I Samuel 7 - Ma Zhiklè

¹ A ndohi Kirjath-Jearim ta shkè a ta da koti Ndo nzi pèc pècèk a deɓa, a ta feda a gi Abinadab, a gèɗ za. A ta co Eléazar, kra nengaʼa, a ta faʼa a ndo nwèr koti Ndo nzi pèc pècèk.

Samuel a gi kita fe Israel

² Koti Zhiklè a nʼnza te kokwar Kirjath-Jearim kumba, a gi mvi 20; te deɓaʼa ndohi Israel tèlèba ta kuɗi a sam Ndo nzi pèc pècèk.

³ Samuel a ngaɗa ta ndohi Israel tèlèba: Aman kin menkada deɓa a sam Ndo nzi pèc pècèk a ndav tèlè, va-hulkoɗi zhiklèhi ngiɗè auda a sam kinè, a Astartéhai. Va-tila ndav kinè a sam Ndo nzi pèc pècèk, a kin tsu ri a nengaʼa stadgenè, aman a mbel kinè te ri ndohi Philistie.

⁴ A ndohi Israel ta hulkoɗi Baalhai a Astartéhi auda a sam ta, a ta tsu ri a Ndo nzi pèc pècèk stadgenè.

⁵ Samuel a ngaɗa: Va-ɓic ta ndohi Israel tèlèba te kokwar Mitspa! I woy a i tsi ri a Ndo nzi pèc pècèk a gèɗ kinè.

⁶ A ta ɓica va te kokwar Mitspa, ta gudz iyam, a ta badahai a sam Ndo nzi pèc pècèk, a ta jèkeda skwi nʼndai a pats nasa, a ta gaɗa: Nga gu malai a sam Ndo nzi pèc pècèk. A Samuel a nʼnga ta kita a ndohi Israel te kokwar Mitspa.

⁷ Aman ndohi Philistie ta tsenaʼa, ndohi Israel ta ɓica va te kokwar Mitspa, bihi ndohi Philistie to do aman ta gi var a ndohi Israel. Aman ndohi Israel ta tsenaʼa, ta gu zlau ndohi Philistie,

⁸ a ta gaɗa na Samuel: Ka jèkeda ɓai, tsu ri a Ndo nzi pèc pècèk, Zhiklè nga, a ka kuɗu a sam nengaʼa, aman a mbel nga te ri ndohi Philistie!

⁹ A Samuel a nco kra tambak staɗ, a nʼndara na a Ndo nzi pèc pècèk. A ntsu rai, a nkudi a sam Ndo nzi pèc pècèk a gèɗ Israel, a Ndo nzi pècpècèk a ntsena ntsi ri nengaʼa.

¹⁰ A pats nasa, aman Samuel a ndara na skwi a Zhiklè, ndohi Philistie ta herdeka ta va ma aman ta gi var a Israel; Ndo nzi pèc pècèk a gu a iyam a tsi a vata, a mpa ta zlau a gèɗ a ndohi Philistie, a ndohi Israel ta dzam ta.

¹¹ Ndohi Israel ta slambaɗa te Mitspa, a ta hu a verzi ndohi Philistie, a ta bazl ta, ha ndè a kokwar Beth-Car.

¹² Samuel a nco kwa, a nzlatseda te ndev Mitspa a Shen, a mbaha na Eben-Ezer, a gaɗa: Ndo nzi pèc pècèk a ntakaha nga ha nshkè ma mpatsna.

¹³ Aranta Zhiklè a mʼmanda ta gèɗ a hi a ndohi Philistie, a ta shkè a deɓa a kokwar Israel asaɓai. Ndo nzi pèc pècèk a nʼnga ta matakwan a ndohi Philistie, te va man Samuel a zhè a nshèffè.

¹⁴ Kokwar man ndohi Philistie ta co te ri ndohi Israel, ndohi Israel ta co skwi ta a deɓa, a hinè te kokwar Gath, ha ndè a kokwar Ekron. Ndohi Israel ta nguzlkoɗi kokwar tengaʼa a deɓa te ri ndohi Philistie. Te deɓaʼa gumi a zhè te ndev ndohi Israel a ndohi Amor.

¹⁵ Samuel, ndo kita Israel, ha a mʼmets na.

¹⁶ A mvi a mvai a shèwèlè a kokwar Bèthel, Guilgal, Mitspa, a nʼnga ta kita a ndohi Israel te kokwar haha tè-lèba.

¹⁷ Te deɓaʼa a mʼmen na a deɓa a kokwar Rama, man gi nengaʼa te pa, a nʼnga ta kita a ndohi Israel te pa. Te pa a nrama na sam mvi skwi a Ndo nzi pèc pècèk.