I Samuel 22 - Ma Zhiklè

¹ David a mdo na, a mwuc na a gi za te Adullam. Aman kramamhi nengaʼa a ndohi gi bab nengaʼa ta tsenaʼa, to do a sam na.

² A ndohi tèlèba man ta ga ta matakwan, man dua a gèɗ ta, man ta ngeza, ta ɓicko va a sam na, a nengaʼa a ngu a bi ta. Ndohi a sam na ta gi 400.

³ David a njèkeda samaʼa a ndo Mitspé te Moab, a ngaɗa na bi Moab: Va ta civèɗ a nda bab a mam ga, a ta nzi a sam kinè, ha pats man i sun skwi man Ndo nzi pèc pècèk a woya a ngia a iyè.

⁴ A njèka ta a sam bi Moab, a ta nza a sam na; aman David a zhè te za.

Doeg a bazl ta ndohi mvi skwi a Zhiklè te Nob

⁵ Aman ndo nhadka ma te Gath a ngaɗa na David: Ka nza a za ɓai! Slambaɗa, a ko do a kokwar Juda! A David a mdo Hé-reth.

⁶ Saul a ntsenaʼa, ara man ta ngots David a ndohi nengaʼa. Saul a nʼnza te Guibea, a verzi gètèl wof, a tsakwal te rai, a ndohi tèlèba ta zlatsa a sam na.

⁷ Saul a ngaɗa ta ndohi nengaʼa man ta zlatsa a sam na: Va-tsenaʼa, kinè ndohi Benjamin! Kra Isai a di a va kinè gi dau a gi lak dè, a da ga kinè a ndohi ncè ta ma ndohi 1.000, a 100, 100, ɗè?

⁸ Kin humdokoy va a gèɗ èhèmè, ndo a nʼngray ɓi èhèmè, aman kra ga a kra Isai ta derzla ma ta. I se kinè te va azɓi èhèmè – ko staɗ a nʼngrayè ɓi èhèmè, aman kra ga a mpoko na gèɗ auda a ɓèl ga, aman a ngi shèwa a iyè, ara man a gi a patsna?

⁹ Ndo Edom, nzlembaɗ na Doeg, nte va ndohi mizlinè Saul, a ngaɗa: I rkaʼa, ara man kra Isai a mshkè a sam Achimélec, kra Achithub, te Nob.

¹⁰ Achimélec a ndzhoɗo Ndo nzi pèc pècèk a géɗ David. A mva na skwi nʼndi a civèɗ, a kafahi gwèsh Goliath, ndo Philistie.

¹¹ A Saul a nzlinde ndo, da bahka na Achimélec, ndo mvi skwi a Zhiklè, kra Achithub, a ndohi gi bab na tèlèba, ndohi mvi skwi a Zhiklè te Nob. A ta shkè tèlèba a sam bai.

¹² Saul a ngaɗa: Achithub! Tsena ma ga! A nengaʼa a mʼmbeɗa na a ma: Awi a bi ga!

¹³ A Saul a ngaɗa na: Kin humdokoy ma a gèɗ, kinè a kra Isai, a ka va na movar a tsakwal, a ka ndzhoɗo Ndo nzi pèc pècèk a géɗ nengaʼa, èhèmè? Nengaʼa a grè gèɗ a sam ga, a gi shèwa a iyè, ara man a gi a patsna.

¹⁴ Achimélec a mʼmbeɗa na a ma bai: Ndo nlèɓèslèa gar David te va ɓèlèlihi ngaya, wa? Nengaʼa rnèsh bai, bi a géɗ ndohi mɓer géɗ bai, ndohi gi ngaya tèlèba ta slébèrdèʼa.

¹⁵ I hinè njhèdè Zhiklè a géɗ nengaʼa a patsna genè dè? Aʼai! Bai da fa nga mali a gèɗ a ɓèl ngaya a géɗ ndohi gi bab nga ɓai! Aman ɓèl ngaya a sun skwi ɓi pal ba, ko skwi nkèshèa, ko skwi mbiaʼa.

¹⁶ Aman bai a ngaɗa: Sèi ka metsi ngaya, kinè a ndohi gi bab ngaya tèlèba!

¹⁷ Bai a ngaɗa ta golahi nengaʼa man ta zlatsa a pa: Vo-washkè, va-bazl ta ndohi mvi skwi a Zhiklè Ndo nzi pèc pècèk. Tengaʼa ta humda ma ta a nda David. Ko ta suna, David a hi na, ta ngray ɓai. Aman golahi bai ta woy a ta slèmbèdè a ta bazl ta ndohi mvi skwi a Zhiklè Ndo nzi pèc pècèk ɓai.

¹⁸ A bai a ngaɗa na Doeg: Sèi ka, ka shkè a ka bazl ta ndohi mvi skwi a Zhiklè. A Doeg, ndo Edom, a mshkè, a mbazl ta ndohi mvi skwi a Zhiklè, a mbazl ta ndohi 85 a pats sa, ndohi a maslaka Ephod a va.

¹⁹ Bai a mbazl ta ndohi a tsakwal te kokwar Nob, kokwar ndohi mvi skwi a Zhiklè – ngurhi a ngwozihai, wudahi a wudahi a rai, zlè-hai, kdèhihai, tambakihai, tèlèba a mbazl ta a tsakwal.

²⁰ Sèi kra Achimélec stadgenè, nte verzi Achithub, nzlembaɗ na Abiathar, a mwuc na a sam David.

²¹ Abiathar a nʼngra na David, ara man Saul a mbazl ta ndohi mvi skwi a Zhiklè.

²² A David a ngaɗa na Abiathar: I sun te va nasa ba, a i gaɗa Doeg, ndo Edom, man a nza pa, a di a hada na ma a Saul. Ndohi gi ngaya tè-lèba ta bazl ta a géɗ ga.

²³ Nza a sam ga, ka gu zlau bai! Ndo man a woya a nzede nshèffè ngaya, a woya a nzede nshèffè ga ba. A sam ga ka da nzi taraʼa.