I Samuel 27 - Ma Zhiklè

David a nzi te ndev ndohi Philistie

¹ David a nhur te ndav na: Pats ngiɗè Saul a da kedyè ndèzl. Sèi i hi ga a kokwar ndohi Philistie; a Saul a da jèkyè, a da woyè te kokwar Israel pèc pècèk asaɓai, a i mbel ga te ri na.

² David a nslambaɗa a ndohi 600 man ta zhè a sam na, a to do a sam Akish, kra Maoc, bi Gath.

³ A David a nʼnza a sam Akish te Gath a nda nohi nengaʼa tèlèba, staɗ staɗ a nda ndohi gi na. A David a ngwozi nengaʼa cèw: Achinoam te Jizreel, a Abigail, ngwoz Nabal te Carmel.

⁴ Aman ta ngra na Saul, David a mwuc na a kokwar Gath, Saul a ndzodzora te deɓaʼa asaɓai.

⁵ David a ngaɗa na Akish: Aman i ambaha ka, vay sam te kokwar ngaya tʼhèshèkèɗ, a i nzi a pa. Ɓèl ngaya da nza ka a tsagi te kokwar bi èhèmè?

⁶ A pats sa, Akish a mva na Tsiklag. A géɗ nengaʼa Tsiklag a ndohi Juda; ha nshkè na ma patsna.

⁷ David a nʼnza a kokwar ndohi Philistie mvi staɗ a ki faɗ.

⁸ David a mdo a nda ndohi nengaʼa, a ta kala na va a kokwar ndohi Guirzi, Gueshur a Amalek. Tengaʼa ndohi kokwar sa, te Tèlam, ha ndè Shur, ha ndè Egypte.

⁹ Aman David a nkala na va a kokwar, a njèka na nshèffè a ndo ɓai, ko nguraʼa, ko ngwoz, a nhul tambakihai a zlèhai, kdèhihai, zlugumihai a maslaka. Te deɓaʼa a mshkè a deɓa a sam Akish.

¹⁰ Aman Akish a ndzhoɗo: Kin kala na va a kokwar mè a patsna? David a mʼmbeɗa na a ma: Te man a dukwaɗ, a tsagi kokwar Juda; – man ɓai: A kokwar Jerachmeel; – man bai: a kokwar Keni te man a dukwaɗ.

¹¹ David a nhulkoɗi ngurhi a ngwozhi a kokwar Gath ɓai, a nhur a gaɗa, ta da menda na Akish skwi man i giaʼa, a ta gaɗa: David a gu kata kata. A David a ngau arsa pèc pècèk, man a nza te kokwar Philistie.

¹² Akish a ngso ndav a David, a nhuro: A gi arsa; ndohi Israel, ndohi nengaʼa, ta gi shèwa a géɗ nengaʼa, a nengaʼa a ndi a ɓèl ga a mèdèp.