I Samuel 24 - Ma Zhiklè

David a jèka na nshèffè a Saul te En-Guédi

¹ David a njèkeda sam haha, a mdo a géɗ za te En-Guédi.

² Aman Saul a ndzam ta ndohi Philistie ma, a mshkè ngwi ma, ta ngra na: Na haha, David a zhè tʼhèshèkèɗ te En-Guédi.

³ A Saul a nhul ndohi 3.000, ndohi nsal-salhiaʼa te Israel tèlèba, a mdo, a nda woy David a ndohi nengaʼa, te za ɓok dak te civèɗ mvèng pats.

⁴ A mshkè a sam rèwè tambakihi a civèɗ. A pa, gi za a zhè, a Saul a mdo a pa, a woya a thè zai. David a ndohi nengaʼa ta te gi za tʼhwadaʼa.

⁵ Ndohi David ta gaɗa na David: A patsna Ndo nzi pèc pècèk a mva ka mayam ngaya a ri a ka, ara man a gaɗa ka halakai. Ka gi a vna ara man ambaha ka. A David a nslambaɗa, a nʼngulo ma dawar maslaka Saul a metsar.

⁶ Aman te deɓaʼa ndav David a mbedè, a géɗ man a ngulo ma dawar maslaka Saul.

⁷ David a ngaɗa ta ndohi na: Zhiklè da ɓür ri ga! I lama na Bi ga, man Ndo nzi pèc pècèk a bada na mbar a gèɗ, azɓai a mèdèp. Aman nengaʼa ndo man Ndo nzi pèc pècèk a bada na mbar a gèɗ.

⁸ A David a nʼnga ta ndzoan a ndohi na, a mva ta civèɗ a ta slambaɗa na va a Saul ɓai. Aman Saul a njèkeda gi za ma, a mdo a ma a civèɗ,

⁹ David a mdo auda te gi za, a verzi nengaʼa, a mbaha na Saul: Bai, bi ga! Aman Saul a mpu di a deɓa, David a ngurɓahai a herkeda, a nslébèrdèʼa.

¹⁰ A David a ngaɗa na Saul: Ka fi gèɗ a ma ndohai man ta gèɗèʼa, èhèmè? Man ta gaɗa: Na haha, David a woya a ngedas ka.

¹¹ A patsna ka rka a di ngaya. Ndo nzi pèc pècèk a mva ka a ri a yè te gi za. Aman i jèke ka, i keɗe ka ɓai, aman i huro: I woy a i lama na bi ga ɓai; aman nengaʼa ndo man Ndo nzi pèc pècèk a mbada na mbar a gèɗ.

¹² Bab ga, wora, rka ma dawar maslaka ngaya te ri ga! A i ngulo ma dawar maslaka ngaya, a i keɗe ka ɓai, a ka suna, a ka rkaʼa, ri ga mpana, ri nlizhɓai, i ga shèwa a géɗ ngaya ɓai, a i ga mali a sam ngaya ɓai. Aman ka, ka woy a ka zeday nshèffè ga.

¹³ Ndo nzi pèc pècèk da gu kita te ndev nga a ka. Ndo nzi pèc pècèk da pul di man a ga a sam ngaya. Aman ri ga da lama ka ɓai.

¹⁴ Ngèlègèɗ ma ndohi nhalaʼa a gaɗa: Mphömè a shkè auda te ndohi mphömè. Aman ri ga da lama ka ɓai!

¹⁵ Bi Israel, ka jèm wa? Ka hi a verzi ngè? Kda mʼmetsaʼa! Nshwèk ambalai!

¹⁶ Gar haha Ndo nzi pèc pècèk da gu kita te ndev nga a ka, da kaldyè te ri ngaya.

¹⁷ Aman David a ngaɗa na ma haha a Saul ma, Saul a ndzhoɗo: Daʼai David, kra ga, ka ɓi ɗè? A Saul a nhüno a kuɗi a vata,

¹⁸ a ngaɗa na David: Ka ndo nzuraʼa, dara ka! Ka gu skwi man amba a sam ga. Aman iyè, i gu skwi man ambaɓai a sam ngaya.

¹⁹ A patsna ka gay skwi man amba a fena nzlèzlèa. Ndo nzi pèc pècèk a mvyè a ri a ka, aman ka keɗyè ɓai.

²⁰ Ndo man ta zli gèɗ a mayam na, a jèkeda aman a mbel na dè? Ndo nzi pèc pècèk da pela ka a skwi man amba, a gèɗ skwi man ka gu a sam ga a patsna.

²¹ Na haha, i suna, ka da gi bai, a kokwar bi Israel a da nzi dai te ri ngaya.

²² Sèi ka mbadayè, a sam Ndo nzi pèc pècèk: Te deɓ mʼmetsi ga, ka da zeda ndohi verzi ga ɓai, a ka gedassa nzlembaɗga a nzlembaɗ ndohi gi bab ga ɓai.

²³ A David a mʼmbaɗa na Saul. A Saul a mdo na ngwai. David a ndohi nengaʼa to do a gi za.