I Samuel 3 - Ma Zhiklè

Zhiklè a baha na Samuel

¹ Samuel, gèlèɓi kra, a ngu mizlinè Zhiklè a sam Eli. A pats sa, ndohi ta sun ma Zhiklè kumba ɓai. Zhiklè a ngudoko ta va a di a ndohi kumba bai.

² Pats ngiɗè a gu ar haha: Eli a nzhunè a sam mʼmènè na. Vogwa a sam skwi nfi vogwa mʼmbats di ɓai. Di Eli ngawalaʼa, a slaha a nrka di ɓai.

³ Samuel mʼmana tʼhai te gi Zhiklè, a sam man koti nderzlè-ma Zhiklè a pa.

⁴ Ndo nzi pèc pècèk a mbaha na Samuel. A nengaʼa a mʼmbeɗa na a ma: Awai, iyè anai!

⁵ A mhu a sam Eli, a ngaɗa na: Ka bahayè, iyè anai. A nengaʼa a ngaɗa na: I baha ka ɓai. Do a deɓa a ka manahai. A Samuel a mdo a deɓa, a mʼmana hai.

⁶ Ndo nzi pèc pècèk a mbaha na Samuel zaʼa: A Samuel a nslambaɗa, a mdo a sam Eli, a ngaɗa na: Iyè anai, i zhè! Ka bahayè. Eli a ngaɗa na: I baha ka ɓai, kra ga. Do a deɓa a ka mana hai!

⁷ Samuel a sun Ndo nzi pèc pècèk di ɓai, Ndo nzi pèc pècèk a ngudoko na va a di di ɓai.

⁸ A Ndo nzi pèc pècèk a mbaha na Samuel mamakaraʼa. A nengaʼa a nslambaɗa, a mdo a sam Eli, a ngaɗa: Iye anai! Ka bahayè. A Eli a suna, Ndo nzi pèc pècèk a mbaha na kra.

⁹ Eli a ngaɗa na Samuel: Do a deɓa a ka manahai. Aman a da baha ka, ka gaɗa: Goɗ ma ngaya, Bai, bél ngaya a tsenaʼa! A Samuel a mdo a deɓa, a mʼmana hai a sam mʼmèn na.

¹⁰ Ndo nzi pèc pècèk a mshkè, a nherda na va, a mbaha na ara matsa: Samuel! Samuel! A Samuel a ngaɗa: Goɗ ma ngaya, ɓèl ngaya a tsenaʼa.

¹¹ Ndo nzi pèc pècèk a ngaɗa na Samuel: Anai i woy a i gi skwi ngiɗè te Israel. Ko wawa man a tsenaʼa, a ndèma na zlembaɗ.

¹² A pats nasa i woy a i ndeva skwi tèlèba a sam Eli, man i goɗ a géɗ gi nengaʼa, i hinèʼa a i rufaʼa.

¹³ Gar haha do a ka menda na: I ga na kita a gi nengaʼa a mèdèp, te man a suna, wudahi nengaʼa ta durɗo Zhiklè, a nengaʼa nʼnga ta ndzoan ɓai.

¹⁴ A gèɗ nengaʼa i mbaɗa a géɗ gi Eli: A vava, mali ndohi gi Eli a pre asaɓai a mèdèp ba, ko ta zli skwi a Zhiklè, ko ta va na skwi a Zhiklè.

¹⁵ A Samuel a nzhuna, ha sam nciɗa. A prèk a mʼwina ntamagi gi Zhiklè. Samuel a gi zlau aman a ngra na nshun nengaʼa a Eli.

¹⁶ A Eli a mbaha na Samuel, a ngaɗa: Samuel, kra ga! A nengaʼa a mʼmbeɗa na a ma: Iye anai, i zhe!

¹⁷ A ngaɗa: Ndo nzi pèc pècèk a ngaɗa ka ma mè? Ka ngheda a sam ga ɓai! Zhiklè da ga ka skwi ambaɓiaʼa, aman ka ngheda skwi man a gaɗa ka a sam ga.

¹⁸ A Samuel a nʼngreda na tèlèba, a nʼngheda skwa ɓai. Eli a ngaɗa: Nengaʼa Ndo nzi pèc pècèk. Da gu ara man ambaha.

¹⁹ Samuel a grè a ma ma, a Ndo nzi pèc pècèk a zhè a sam nengaʼa, a ma nengaʼa tèlèba a fshèwa azbai, ko staɗ.

²⁰ Israel tèlèba a suna, a hinè te Dan ha ndè a Beer-Shèba, Ndo nzi pèc pècèk a nfu Samuel a ndo nhèdè ma na.

²¹ Ndo nzi pèc pècèk a ngudoko ta va a dai a ma ma te Silo, aman a pa a ngudoko na va a di a Samuel. A Samuel a ngaɗa ta ma a ndohi Israel tèlèba.