Jacques 5 - Ma Zhiklè

Ndo mèshèlè da gu maya!

¹ Na haha, kinè ndohi mèshèlè, va-kuɗau, vo-ngoy va a géɗ skwi mwuɗitpa man a da shkè a géɗ kinè!

² Skwi mèshèlè kinè ngedas na, nfafar a nʼndeda maslaka kinè ma.

³ Hezi a mpeɗda guro a verzhègenè kinè a ma; a hezi sa a gi a skwi malwuɗi a sam kinè, a da ndi zluèɗ va kinè ara vogwa. Na haha, patshi ta woy a ta ndiv ta; a da gi lèmèlèmè a sam skwi mèshèlè man kin ɓiceda a sam kinè.

⁴ Na haha, ndohi ntsi dau, man kin va ta skwi ntul ta ɓai, ta kuɗi a géɗ kinè, a kuɗ tengaʼa a tsena na a zlembaɗ a Bi Zhiklè.

⁵ Kin wol va a géɗ herkeda, a kin ngots mwuffè kinè, a hwaɗ kinè nʼngeza a pats mbèzl marai.

⁶ Kin fa na mali a gèɗ ndo nzuraʼa, a kin keɗaʼa, a nengaʼa a nsala va a sam kinè ɓai.

Nzhèr skwi a ma ma, a ntsi rai

⁷ Gar haha vo-zhor skwi a ma ma, dalahimam ga, ha pats man Bai Yèsu a shkè. Na haha, ndo mpizhè a zhèrèʼa, aman herkeda a cko nyi mbelaʼa auda, a zhèrè a ma ma, aman a ngècè iyam nzlekai, a iyam ngrè skwai.

⁸ Kinè ba, vo-zhor skwi a ma ma, va-nzala ndav kinè, aman Bai Yèsu a shkè ndul ndul.

⁹ Ndav kinè da sakat na a géɗ ngiɗè, a géɗ ngiɗè ɓai, dalahimam ga, man ɓai kin dè kèlè a kita. Na haha, ndo kita a zhè a ntamagai.

¹⁰ Dalahimam ga, va-lèmdè va kinè a matakwan, a nzhèr skwi a ma ma man a ndohi nhadka ma, man ta goɗ ma a nzlembaɗ Bai Yèsu.

¹¹ Na haha, nga gaɗa, mwuffè a sam tengaʼa man ta zhèr skwi a ma ma. Kin tsenaʼa, ara man Job a zhor skwi a ma ma, a kin rka ndikèma man Bi-Zhiklè a mva na. Aman ndo a si Bi Zhiklè te va; a pa na a pa ndav a ndo.

¹² Aman a géɗ skwi tèlè, dalahimam ga, kin mbaɗ ɓai, a giɗfèk ba, a herkeda ba, a ma mʼmbèɗè ngiɗè ba. Aman ma halau kinè da gu halau, ma aʼai kinè da gu aʼai, aman kita a gs kinè azɓai.

¹³ Ndo te ndev kinè, man matakwan a ga na, da tsu rai. Ndo man ndav nengaʼa langlangaʼa, da slu dimèsh nslébèrdè Zhiklè.

¹⁴ Ndo man skwa a dza na, da baha ta ndohi mɓer ndohi Zhiklè, aman ta tsi ri a Zhiklè a géɗ nengaʼa, a ta faɗaha mbar a nzlembaɗ Bi Zhiklè.

¹⁵ A ntsi ri te ncè-a-ndav a di a mbela ndo matakwan, a Bi Zhiklè a slambaɗda te matakwan. Aman a ngu malai, mali nengaʼa a da prè.

¹⁶ Va-ngreda mali kinè, ngiɗè a ngiɗè, va-tsu ri a Zhiklè, ngiɗè a géɗ ngiɗè, aman kin mbél kinè te matakwan. Ntsi ri ndo nzuraʼa, man a tsi a ndav tèlè, a slaha skwi kumba.

¹⁷ Elie ndo lèmèlèmè ara nga. A nengaʼa a ntsu ri mbuh-mbuhaʼa aman iyam a gi asaɓai, a iyam a mshkè ɓai a herkeda mvi makar a ki mokwa.

¹⁸ A ntsu ri a vaʼa, a giɗfèk a ngoko iyam, a herkeda a nftsko skwi auda.

¹⁹ Dalahimam ga, aman ndo ngiɗè te ndev kinè a njèkeda civèɗ nzuraʼa, a ndo ngiɗè a nckoɗa deɓa,

²⁰ da suna, ndo man a nckoɗa ndo mali a deɓa te civèɗ man a zlak na, a mʼmbela mèzhèɓ ndo matsa te mʼmetsai, a mpizleda mali a pa kumba.