I Samuel 25 - Ma Zhiklè

David a ga na mbali a Nabal

¹ Samuel a mʼmets na, a ndohi Israel tèlèba ta ɗica va, a ta kuɗiaʼa, a ta rda a gi na te Rama. A David a nslambaɗa, a mdo hèshèkèɗ Maon.

² Ndo ngiɗè a zhè te Maon, skwi na a zhè te Carmel, ndo mèshèlè mbiaʼa. Tambakihi nengaʼa 3.000, ɓokwi 1.000. A zli gwots tambak te Carmel.

³ Nzlembaɗ nengaʼa Nabal. Ngwoz nengaʼa Abigail. Ngwoz, maya na zhè, va nengaʼa amba rofrofaʼa. Ndo sa ndo bazlazlam, ndo shèwa, ndo nte verzi Caleb.

⁴ Aman David te hèshèkèɗ a ntsenaʼa, Nabal a zli gwots tambakihai,

⁵ a nzlinde ta ndohi nengaʼa 10, a ngaɗa ta: Vo-do Carmel, a gi Nabal, va-ga na mbali ga,

⁶ a kin gaɗa na Nabal, kramam ga: Pombai da zhè a géɗ ngaya, pombai da zhè a géɗ gi ngaya, pombai da zhè a géɗ skwi ngaya tèlèba!

⁷ I tsenaʼa ara man ka zli gwots tambakihi ngaya. Ndohi mɓer tambakihi ngaya, man ta zhe a sam nga, man ta zhe te Carmel, nga ga ta skwi ambaɓiaʼa bai, skwi tengaʼa a nze ɓai.

⁸ Dzhaɗ ta ndohi ngaya, ta da ngra ka. Gar haha gau amba a sam ndohai, nga shkè a ngi ngolala. Gar haha va ta ɓèlèlihi ngaya, a David, kra ngaya, skwi man ka ngotso genè.

⁹ Aman ndohi David ta shkè a ta gaɗa na ma David a Nabal, ara man David a ngra ta, a ta zhèrèʼa.

¹⁰ Aman Nabal a mʼmbeɗa ta ma a ɓèlèlihi David: David a wa? Kra Isai a wa? Ɓèlèlihi ta ndev ɓai man ta hi ta a ta kwola bi ta.

¹¹ Icè movar ga, barassa a gwots tambakihi ga, a i va ta ndohi man i sun sam man ta shkè a pa ɓi ɗè?

¹² Ndohi David ta men ta a deɓa a ngwai. Aman ta shkè ngwai, ta menda na David skwi tèlèba, ara man a gaɗka ta.

¹³ Te deɓaʼa David a ngaɗa ta ndohi nengaʼa: Staɗ staɗ da kelawda kafahi gwèsh a zlazlar! Staɗ staɗ ta gau arsa, a David ba a nkelawda kafahi gwèsh a zlazlar. A David a nde ta ndohi 400.200 ta nza te deɓa a sam kolongwai.

Abigail a pa na a pa ndav a David

¹⁴ Aman staɗ te va ndohi mizlinè Nabal a nʼngra na Abigail, ngwoz Nabal: Na haha David a nzlinde ta ndohi sak te hè-shèkèd, a ta gi mbalai a bi nga. Aman nengaʼa a nʼnga ta ma a va.

¹⁵ Pèc pècèk ndohi ta nza a nda nga amba genè, ta ga nga matakwan ɓai, skwi nga nze ɓai, daga man nga shèwèlè a sam ta, a nga zhè te dak.

¹⁶ A pats a vaɗ nga wèr tambakihai, tengaʼa ta ngal nga a pa ara zlazlar.

¹⁷ Anai huro, ka da gi mè? Aman skwi ngédèshè kalka na a géɗ bi nga, a gi nengaʼa tèlèba ma. Nengaʼa ndo shèwa holholaʼa, nga slaha nga gèɗè a vna ɓai.

¹⁸ Abigail a nhul movar 200 tsam-tsam, barassa duzlaki cèw, tambakihi nsulaʼa 5, dau nsulaʼa agoda 100, wondar ngworaʼa 100, matawai 200, a mpeda a deɓ kɗèh.

¹⁹ Te deɓaʼa a ngaɗa ta ndohi nengaʼa: Vo-do a ma ga, i dè a verzi kinè tsam-tsam. A nʼngreda na Nabal, baki nengaʼa, ɓai.

²⁰ Aman to do hi te za, a deɓ kɗèh, a za a nʼnghede ta, tsam-tsam ta zlü gèɗ a David a ndohi nengaʼa.

²¹ David a nhur te ndav na: I ɓera na skwi ndo haha tèlèba tʼhèshèkèɗ ambalai, skwi nengaʼa nze ɓai, ko staɗ. Aman nengaʼa a mpelay skwi man i gau amba a skwi ambaɓiaʼa.

²² Aman ha angoslèm a prèk i da jèkeda staɗ te va ndohi haha, Zhiklè da gay skwi ambaɓiaʼa.

²³ Aman Abigail a nrka David, tsam-tsam a mshkèhai a deɓ kɗèh, a nkalahi a herkeda a ma David, a ngurɓahai a herkeda.

²⁴ A nkalahi a deɓ sak nengaʼa, a ngaɗa: Bi ga, tèlè mali ga stadgenè! Va na civèɗ a ɓèl ngaya, fu zlembaɗ a ma ɓèl ngaya!

²⁵ Bi ga da ngeza a sam Nabal, fali ndo ambali ɓai! Nengaʼa nrzla, ara nzlembaɗ na man ta baha na a vna. Aman iyè, ɓèl ngaya, i rka ta ndohi man bi ga a nzlinde ta, i rka ta ɓai.

²⁶ Anai, bi ga, ara man Zhiklè a zhè, ara man ka, ka zhè, ka man Ndo nzi pèc pècèk a ɓer ka te ri mali a ka keɗe ndo ɓai, a ntakaha ka a ri nengaʼa: mayamhi ngaya a ndohi man ta hur skwi ambaɓiaʼa a géɗ bi ga, da ga a nrzlaʼa ara Nabal.

²⁷ Skwi mbali haha, man ɓèl ngaya a ncko na bi na, a va ta ndohi man ta dè a verzi bi na.

²⁸ Pra na malai a ɓèl ngaya. Ndo nzi pèc pècèk a vava a da gi aman gi ngaya a nzi dai. Ka gi var Ndo nzi pèc pècèk, a ta ngècè mali a sam ngaya azɓai, a pats nshèffè ngaya tèlèba.

²⁹ Aman ndo a da Sala na va a gèɗ bai, a paraha ka, a woya a nzede nshèffè ngaya, Ndo nzi pèc pècèk, Zhiklè ngaya, da ɓür nshèffè bi ga te va ndohi man ta zhè a nshèffè. Aman nshèffè mayamhi ngaya da kalda a dala!

³⁰ Aman te deɓa Ndo nzi pèc pècèk a da ga ka skwi man amba tèlèba man a mpasla ka rai, a ge ka a bi Israel,

³¹ ka suna a ka gaɗa, skwi haha a nkalde ka a mali ɓai, a mèzhèb ndav ngaya a slaha a mpin ka ɓai, te man ka keɗe ndo ambali ɓai, a ka tsaka di man a ngaya auda a ri ngaya ɓai. Aman Ndo nzi pèc pècèk a da ga ka skwi man amba, heryè!

³² A David a ngaɗa na Abigail: I shid gèɗ a Ndo nzi pèc pècèk, Zhiklè Israel, aman a patsna a nzlindeka ka a nga zlü gèɗ a ka.

³³ I shid gèɗ a géɗ maya ngaya. I shid gèɗ a géɗ ngaya ba; aman a patsna ka ɓeryè a i keɗe ndo ɓai, i tsaka di man a ga auda a ri ga ɓai.

³⁴ Ara man Ndo nzi pèc pècèk, Zhiklè Israel, a zhè a nshèffè a vava, nengaʼa a gedassa civèɗ ga a patsna, a i ga matakwan ɓai. Aman a matsa ka hakaɗa sam ga ɓai, ar ndohi Nabal, ngurhi tèlèba, ko staɗ a jèka azɓai ha angoslèm a prèk.

³⁵ A David a nco skwi man a nhelda rai. A ngaɗa na Abigail: Do ngwi a gumai. Na haha, i tsena ma ngaya, a i co, a ndav amba.

³⁶ Aman Abigail a mshkè a sam Nabal, Nabal a mɓic ta ndohi ngolala zom a sam na ara bai. Ndav Nabal a wuffè, zom a keɗa a vata. A géɗ nengaʼa Abigail a nʼngra na ɓai, ko kèshkata, ha sam nciɗa.

³⁷ Aman a prèk, man zom a ndo na auda te gèɗ Nabal ma, ngwoz nengaʼa a nʼngra na skwi man a gu adatsa. Aman ndav Nabal a ngwor na, ara kwa.

³⁸ A ngu mʼmèn 10 dai, a Ndo nzi pèc pècèk a nkeɗa Nabal, a mʼmets na.

³⁹ Aman David a ntsenaʼa, Nabal a mʼmets na ma, a ngaɗa: I shid gèɗ a Ndo nzi pèc pècèk, man a mpela skwi man Nabal a derɗyè a vna, a mɓeryè a i ga skwi ambaɓai ɓai. Skwi ambaɓia man Nabal a gau, Ndo nzi pèc pècèk a nkalda na a gèɗ a nengaʼa. A David a nzlündo nslemsak, a nwoyko na Abigail a ngwoz na.

⁴⁰ Aman ɓèlèlihi David ta shkè Carmel, a sam Abigail, ta goɗ a vna, a ta gaɗa: David a nzlindeka nga a sam ngaya, a woy ka a ngwoz na.

⁴¹ A ngwoz a nslambaɗa, a ngurɓahai a herkeda, a ngaɗa: Iyè anai, i ɓèl ngaya, a i pana ta sak a ɓèlèlihi bi ga.

⁴² Abigail a nslambaɗa tsam-tsam, nʼnza a deɓ kɗèh nengaʼa, a dalahi ntakaha zlam to do a vna. A ndo a verzi ndohi sak David, a David a nco a ngwoz na.

⁴³ Achinoam, David a ncko te Jizreel. A ta gu a ngwozi na cèw ba.

⁴⁴ Saul a nceda Mical, dem nengaʼa, ngwoz David, a ma, a mva na Palthi, kra Laish, te Gallim.