I Samuel 5 - Ma Zhiklè

Koti nderzlè-ma Zhiklè a faha ta matakwan

¹ Aman ndohi Philistie ta ceda koti Zhiklè a ma, ta ckoɗa deɓa te Eben-Ezer, a ta daʼa a Asdod.

² Ta co koti Zhiklè a ta daʼa a gi Dagon, zhiklè mbèh skwi ta, a ta Zlatseda a tsagi Dagon.

³ Te man-goslèmaʼa a prèk, aman ndohi Asdod ta shkè a gi Dagon, na haha ta rka Dagon, a ntuzlom na hai a herkeda, a ma koti Zhiklè. A ta Zlatseda Dagon, a ta feda a deɓa a sam nʼnzi na.

⁴ Te mangoslèmaʼa a prèk, na haha Dagon a ntuzlom na hi a herkeda a ma koti Zhiklè. Gèd Dagon, a ri na cèw, mpasl na, ta a ntamagai, njèkè gwoli va nengaʼa genè.

⁵ A géɗ nengaʼa ndohi mʼmbèh skwi a Dagon, a ndohi tè-lèba man ta dè a gi Dagon, ta mbècè a ntamagi Dagon azɓai, ta tèwèɗè ntèwèɗè ha patsna.

⁶ Zhiklè a nʼnga ta kita mwuɗitpa a gèɗ a ndohi Asdod, a ndzakaɓama ta gèɗ, a mfaha ta matakwan, mblè a nkala ta va a kokwar Asdod a samaʼa tèlèba.

⁷ Aman ndohi Asdod ta rka skwi man a gau, ta gaɗa: Koti Zhiklè Israel da nza a sam nga asaɓai! Kita nengaʼa mwuɗitpa a géɗ nga, a géɗ Dagon, Zhiklè nga, ba.

⁸ A ta baha ta bihi Philistie tèlèba a ta ɓic ta a sam ta, a ta gaɗa: Nga da ga na koti Zhiklè Israel kè? A ta mbeda ta a ma: Koti Zhiklè sèi da daʼa a kokwar Gath. A ta da koti Zhiklè Israel a pa.

⁹ Aman ta da a ma, Zhiklè a ndzakaɓama ta gèɗ a ndohi kokwaraʼa holholaʼa. A mfaha ta matakwan a ndohi kokwar tèlèba, a ndohi nkèshèʼa a ndohi mbibihiaʼa, a nʼnga ta mblè a va.

¹⁰ Te deɓaʼa ta da koti Zhiklè a kokwar Ekron. Aman koti Zhiklè a mshkè a kokwar Ekron ma, ndohi Ekron ta kuɗai: Ta ckoɗi koti Zhiklè a sam nga, ta woy a ta bazl nga a ndohi nga tèlèba a vna!

¹¹ A ta baha ta bihi Philistie tèlèba, a ta ɓic ta, a ta gaɗa: Va-zlinda koti Zhiklè a deɓa a ngwai, da bazl nga a ndohi nga asaɓai! Zlau a mbazl ta ndohi kokwar a vèvèɗ. Zhiklè a nʼnga ta matakwan mwuɗitpa.

¹² Aman ndohi man ta bazla ɓai, ta ngots mblè a va lèmèlèmè, a wobau tengaʼa a cinè a zhiklè.