I Samuel 28 - Ma Zhiklè

¹ Te ndev nasa, ndohi Philistie ta ɓic ta ndohi var, a ta woy a ta gi var a Israel. Akish a ngaɗa na David: Sèi ka suna, a patsna ka dè var a verzi ga, kinè a ndohi ngaya.

² David a ngaɗa na Akish: Amba, a ka da sun skwi man ɓèl ngaya a slaha a ngiaʼa. Akish a ngaɗa na David: Amba, i ge ka a ndo mɓer gèɗ ga a mèdèp.

Saul a sam ngwoz mʼmbèh skwai te En-Dor

³ Samuel a mʼmets na ma, a ndohi Israel tèlèba ta kuɗa klèng ma, a ta rda a kokwar Rama. Saul a ndzam ta ndohi mpi kwa a ndohi mʼmbèh skwi tèlèba ma te kokwar.

⁴ A ndohi Philistie ta ɓica va a ta haya te Sunem. Saul a mɓica ndohi Israel tèlèba, a ta haya va te Guilboa.

⁵ Aman Saul a nrka nhèyè-va ndohi Philistie, a gi zlau a vata, ndav nengaʼa a gudzai a vata.

⁶ Saul a ndzhoɗo Ndo nzi pèc pècèk; aman Ndo nzi pèc pècèk a mbeɗa na a ma ɓai, ko te nshunè, ko a jimèr nkezlaʼa, ko a ma ndohi nhadka ma.

⁷ Saul a ngaɗa ta ndohi mizlinè nengaʼa: Va-woykay ngwoz man a pi kwa, a i dè a sam na, a i jhèɗèʼa. Ndohi mizlinè nengaʼa ta gaɗa na: Ngwoz a zhè man a sun mpi kwa, te kokwar En-Dor.

⁸ A Saul a nʼngwode va na, a mfeda maslaka ngiɗè a va, a to do a ndohi mizlinè nengaʼa cèw, a ta shkè a sam ngwoz a vaɗ. Saul a ngaɗa: Pay kwa, ngrayè, baha naʼmèzhèɓ ndo man i ngra ka.

⁹ A ngwoz a ngaɗa na: Ka sun skwi man Saul a ngau, a ndzam ta ndohi mpi kwa a ndohi mʼmbèh skwai tèlèba auda te kokwar. Ka tay ɗaf a gèɗ èhèmè, a ta da kedyè?

¹⁰ Saul a mʼmbaɗa na, a sam di Ndo nzi pèc pècèk, a ngaɗa: Ara man Ndo nzi pèc pècèk a zhè, ta da fa ka mali a gèɗ te skwi haha azɓai.

¹¹ A ngwoz a ndzhoɗo: I baha na zlembaɗ ndo mʼmetsaʼa wa? A nengaʼa a ngaɗa na: Baha na Samuel!

¹² A ngwoz a nrka Samuel, a ntsi lalau, a ngaɗa na: Ka ngwodyè èhèmè? Ka Saul!

¹³ Bai a ngaɗa na: Ka gu zlau ɓai, gadayè, ka rka mè? A ngwoz a ngaɗa na Saul: I rka mèzhèɓ man a shkè tʼherkeda.

¹⁴ Saul a ngaɗa na ngwoz: Nara mè? A ngwoz a ngaɗa: Babgai a shkè, dawar a va. A Saul a suna, nengaʼa Samuel, a ngurɓahai a herkeda, a nslébèrɗèʼa.

¹⁵ Samuel a ngaɗa na Saul: Ka ngokoy nshèk va ga a pa èhèmè? A ka bahay è auda èhèmè? Saul a ngaɗa: I te matakwan mbiaʼa. Ndohi Philistie ta gi var a iyè. Zhiklè a njèkyè ma, a mbeɗay a ma asaɓai, ko te ma ndohi nhadka ma, ko te nshunè. A gèɗ nengaʼa i baha ka, a ka ngray skwi man i da giaʼa.

¹⁶ Samuel a ngaɗa: Aman Ndo nzi pèc pècèk a njèke ka ma, a kin gi mayam a vna ma, ka jhèdyè èhèmè?

¹⁷ Ndo nzi pèc pècèk a nge ka, ara man a gaɗa ka a ma ga. Ndo nzi pèc pècèk a nguzlko kokwar bai te ri ngaya, a mva na ndo ngiɗè, a David.

¹⁸ A gèɗ man ka fa na gèɗ a ma Ndo nzi pèc pècèk bai. Ndav a ndza na holholaʼa a gèɗ Amalek, aman ka ga ara man Ndo nzi pèc pècèk a woya ɓai. A géɗ nengaʼa Ndo nzi pèc pècèk a ga ka arsa a patsna.

¹⁹ A mpa kinè, a Israel, a ri a ndohi Philistie. Angoslèm kinè a wudahi ngaya kin da shkè a géɗ a iyè. Ndohi var Israel ba, Ndo nzi pèc pècèk a da pe ta a ri a ndohi Philistie.

²⁰ Aman Saul a ntsena ma Samuel, a mpra na zlau a va a vata, a nkalahi a herkeda ɓra, wuɗi na azɓai, te man a pats ba a vaɗ ba a nʼnda skwa ɓai.

²¹ A ngwoz sa a mdo a sam Saul. Aman a nrkaʼa, a mɓerzl na a zlau, a ngaɗa na: Na haha i fu gèɗ a ma ngaya. I hera nshèffè ga ɓai, a i tsun ma ngaya.

²² Antanta ka ba sèi ka fi gèɗ a ma ga. I da va ka movar kètè. Ndau, a ka ngots wuɗai, aman ka dè a ma a civèɗ.

²³ Aman nengaʼa a woya skwi nʼndi ɓai, a ngaɗa: I woy skwi nʼndi ɓai. Ndohi mizlinè nengaʼa, a nda ngwoz sa ba, ta titka na gèɗ, a nengaʼa a ngu ara man ta gaɗa na. A nslambaɗa tʼherkeda, a nʼnza a sam mʼmènè.

²⁴ A ngwoz a nʼngots kra zlè ngraʼa te gi na. A nzlaha tsam-tsam. A nco gufa, a nherslaʼa, a ntau ɗaf man skwi nshégèrè a te di ɓai.

²⁵ A mva ta skwi nʼndi sa a nda Saul a ndohi mizlinè nengaʼa. Aman ta nda klèng ma, ta slambaɗa, a to do ta a vaɗ sa.