I Samuel 23 - Ma Zhiklè

David te Keila

¹ Ta menda na David: Na haha ndohi Philistie ta zhè a ma kokwar Keila, aman ta gi var, a ta gi metsar te hedak.

² David a ndzhoɗo Ndo nzi pèc pècèk: I dè a i bazl ta ndohi Philistie ɗè? A Ndo nzi pèc pècèk a mʼmbeɗa na a ma David: Do, a ka bazl ta ndohi Philistie. Mbela kokwar Keila!

³ Aman ndohi David ta gaɗa na: Ko a haha, te kokwar Juda, nga gi zlau; a nga dè a kokwar Keila a nga gi var a ndohi var Philistie dè?

⁴ David a ndzhoɗo Ndo nzi pèc pècèk zaʼa, a Ndo nzi pèc pècèk a mʼmbeɗa na a ma: Slambaɗa, do Keila! Aman i da pe ta ndohi Philistie a ri a ka.

⁵ A David a ndohi nengaʼa to do Keila, ta gu var a nda ndohi Philistie, a ta hulko skwi gi ta, a ta bazl ta ndohi Philistie kumba.

⁶ A pats man Abiathar, kra Achimélec, a mhu a sam David, a mshkè Keila, a maslaka Ephod te rai.

⁷ A ta menda na Saul. A Saul a ngaɗa: Zhiklè a mvay David a ri ga. David a mdo a kokwar man ntamagi kokwar a skwi mɓara ntamagi a zhè, a mpizlèda ma na a pa a ri na.

⁸ A Saul a mbaha ta ndohi tèlèba a var, aman a dè Keila, a ta pi va a ma kokwar, man David a ndohi na te pa.

⁹ Aman David a ntsenaʼa, Saul a nhur skwi ambaɓiaʼa sa a géɗ nengaʼa, a ngaɗa na Abiathar, ndo mvi skwi a Zhiklè: Cko Ephod!

¹⁰ A David a ngaɗa: Ndo nzi pèc pècèk, Zhiklè Israel, ɓèl ngaya a ntsenaʼa, Saul a nhur a shkè a kokwar Keila, a woya a ngedassa kokwar a géɗ ga.

¹¹ Saul a di a shkè ara man ɓèl ngaya a ntsena dè? Ndo nzi pèc pècèk, Zhiklè Israel, ngreda na ɓèl ngaya! Ndo nzi pèc pècèk a ngaɗa: A di a shkè.

¹² David a ndzhoɗo: Ndohi Keila ta da hil nga, iyè a ndohi ga, a ta da pe nga a ri Saul dè? A Ndo nzi pèc pècèk a mʼmbeɗa na a ma: Ta da pe kinè a ri a nengaʼa.

¹³ A David a nslambaɗa, ta a ndohi nengaʼa, ndohi 600, a ta jèkeda Keila, a ta gu do ahna, do ahna. A ta menda na Saul, David a mwuc na te kokwar Keila. A Saul a njèkeda, nʼnga var asaɓai.

David tʼhèshèkèɗ Ziph

¹⁴ David a nʼnza tʼhèshèkèɗ, te za, tʼhwaɗ kwa, te hèshèkèɗ Ziph. A Saul a woyaʼa lèk lèk. Aman Zhiklè a mva na a ri a nengaʼa ɓai.

¹⁵ Aman David a gi zlau. Saul a mdo, a woya a nzede nshèffè David. Te va man David a zhè te Horsha, te hèshèkèɗ Ziph,

¹⁶ Jonathan, kra Saul, a nslambaɗa, a ndo Horsha, a sam David, a mva na wuɗai, a njè na ma Zhiklè.

¹⁷ A ngaɗa na: Ka gu zlau ɓai. Ri Saul, bab ga, a ndikakaɗa sam ngaya azɓai. Aman ka, ka da gi bi Israel. Iyè i da gi a slaslam ngaya. Ko Saul, bab ga, a suna.

¹⁸ Te deɓaʼa ta cèw ta derzla ma ta a sam di Ndo nzi pèc pècèk. A David a nʼnza te Horsha, a Jonathan a mdo na ngwai.

¹⁹ Ndohi Ziph matskata to do a sam Saul, te Guibea, a ta gaɗa: Na haha, David a nʼnghede va na te za te Horsha, a géɗ za Hakila, a ma hèshèkèɗ.

²⁰ Anai, ara man ka woyaʼa, bi nga, a ka shkè! Ma nga, aman nga va na a ri a bai.

²¹ Saul a ngaɗa: Ndo nzi pèc pècèk da pshè kinè ma, aman i se kinè te va!

²² Vo-do, va-woya a maya zaʼa, va-zeɓau sam sak ndo man a hi na a haha. Aman ta gaɗayè: Maya na ara vaya.

²³ Va-wora, vo-dzhoɗo a sam tèlèba man a ngheda va a pa, a kin shkè a deɓa a kin menday zuraʼa. Te deɓaʼa i dè a verzi kinè. Aman a zhè te kokwar, a zhkèhayè, te va ndohi Juda ta gi gozhèm, gozhem.

²⁴ A ta slambaɗa, a to do a ma Saul a hèshèkèɗ Ziph. David a ndohi nengaʼa, ta a vara, te Maon, te hèshèkèɗ.

²⁵ Aman Saul a ndohi nengaʼa to do a ta woyaʼa, ndohi ngiɗè ta ngra na David. A David a mdo za, te hèshèkèɗ Maon. Aman Saul a ntsenaʼa, a nhu a verzi David a hèshèkèɗ Maon.

²⁶ A Saul a ndohi nengaʼa ta dè a der za a cìvèɗ ngiɗè, a David a ndohi nengaʼa ta beza a der za te civèɗ ngiɗè. David a mhu na tsam-tsam aranta, a woya a nwuc na a Saul. A Saul a ndohi nengaʼa ta tèuda David a ndohi nengaʼa a pa, a ta woy a ta gs ta.

²⁷ A nasa nasa ndo sak Saul a mshkè, a ngaɗa: Washkè tsam-tsam! Ndohi Philistie ta kala nga va a kokwar nga!

²⁸ A Saul a njè-keda nhi a verzi David, a ndo aman ta gi var a ndohi Philistie. A géɗ nengaʼa ta baha na samaʼa, ‘za mwucè’.