I Samuel 6 - Ma Zhiklè

Ndohi Philistie ta zlinda koti Zhiklè a deɓa

¹ Koti Ndo nzi pèc pècèk a nʼnza te kokwar ndohi Philistie ki tsaraɗ.

² A ndohi Philistie ta baha ta ndohi mʼmbèh skwai a ndohi mpi kwa tengaʼa a ta gaɗa: Nga da ga na koti Ndo nzi pèc pècèk kè? Va-ngreda nga, nga gi maya mè, a nga menda ta a deɓa a ngwai.

³ Ta gaɗa: Aman kin woy a kin zlinde koti Zhiklè Israel a deɓa, kin zlinda ambali ɓai. Vapela na gèɗ a verzai! Te deɓaʼa kin da mbel kinè te matakwan, a kin shinèʼa, èhèmè kita Zhiklè a zhè a gèɗ kinè dai.

⁴ Ta gaɗa: Nga pil gèɗ a verziaʼa a mè? Ta mbeda ta a ma: Skwi nlèmdè a mblè zlam, nʼngaʼa a guro, a koʼom guro zlam, nara nʼngér bihi Philistie. Aman matakwan lèmèlèmè a ga kinè a bihi kinè.

⁵ A géɗ nengaʼa va-gau skwi nlèmdè a mblè kinè, a skwi nlèmdè a koʼom kinè, man ta gedassa kokwar. Va-nzala Zhiklè Israel; gar a da cè kinè kita nengaʼa mwuɗitpa auda a gèɗ, a géɗ zhiklèhi kinè, a géɗ kokwar kinè.

⁶ Kin woy a kin sassaya ndav kinè èhèmè, ara man ndohi Egypte a Pharaon ta sassaya ndav ta? Aman a nga ta matakwan, ta pre ta ndohi Israel ɓi dè?

⁷ Gar haha va-gau kikai mɓuaʼa, va-hul mam zlèhi cèw, man ta va ta wof a daʼai di ɓai, a kin mana ta kikai a verzai. Aman wud zlèhai, kin dzam ta a ngwai.

⁸ Te deɓaʼa vo-co koti Ndo nzi pèc pècèk, a kin feda a kikai. Skwi guro man kin pela na gèɗ a verziaʼa va-feda a koti nkèshèa, a tsagai, a kin menda a deɓa.

⁹ Aman va-wora: Aman a dè, a gshè civèɗ Beth-Shémesh, nga suna, Ndo nzi pèc pècèk, nengaʼa man a ga nga matakwan mbiaʼa haha. Man ɓai, nga suna, skwi ntse nga, Zhiklè a ngu ka ɓai, skwi nʼnga nga, a ga nga kata genè.

¹⁰ Ndohi ta gau arsa, a ta hul mam zlèhi cèw a ta mana ta kikai, a verzai. Wuda ta, ta jèke ta a ngwai.

¹¹ Te deɓaʼa ta feda koti Ndo nzi pèc pècèk a kikai, a koti nkè-shèa man koʼom guro a skwi nlèmdè a mblè tengaʼa a pa.

¹² A zlèhi to do a ma zuraʼa, a ta gso civèɗ Beth-Shémesh. To do a civèɗ sa, a ta kuɗi lèk lèk, a ta dzara ma ɓai. Bihi Philistie ta dzodzora, a ma kuma Beth-Shémesh.

¹³ Ndohi Philistie ta tsi dau a vara. Aman ta ced gèɗ a zhiklè, a ta rka koti Zhiklè, ta haka na ma a mwuffè.

¹⁴ A kikai a ndikè a sam gi dau Josué, ngur Beth-Shémesh ngiɗè, a nzlatsa a pa, a sam kwa mbiaʼa. A ta ngela wof kikai, a ta hul zlèhai, a ta ndara na Ndo nzi pèc pècèk.

¹⁵ A ndohi Lévi ta ckoɗi koti Ndo nzi pèc pècèk a hai, a koti nkèshèa man skwi guro te pa a tsagai, a ta fa na a gèɗ a kwa mbiaʼa. A ndohi Beth-Shémesh ta zla na skwi a Ndo nzi pèc pècèk, a ta ndara na skwi a Ndo nzi pèc pècèk a pats sa.

¹⁶ Aman bihi Philistie zlam ta rkaʼa, a pats nasa ta men ta a deɓa a kokwar Ekron.

¹⁷ Na haha skwi nlèmdè mblè guro man Philistie a va na Ndo nzi pèc pècèk a skwi mpil gèɗ: staɗ a gèɗ Asdod, staɗ a gèɗ Gaza, staɗ a gèɗ Askalon, staɗ a gèɗ Gath, staɗ a gèɗ Ekron.

¹⁸ A koʼom guro ara nʼngér kokwar bihi Philistie zlam tè-lèba, kokwar mbiaʼa a kokwar nkèshèa ba. Ha patsna, kwa mbiaʼa man ta fa na koti Ndo nzi pèc pècèk a gèɗ, a gi malwudai te gi dau Josué te Beth-Shémesh.

¹⁹ Aman ndohi Beth-Shémesh ta shkè a ta pa na di a koti Ndo nzi pèc pècèk, nengaʼa a mbazl ta 70 te va ndohi Beth-Shémesh. A ndohi ta kuɗ ta, a gèɗ man Ndo nzi pèc pècèk a mbazl ta kumba aranta.

²⁰ Ndohi Beth-Shémesh ta gaɗa: Nslaha a nzlècè a sam Ndo nzi pèc pècèk, Zhiklè nkezlaʼa haha wa? Da da koti haha a ma? A ndè auda a sam nga.

²¹ A ta zlinde ta ndohi sak a sam ndohi Kirjath-Jearim, a ta gaɗa ta: Ndohi Philistie ta cko koti Ndo nzi pèc pècèk a deɓa: vo-washkè, va-ceda a deɓa a sam kinè!