I Samuel 21 - Ma Zhiklè

David a wuc na a vèvèɗ te za Adullam

¹ David a ndo Nob, a sam Achimélec, ndo mvi skwi a Zhiklè. Achimélec a nhaka na ma a David a zlau, a ngaɗa: Ka shkè a géɗ ngaya èhèmè, kin shkè a ndo ngiɗè azɓi èhèmè?

² David a mʼmbeɗa na a ma Achimélec, ndo mvi skwi a Zhiklè: Bi a zlindekayè, a nga-dayè, ndo ngiɗè da sun skwi man i zlinda ka a pa, a i gaɗa ka, ɓai. A géɗ nengaʼa i zlinde ta ndohi ga ba a sam ngiɗè tsaɗ.

³ Anai, movar 5 te ri ngaya dè? Tsakayè, ko skwi man ka ngotso.

⁴ Ndo mvi skwi a Zhiklè a mʼmbeɗa na a ma a David: Movar ambalai az a sam ga ɓai, sèi movar nkezlaʼa. Sèi a ndohi man ta mana a ngwoz ɓai.

⁵ David a mʼmbeɗa na a ma ndo mvi skwi a Zhiklè. Ayah! Nʼnzi a zhè nga mana a ngwoz ɓai, ta va nga civèɗ ɓai. Aman i do var, ndohi ta ɓür va ta. A ta gau arsa a géɗ skwi herkeda ambalai, va ta ntila holholaʼa a patsna.

⁶ Te deɓaʼa ndo mvi skwi a Zhiklè a mva na movar nkezlaʼa, a géɗ man movar ngiɗè azɓai, sèi movar gi Zhiklè, man ta co auda a sam di Ndo nzi pèc pècèk. A pats man ta vi mɓuaʼa a pa, a ta hil movar mʼmovaʼa auda.

⁷ A pats nasa, ɓèl Saul staɗ, nzlembaɗ na Doeg, ndo Edom, ndo mɓer ndohi nwèr tambaki Saul, a zhè, mpizlèda gai a sam Ndo nzi pèc pècèk.

⁸ David a ngaɗa na Achimélec: Ka ngots tsakwal, man ɓai kafahi gwèsh a haha ɓi dè? I shkè a tsakwal ga a skwi var ga te ri ɓai, a géɗ man bai a mvasedekayè.

⁹ Ndo mvi skwi a Zhiklè a ngaɗa: Na haha kafahi gwèsh Goliath, ndo Philistie, man ka keɗaʼa te slrats Térébinthe, na zhè tʼhwaɗ Ephod, mpaha te maslaka. Aman ka woyaʼa, co – ngiɗè asaɓai. David a ngaɗa: Ngar nengaʼa azɓai. Vayè!

¹⁰ Te deɓaʼa David a nslambaɗa, a mhu na a Saul a pats sa, a mshkèda sam Akish, bi Gath.

¹¹ Ɓèlèlihi Akish ta gaɗa na Akish: Nengaʼa David, bi kokwar ka ɓi ɗè? Nengaʼa man ta slébèrdè a dimèsh ka ɓi ɗè, a ta gaɗa: Saul a mbazl ta mayamhi na gozhèm, aman David a mbazl ta mayamhi na gozhèm 10.

¹² A ma haha a mpa na zlau a gèɗ a David, a gi zlau Akish, bi Gath.

¹³ A géɗ nengaʼa a gu ara man gèɗ na ndzakaɓa, a gu ara ndo madzagai te ri ta. A ntsau ntamagai, a maslokof a nhaka te ma, a hi a va bozozom.

¹⁴ A Akish a ngaɗa ta ɓèlèlihi nengaʼa: Kin rka, ndo haha, skwa a ga na. Kin ckoɗa sam ga èhèmè?

¹⁵ Ndohi man skwi ngiɗè a ga ta, ta zhè a sam ga kumba ɓi dè, a kin Ckoy nengaʼa a vaʼa, a kin gay matakwan a skwi ndohi madzagai èhè-mè? Nengaʼa a da pèrè a gi ga mè?