Jacques 4 - Ma Zhiklè

Ngi mandala a herkeda

¹ Mbezl va a var te ndev kinè ta shkè te mè? Te ntétékè kinè, man ta bèzl va te va kinè ka ɓi ɗè?

² Kin tétékè skwai aman kin ngatsa ɓai. Kin kéɗ ndo, kin gi srak; aman kin ngatsa skwi man kin woya ɓai, kin bèzl va, a kin gi var. Kin ngècè azɓai, te man kin dzhaɗa ɓai.

³ Kin jhèɗèʼa, a kin ngècè skwi azɓai, te man kin dzhaɗda a di na ka ɓai, a géɗ ntétékè kinè.

⁴ Kinè ndohi mphömè, kin sun ɓi ɗè, ndo man a gi mandala a herkeda, a gi a mayam Zhiklè. Ndo man a woya a gi mandala a herkeda, nengaʼa a ndi a ndo mayam Zhiklè.

⁵ Kin huro, ɗèlèwèr Zhiklè a goɗ ambali ɗè: Mèzhèɓ Zhiklè man a nzi a ndav nga a gi srak?

⁶ Aman pombi man a va nga, mbiaʼa holholaʼa genè. Ɗèlèwèr Zhiklè a gaɗa: Zhiklè a sassaya ndav a sam ndohi nfi va, aman a va ta pombai a ndohi mʼmanda gèɗ ta a hai.

⁷ Gar haha va-fa na gèɗ a Zhiklè. Va-sala va a sam madzagai, a nengaʼa a hi na auda a sam kinè.

⁸ Va-herda na va a Zhiklè, a nengaʼa a di a herdeka kinè va. Va-pana ri kinè, kinè ndohi malai, va-tila ndav kinè, kin ndohi nʼngwèdè ndo!

⁹ Va-hur mali kinè, va-loyo, va-kuɗau! Nʼngwèshè kinè da ngwode na a kuɗa; mwuffe kinè da ngwode na a nlèyè.

¹⁰ Va-manda gèɗ kinè a hai a sam di Bi Zhiklè, a nengaʼa a di a slambaɗda kinè gèɗ.

Ntsi derngasl a géɗ kramama

¹¹ Kin tsu derngasl a va kinè ɓai, dalahimam ga! Ndo man a tsi derngasl a géɗ kramam nengaʼa, man ɓai a bèzlè mali a gèɗ kramam na, a tsi derngasl a géɗ ma kita Zhiklè, a bèzlè mali a géɗ ma kita Zhiklè. Aman ka ndo mbèzl mali a gèɗ ma kita Zhiklè, ar ka fi gèɗèʼa azɓai, aman ka ndo kita na.

¹² Ndo mvi kita, a ndo mbèzl kita, staɗgenè. Nengaʼa a slaha a mʼmbelaʼa, a mphomdaʼa, cèw ba. Ka wa man kal woy a ka fa na mali a gèɗ a kramam ngaya?

Kin fu va dai a géɗ mangoslèm

¹³ Anai, kinè man kin gaɗa: Gar a patsna, gar angoslèm, nga woya man nga dè a kokwar sa, a kokwar sa, a nga da nzi te pa mvi staɗ, a nga da gi ganai aman nga ngècè sulai;

¹⁴ a kin sun skwi man a da shkè angoslèm ɓai. Nshèffè kinè mè? Nara vodzok man a ɗüzhè, te deɓaʼa a ndev na.

¹⁵ Aman sèi kin gaɗa: Ara man Bi Zhiklè a woyaʼa, a nga nzi a nshèffè dai, nga da gi skwi sa, a skwi sa.

¹⁶ Aman antanta kin jégèr va a kin fi va. Nfi va arsa tèlèba ambaɓai.

¹⁷ Aman anai ndo man a sun skwi man amba, a giaʼa azɓai, a gi malai.