I Samuel 30 - Ma Zhiklè

David a gi var a ndohi Amalek

¹ Aman David a ndohi nengaʼa ta ndikè Tsiklag, te mʼmèn mamakaraʼa, ndohi Amalek ta kala ta va a ndohi Tsiklag, a kokwar te man a dukwaɗ. A ta duma Tsiklag, a ta fa na vogwa.

² A ta par ta ngwozihi a ndohi te pa tèlèba, ko dalahi a golahai, a ɓèlè. Ta keɗe ndo ɓai; ta hel ta a rai.

³ Aman David a ndohi nengaʼa ta shkè a kokwar, vogwa a nʼndeda kokwar a ma, a ngwozihi a wudahi a dalahi ta ge ta a ɓèlè.

⁴ David a ndohi man ta zhè a sam na ta hinè a ta kuɗai, ha a ngerzlama ta daʼai.

⁵ Ngwozi David cèw, Achinoam te Jizreel, a Abigail, ngwoz Nabal te Carmel, ta ge ta ɓèlè.

⁶ A David a nsau matakwan kumba, ndohi ta woya ta kèlè a kwa. Ndav a ndza ta a ndohi tèlèba a gèɗ wudahi a dalahi ta. Aman David a mpu ndav na a Ndo nzi pèc pècèk, Zhiklè na.

⁷ A ngaɗa na Abiathar, ndo mvi skwi a Zhiklè, kra Achimélec: Ckoy Ephod, dakwa! A Abiathar a ncko na Ephod a David.

⁸ David a ndzhoɗo Ndo nzi pèc pècèk, a ngaɗa: I hu a verzi ndohi nkalay a va haha dè? I da ngats ta dè? Ndo nzi pèc pècèk a mʼmbeɗa na a ma: Hau a verzi ta! Ka da ngats ta, a ka da ngazlka ta a deɓa.

⁹ David a mdo a nda ndohi 600 man ta zhè a sam na, a ta shkè a ma woyam Besor.

¹⁰ A David a mdo a nda ndohi 400, a ta hu a verzi ta. Ndohi 200 man ta ngeza holholaʼa, ta slaha ta tawaɗa woyam Besor ɓai, ta nza ta a deɓa.

¹¹ A ta ngots ndo Egypte te dak. Ta daʼa a sam David, ta va na skwi nʼndai a iyam,

¹² a ta va na matawi kètè a wondar ngworaʼa, guv guv ri cèw. Aman a ndau skwi ma, a nsassaya di na, aman mʼmèn makar a nʼnda skwa ɓai, nsa iyam ɓai.

¹³ David a ngaɗa na: Ka verzi mè? Ka shkè tema? A nengaʼa a ngaɗa: I ndo Egypte, i ɓèl ndo Amalek. A gi mʼmèn makar, babgi ga a njèkyè a pa, a gèɗ man i mbelakaɓai.

¹⁴ Nga kala na va a kokwar Kéreth, te man a dukwaɗ, a nga fa na vogwa a kokwar Tsiklag.

¹⁵ David a ngaɗa na: Ka woy a ka dyè a sam ndohi var sa dè? A nengaʼa a ngaɗa na: Sèi ka mbadayè, a sam Zhiklè, ka da kedyè azɓai, ka da vyè a ri babgi ga azɓai, a i de ka a sam ndohi var sa.

¹⁶ A nengaʼa a ndaʼa. Ndohi Amalek ta venda gèɗ ta a sam tèlèba. Ta ndau, ta sau, ta gau ngolala a skwi man ta hul a metsar te kokwar ndohi Philistie te kokwar Juda ba.

David a nhulko skwi a deɓa te ri ndohi Amalek

¹⁷ David a mbazl ta, a hinè a prèk te gai, ha ndè ma dakwaɗ, a mbazl ta a vèvèɗ, ndo mwuca ɓai, ko staɗ, sèi ndohi 400 man ta mbel ta a deɓ zlugumihai a ta hu ta.

¹⁸ Aranta David a mʼmbeldko skwi man ndohi Amalek ta heldama. David a mʼmbeldko ngwozi nengaʼa cèw ba.

¹⁹ A nʼngotsko ndohi ta a deɓa tèlèba, ko nkè-shèa, ko mbiaʼa, man ta hulo; a wudahi ba a dalahi ba a skwi tèlèba man ta shkè a vna, tèlèba David a nʼngotskoɗa deɓa.

²⁰ A ta mbolkoɗi rèwè tambaki a zlèhi a ma tengaʼa, a ta gaɗa: Nasa skwi man David a nhulko te var.

²¹ Aman David a mshkè a deɓa a sam ndohi 200 man ta ngeza a ta slaha ta jèjèrèʼa asaɓai, man a njèk ta a ma woyam Besor, to do aman ta zli gèɗ a David a ndohi man ta zhè a sam nengaʼa. Aman David a ndohi nengaʼa ta shkè, ta ga ta mbalai.

²² Aman ndohi ambaɓihiaʼa a ndohi falihai te va ndohi man to do a verzi David, ta hüno a ta gaɗa: To do a verzi nga ɓai, nga va ta skwi man nga ngotskoɗa deɓa ɓai, sèi ngwozi ta a wudahi ta man ta ngècèʼa. Do co, do do!

²³ Aman David a ngaɗa: Kin gu aranta ɓai, te deɓ man Ndo nzi pèc pècèk a mva nga skwai, a mɓer nga, a mpa nga ndohi var sa man ta kala nga a va, a rai.

²⁴ Ndo azɓai man a cè ma kinè a haha. Da ngots lèmèlèmè. Ndohi nʼndo var a ndohi nʼnza a sam kolongwai sèi ta ngècè skwi lèmèlèmè.

²⁵ A ta gu arsa a pats sa, a ta gu arsa a ma ma. David a nfaʼa a ma kita a skwi tsuf Israel, ha nshkè na ma a mpatsna.

²⁶ Aman David a mshkè Tsiklag, a nzlündo skwi man a nʼngots te var a sam ndohi nhalaʼa te Juda, a sam mandalahi na, a mʼmenda ta: Na haha skwi mbalai man nga va kinè te va skwi man nga ngots a sam var mayamhi Ndo nzi pèc pècèk.

²⁷ A nzlinda ta skwi a ndohi te Béthel, a ndohi te Ramoth te man a dukwaɗ,

²⁸ a ndohi te Jatthir, a ndohi Aroer a ndohi te Siphmoth, a ndohi te Eshthemoa,

²⁹ a ndohi, te Racal, a ndohi te kokwar Jerachmeel,

³⁰ a ndohi te kokwar Keni a Horma, a ndohi te Cor-Ashan a Athac,

³¹ a ndohi te Hebron; a sam tèlèba man David a ndohi na ta sawala a pa.