I Samuel 9 - Ma Zhiklè

Saul a hèsh kɗèhi bab na

¹ Ndo ngiɗè a zhè te kokwar Benjamin, nzlembaɗ na Kis, kra Abiel, kra Tseror, kra Becorath, kra Aphiach, te verzi Benjamin. Nengaʼa ndo mbiaʼa.

² Kra nengaʼa a zhè, nzlembaɗ na Saul, gol ndaɓaraʼa, man amba. Te va ndohi Israel ndo mbelaʼa gar nengaʼa azɓai, ngurè nengaʼa a ndohi tèlè.

³ Mam kɗèhi Kis, bab Saul, ta ze ta. Kis a ngaɗa na Saul, kra na: Vo-do a ndo ntakaha ka staɗ, a kin woy mam kɗèhihai.

⁴ A ta bozlo ndev za Ephraim, a to do a ndev kokwar Shalisha. Aman ta ngats ta ɓai. To do a ndev Shaalim. Ta azɓai. To do a ndev kokwar Benjamin. Ta azɓai.

⁵ Aman ta shkè a kokwar Tsuph, Saul a ngaɗa na ndo ntakaha man a zhè a sam na: Ngo-do a deɓa a ngwai, man ɓai bab ga a da kuɗi a géɗ nga holholaʼa, a fena a géɗ kdèhihai.

⁶ Aman nengaʼa a ngaɗa na: Te kokwar sa, ndo Zhiklè a zhè, ndo mbiaʼa a sam ndohai. Ma nengaʼa a fshèwè azɓai, ko staɗ. Ngo-do a pa! Wa ngiɗè ba a da ngra nga civèɗèʼa.

⁷ Saul a ngaɗa na ndo ntakaha: Aman ngo do do a pa, kos nga da va na mè? Movar nga te gozhèm klèng, skwi ngiɗè man nga da ga na mbali a ndo Zhiklè a vna, asaɓai. Nzhè mè?

⁸ Ndo ntakaha a ngaɗa na Saul a vaʼa: Suli kètè te ri ga. Va na ndo Zhiklè, da ngatsa nga maya a civèɗ nga.

⁹ Zlèzlèa man ndohi Israel to do a tajhèdè Zhiklè, ta gaɗa: Vo-washke, ngo-dokoy a sam ndo nsun skwai! Ndohi man antanta ta baha ta ndohi nhadka ma, zlèzlèa ta baha ta ndohi nsun skwai.

¹⁰ Saul a ngaɗa na ndo ntakaha: Ka goɗ amba. Washkè, ngo-do! A to do a kokwar a sam man ndo Zhiklè a nza a pa.

¹¹ Aman ta tivè a kokwar, ta zli gèɗ a dalahai, man ta shkèhai a ta ɓèl iyam. Ta gaɗa ta: Ndo nsun skwai a zhi dè?

¹² Ta mbeɗa ta a ma: Halau, na zhè a ma kinè. A mshkè a kokwar haha antanta; a patsna ndohi ta gi ngolala mvi skwi a Zhiklè a gèɗ za.

¹³ Aman kin dè a kokwar, kin da ngècè dai, ga a dè a géɗ za a ndi skwai. Ndohi ngiɗè ta tèr skwi nʼndi azɓai, sèi nengaʼa a zhè. Nengaʼa a pshè ma skwi man ta va na Zhiklè; te deɓaʼa ndohi ngolala ta ndi skwi nʼndai. Gar haha vo-do, kin ngècè antanta.

¹⁴ A to do a kokwar. Aman ta ndikè a ntamagi kokwar, Samuel a nshkè auda te pa, a woya a ndè a géɗ za.

Samuel – Saul

¹⁵ Ga Saul a nshkè, Ndo nzi pèc pècèk a ngaɗa na Samuel:

¹⁶ Angoslèm, aranta, i da zlinda ndo ngiɗè te kokwar Benjamin a sam ngaya. Ka da faɗa na mbar a gèɗ, a gi bai a géɗ ndohi Israel. Nengaʼa a da mbel ta ndohi ga te ri ndohi Philistie. I rka nlèyè matakwan ndohi ga, a i tsena kuɗ tengaʼa. Samuel a mʼmana staɗ, ga Saul a mshkè.

¹⁷ Tsam tsam aman Samuel a nrka Saul, Ndo nzi pèc pècèk a ngaɗa na: Nengaʼa ndo man i gaɗa ka: Da gu a bi ndohi ga.

¹⁸ Saul a nherda na va a Samuel a ntamagi kokwar, a ngaɗa: Ngrayè, gi ndo nsun skwai, tema?

¹⁹ Samuel a ngaɗa na Saul: Iyè, ndo nsun skwai. Do za a ma ga. A patsna sèi kin ndi skwi a nda nga. Angoslèm i woy a i va ka civèɗ a ka dè a ma, a i da gaɗa ka a géɗ skwi tèlè man ndav ngaya a hérèʼa.

²⁰ Ka hur a géɗ kɗèhi man ta ze ta mʼmèn makar ma, ka hur a géɗ tengaʼa ɓai! Ta ngats ta ma. Skwi mbelaʼa te Israel tèlèba, a kinè a bab ngaya.

²¹ Saul a mʼmbeɗa na a ma: I ndo Benjamin genè, te verzi Israel ntabawaʼa. Verzi ga az a vata ɓai, nkèshèa te va ndohi Benjamin tèlèba. Ka gadkayè ar haha èhèmè?

²² Samuel a nco Saul a nda ndo ntakaha, a nde ta a gala, a mpe ta a sam nʼnzi mbelaʼa man a ma, a ndev ndohi ngolala. Ta gi 30.

²³ Samuel a ngaɗa na ndo nti dai: Vakay difi man i va ka staɗ, te skwi man i gaɗa ka: Pedahai!

²⁴ Ndo nti ɗaf a nckoɗi fiyaʼa, a mva na a tsagi Saul, a ngaɗa: Na haha i va ka njèkèdi skwai a tsagi ngaya. Nga fedahi te di man a ngaya, a ka ndi a nda ndohi ngolala. A pats nasa Saul a nʼndau skwai a nda Samuel.

²⁵ Aman ta shkèhi te za a to do a kokwar, ta tila na sam mʼmènè a Saul a géɗ gai.

²⁶ A Saul a mʼmanahai. A prèk, sam mɓeng-mɓengaʼa, Samuel a mbaha na Saul a géɗ gai: Slambaɗa! I feda ka ma. A Saul a nslambaɗa, a to do auda cèw ba.

²⁷ Aman ta shkè a ma kokwar, Samuel a ngaɗa na Saul: Gaɗa na ndo ntakaha ka, do do a ma. Ka, ka zlècè a haha, a i ngra ka skwi man Zhiklè a goɗo.