ga.

¹⁹ A ndohi Juif ta kezla te va a géɗ ma nengaʼa.

²⁰ Ta kumba te va tengaʼa ta gaɗa: Madzagi a ga na, a nʼnde na a ndo madzagi ma; kin cinè ma nengaʼa èhèmè?

²¹ Ndohi ngiɗè ta gaɗa: Ma haha, ma ndo madzagi ka ɓai. Madzagi a slaha a mwinè di ndo mandazli dè?

Ndohi Juif ta kwola Yèsu

²² Ta gu ngolala te kokwar Jérusalem a ngwar.

²³ A Yèsu a nsawala te gi Zhiklè, te gi Salomon.

²⁴ A ndohi Juif ta tèuda Yèsu a pa, a ta gaɗa na: Ka pa nga géɗ cèw tè ngèmè? Man ka Kristi, ngreda nga!

²⁵ A Yèsu a ngaɗa ta: I gaɗa kinè, a kin cè a ndav azɓi genè. Mizlinè man i gi a nzlembaɗ Bab ga a gi malwuɗi ga a sam kinè.

²⁶ Aman kin ca a ndav ɓai, te man kinè te va tambakhi ga ɓai, ara man i gaɗa kinè.

²⁷ Tambakhi ga ta tsena daʼai ga, a i sen ta, a ta dzadzarkayè,

²⁸ a i va ta nshèffè a mèdèp, ta zi azɓai a mèdèp, ndo azɓai man a ngezl ta te ri ga.

²⁹ Bab ga man a mpe ta a ri a iyè, a fena skwi ngiɗè tèlèba. Ndo a slaha man a ngezl ta te ri Bab ga azɓai.

³⁰ Nga a Bab ga, nga staɗgenè.

³¹ A ndohi Juif ta porko kwa zaʼa, aman ta kèlèʼa.

³² A Yèsu a ngaɗa ta: I ngreda kinè skwi man Bab ga a gia kumba. Kin kalyè a kwa a géɗ mè?

³³ A ndohi Juif ta gaɗa na: Nga kal ka a géɗ skwi man amba man ka gia ka ɓai, aman a géɗ man ka derde Zhiklè. A géɗ man ka, ndo ambalai, ka fi va ngaya a Zhiklè.

³⁴ A Yèsu a ngaɗa ta: Te ma kita kinè, ta Windo ɓi dè: I gaɗa kinè, kinè zhiklèhai.

³⁵ Tengaʼa man a baha ta zhiklèhai, a géɗ man ma Zhiklè a ngoɗa. Ma ɗèlèwèr Zhiklè a cèkèlma azɓai.

³⁶ A kin gaɗa na ndo man Zhiklè a nkezlaʼa, man a zlündkoda a herkeda: Ka derde Zhiklè! A géɗ man i gaɗa: I kra Zhiklè.

³⁷ Aman i gi mizlinè Bab ga azɓai, kin ciyè a ndav ɓai!

³⁸ Aman i gi mizlinè Bab ga, a kin woy a kin ciyè a ndav ɓai, vo-co mizlinè a ndav mènè, a kin da suna, a kin cè a ndav kinè, Bab ga a zhè te iyè, a iyè, i zhè te Bab ga.

³⁹ A ta woy maya zaʼa, aman ta gshèʼa. Aman nengaʼa a mbel na te ri ta.

⁴⁰ A ndo a deɓa a wud woyam Jourdain, a sam man Jean a gu baptême halaʼa, a nʼnza a pa.

⁴¹ Ndohi kumba ta shkè a sam na, a ta gaɗa: Jean a nʼnga nrkedi ar haha ɓai. Aman ma tèlèba man Jean a goɗ a géɗ ndo haha, a ngoɗ zuraʼa a vava.

⁴² A ndohi kumba te pa ta co a ndav ta.