I Samuel 4 - Ma Zhiklè

Ndohi Philistie ta ceda koti nderzlè-ma a ma

¹ A pats nasa ndohi Philistie ta ɓicko va a ta gi var a ndohi Israel. A ndohi Israel ta gau aman ta zli gèɗ a dal var, a ta haya va ndul ndul a ma Eben-Ezer. Ndohi Philistie ta haya va te Aphek.

² Ndohi Philistie ta ɗaha va zuraʼa a ndohi Israel. Ta bazl ta ndohi Israel a dal var, 4.000.

³ Aman ndohi Israel ta shkè a deɓa a sam nhèyè-va, ndohi Israel nhalahiaʼa ta gaɗa: Ndo nzi pèc pècèk a ngu ar haha, aman ndohi Philistie ta fen nga a patsna, èhèmè? Nga da ckoɗi koti nderzlè-ma Zhiklè nga te Silo di kla! A nengaʼa da nza a ndev nga, a da mbel nga auda te ri ndohi mayamhi nga.

⁴ A ndohi tazlündo ndo a Silo, a ta ckoɗi koti nderzlè-ma Ndo nzi pèc pècèk, Zhiklè bi wuɗai, man a nzi te ndev chérubimhai. Hophni a Phinées, wudahi Eli cèw, ta dzodzor koti nderzlè-ma.

⁵ Aman koti nderzlè-ma a mshkè a sam nhèyè va ndo, ndohi Israel tèlèba ta hèzlèwè a ta wuffè, a herkeda a gi ngumaʼa a mwuffè ndohai.

⁶ Aman ndohi Philistie ta tsena mwuffè mbiaʼa, ta gaɗa: Mwuffè ndohi Hebreu a sam nhèyè va tengaʼa, mwuffè mè? Aman ta tsenaʼa, koti nderzlè-ma a mshkè a sam nhèyè va tengaʼa,

⁷ ta gi zlau, ta huro: Ndo nzi pèc pècèk a mshkè a sam ta a sam nhèyè va tengaʼa. Ta gaɗa: Woba nga! Skwi ar haha nʼnga di ɓai.

⁸ Woba nga! Nʼnda mbel nga te ri zhiklèhi man wuɗi ta a zhè a haha wa? Zhiklè sa man ta ga ta skwi mwuɗitpa tsaɗ tsaɗ a ndohi kokwar Egypte, a mfaha ta gidiɓèr.

⁹ Anai, ndohi Philistie, va-sassaya di kinè, va-nza ara ngurhai, a kin nda a ɓel ndohi Israel ɓai, ara man tengaʼa pats ngiɗè ɓèlèlihi kinè. Va-nza ara ngurhai, va-gu var!

¹⁰ A ndohi Philistie ta gu var, a ta dzam ta ndohi Israel. Staɗ staɗ tèlèba, ngiɗè a hi a gi na, ngiɗè a hi a gi na. A ta tsa ta sabi mbiaʼa a gèɗ: a ndohi Israel, ndohi sak, ta bazl ta 30.000.

¹¹ Ndohi Philistie ta ceda koti nderzlè-ma a ma, a Hophni a Phinées, wudahi Eli cèw ta bazl ta.

Mʼmetsi Eli a wudahi nengaʼa

¹² Ndo Benjamin ngiɗè a njèkeda dal var, a mhu na a Silo a pats sa, a maslaka nkuratsa a va, a herkeda te gèɗ.

¹³ Aman a mshkè, Eli a nʼnza a sam nʼnzi na a ntamagi kokwar, a nzurɗo di a civèɗ. A gi zlau a gèɗ koti nderzlè-ma. Aman masli sa a mshkè, a nʼngreda ta ndohi kokwar, te kokwar tèlèba ta tsi lalau.

¹⁴ Aman Eli a ntsena lalauaʼa, a jhèɗèʼa: Wobau mbiaʼa haha èhèmè? Masli sa a nhakaɗa sam na, a nʼngreda na Eli.

¹⁵ Mvi Eli 98, a rka di asaɓai.

¹⁶ Aman ndo sak a ngaɗa na Eli: Iyè, man i shkè te dal var, a i hakaɗi te dal var. Eli a ndzhoɗo: Kra ga, nʼnga mè?

¹⁷ Ndo sak a mʼmbeɗa na a ma: Ndohi Israel ta hu ta a ndohi Philistie. Ndohi kumba ta bazl ta a tsakwal, a Hophni a Phinées, wudahi ngaya cèw ba, ta bazl ta, a koti nderzlè-ma ta cedama.

¹⁸ Aman a nslefu koti nderzlè-ma, Eli a ntangal na a deɓa a sam nʼnzi na, a mpasl na te daʼai, a mʼmets na. Aman nengaʼa nhala kumba, ndo ndazlaʼa. Eli a ngau kita ndohi Israel mvi 40.

¹⁹ Ngwoz Phinées, kra na, na hwaɗ dèbè-dèbèʼa. Aman a ntsena labar maʼa, aman ta ceda koti nderzlè-ma a ma, a babaki nengaʼa a babaki nengaʼa ta bazl ta, a nkalahai, a ɗish va, a nyu kra.

²⁰ Aman nshèffè nengaʼa a woya a ndiv na, ngwozi a tsagi nengaʼa ta gaɗa na: Sassaya di ngaya! Ka ngots kra nguraʼa! Aman nengaʼa a mʼmbeɗa ta a ma ɓai, a nfa na gèɗ ɓai,

²¹ a mbaha na kra I-Kabod, a ngaɗa: Nʼnjèl Israel asaɓai! A goɗ a géɗ man ta ceda koti nderzlè-ma a ma klèng, a géɗ babaki nengaʼa, a géɗ baki nengaʼa.

²² A nengaʼa a ngaɗa: Nʼnjèl Israel asaɓai, te man ta ceda koti nderzlè-ma a ma klèng!