I Samuel 29 - Ma Zhiklè

Ndohi Philistie ta co David a ndav ɓai

¹ Ndohi Philistie ta ɓic ta ndohi vartengaʼa tèlèba te Aphek. Israel a mɓica va a sam nlèlè iyam te Jizreel.

² Aman bihi Philistie ta shkè a ndohi tengaʼa 100, 100, a gozhèm, gozhèm, te deɓaʼa David a ndohi nengaʼa a verzi Akish.

³ A bihi sojè Philistie ta gaɗa: Ndohi Hébreu ta ga a haha mè? Akish a mʼmbeɗa ta a ma: Nengaʼa David, ɓèl Saul, bi Israel. Na zhè a sam ga a gi mvi staɗ, a gi mvi cèw ma, a i ngots mali ngiɗè a sam na ɓai, a hün te pats man a mshkè a sam ga, ha patsna.

⁴ Aman bihi sojè Philistie ta gu ndav a géɗ nengaʼa, a ta gaɗa na: Menda ndo sa a deɓa! Do do a kokwar man ka ngra na, da shkè var a verzi nga ɓi kla; a da ngwodka nga va a gèɗ, a ndi a mayam nga. A da ngatsa na maya a hi a bi na, a mpa ta ndohi haha a rai.

⁵ Nengaʼa David ka bi dè, te nengaʼa ta sli dimèsh a sam ngècè: Saul a mbazl ta mayamhi nengaʼa gozhèm, aman David a mbazl ta mayamhi nengaʼa gozhèm 10.

⁶ Akish a mbaha na David, a ngaɗa na: Ara man Ndo nzi pèc pècèk a zhè, ka ndo nzuraʼa. Ar ambahayè, aman ka gi var a verzi ga, te man i ngots mali a sam ngaya bai, a hün te pats man ka shkè a sam ga, ha mshkè na ma mpatsna. Aman ka ambaha ta bihi sojè ɓai.

⁷ Gar haha do deɓa a ngwai, a ko do a gumai, ka gu skwi man ambaha ta bihi sojè ga ɓai.

⁸ David a ngaɗa na Akish: I ga mè, a ka ngots mali mè a sam ga, daga pats man i hüno mizlinè ngaya, ha patsna, a ka vay civèɗ a i gi var a mayamhi bi ga bai?

⁹ Akish a mʼmbeɗa na a ma a ngaɗa na David: Ka suna, ka ambahayè ara gol Zhiklè; aman bihi sojè Philistie ta gaɗa: Do do var a verzi nga ɓai!

¹⁰ Gar haha angoslèm a prèk te gai, slambaɗa, a nda ɓèlèlihi bi ngaya man kin shkè a nda ta, vo-do a sam man i ngra kinè, a ka hur skwi amɓaɓiaʼa ɓai. Ka ambahayè. Angoslèm a prèk vo-do di mènè, aman pats a nhulko gèɗ.

¹¹ A David a ndohi nengaʼa ta slambaɗa a prèk te gai, a to do aman ta men ta a deɓa a kokwar ndohi Philistie. Aman ndohi Philistie to do Jizreel.