I Samuel 20 - Ma Zhiklè

David, mandal Jonathan

¹ David a mwuc na te Najoth, a tsagi Rama, a mshkè a sam Jonathan, a ngaɗa na: I ga mè? Mali ga mè, i ga ambaɓia a sam bab ngaya mè, aman a woya a nkedyè?

² A nengaʼa a ngaɗa na: Ayah! Ka metsi azɓai! Na haha, bab ga a gi skwi ngiɗè azɓai, ko mbiaʼa ko nkè-shèa, sèi a ngray dai. Bab ga a nghédè skwi a sam ga azɓai. Ma ambalai.

³ David a mʼmenda na a géɗèʼa: Bab ngaya a suna, i ambaha ka. A da hur: dara i ngra na Jonathan ɓai, man ɓai a da dza na a ndav. Aman ara man nshèffè ngaya a zhè, sak ga staɗ te vèvèɗ, ngiɗè tʼuda.

⁴ Jonathan a ngaɗa na David: Ka jhèɗè a sam ga mè?

⁵ David a ngaɗa na Jonathan: Angoslèm, ki a vèngè. Ar i da ndi skwi a nda bai. Aman vay civèɗ a i nghédè va ga te dak, ha dakwaɗ.

⁶ Aman bab ngaya a rka, iyè azɓai, a ka gaɗa na: David a ndzhoɗo civèɗ a sam ga, aman a dè Bethléhem, a kokwar bab na, te man ta zli skwi a Zhiklè te pa, a géɗ gwoli nengaʼa tèlèba, ara man ta gi a mvi a mvai.

⁷ Aman a da gaɗa: Amba! A da gi amba a sam ɓèl ngaya. Aman a da gi ndav, ka suna, a nhur skwi ambaɓiaʼa.

⁸ Gar haha ɓèl ngaya da se ka te va, kin derzla ma a ɓèl ngaya ma. Aman mali ga a zhè, dara ka, ka kedyè. Ka woy a ka dyè a sam bab ngaya èhèmè?

⁹ Jonathan a ngaɗa: Ayah! az arsa ɓai! Aman i da rka, bab ga a nhur skwi ambaɓiaʼa a géɗ ngaya, i da ngreda ka azɓi dè?

¹⁰ David a ngaɗa na Jonathan: Aman bab ngaya a da gaɗa ka a wuɗai, ar a woy ndo ngiɗè a zhè, a nda mendayè.

¹¹ Jonathan a ngaɗa na David: Ngo-do dak! A to do dak, cèw ba.

¹² Jonathan a ngaɗa na David: Ndo nzi pèc pècèk, Zhiklè Israel, a gi malwudai: Gar angoslèm, gar anvakastaɗ, i da pèr ma auda tʼhwaɗ bab ga. Aman ka nʼngots pombai a sam di na, i da zlindè ndo a sam ngaya, a da ngra ka, a vava.

¹³ Ndo nzi pèc pècèk da gay skwi ambaɓiaʼa: aman bab ga a da hér skwi ambaɓiaʼa a géɗ ngaya, i woy a i ngreda ka, a i va ka civèɗ a ka dè ngaya, aman skwa da ga ka ɓai. A Ndo nzi pèc pècèk da zhè a nda ka, ara man a zhè a nda bab ga te va nasa.

¹⁴ Aman i zhè a nshèffè dai, gau aman i se ka te va, ara man nga si Ndo nzi pèc pècèk te va. Aman i da mets ga,

¹⁵ ka vay pombi ngaya a géɗ gi ga genè. Aman Ndo nzi pèc pècèk a da gedas ta mayamhi David, staɗ staɗ tèlèba tʼherkeda,

¹⁶ nzlembaɗ Jonathan da gedassa ɓai, da nza a nda gi David. Aman Ndo nzi pèc pècèk da gedassa mayamhi David, a ta pil gèɗ.

¹⁷ Jonathan a mʼmenda na a géɗèʼa a David zaʼa, a géɗ man a woya a ndav na. A woyaʼa ara man a woy nshèffè na.

¹⁸ Jonathan a ngaɗa na: Angoslèm ki a vèngè. Ta da suna, ka azɓai, ka az a a sam nʼnzi ngaya ɓai.

¹⁹ Anvakastaɗ holholaʼa, aman ta da ngats ka bai. Te deɓaʼa a ka shkè a sam man ka nghede va ngaya a pa a pats ngiɗè, a ka nza a tsagi kwazlazlam.

²⁰ Anvakastaɗ i da ɓèr sulom a samaʼa, ara man i woy a i livè samaʼa.

²¹ Te deɓaʼa i da zlindè gol ga. Do, a ka cko sulom! Aman i da gaɗa na gol ga: Na haha, sulom a zhè a ma ngaya tʼuna, do a ka ckoɗa! – a ka shkè, skwi a gi amba a sam ngaya, skwi mwuɗitpa azɓai, ara man Ndo nzi pèc pècèk a zhè.

²² Aman i da gaɗa na gol ga: Na haha, sulom a zhè nte deɓ ngaya – do ngaya, aman Ndo nzi pèc pècèk a gaɗa ka arsa.

²³ Aman skwi man nga goɗ a ka, Ndo nzi pèc pècèk a da gi malwudai te ndev nga a mèdèp.

Jonathan a ngra na shèwa Saul a David

²⁴ David a nʼnghede va na te dak. Aman ki a nvanga, bi a nʼnzahai, aman a ndi skwai.

²⁵ Bai a nʼnza a sam nʼnzi na ara mpèc pècèk, a sam nʼnzi a dergai. Jonathan zuraʼa a ma nengaʼa, Abner a tsagi Saul. A sam nʼnzi David, ndo az a pa ɓai.

²⁶ A pats nasa, Saul a ngaɗa skwa ɓai, a nhur te ndav na: Ndav nengaʼa ntil ɓai, a ntila ndav nengaʼa di ɓai.

²⁷ Aman ko te mangoslèma ha, a sam nʼnzi David, ndo az a pa ɓi genè. Saul a ngaɗa na Jonathan, kra na: Mʼmèn ki cèw a zhiklè ma; ko patsna, ko adatsa, kra Isai a mshkè a sam skwi nʼndi ɓai, èhèmè?

²⁸ Jonathan a mʼmbeɗa na a ma Saul: Adatsa David a ndzhoɗo civèɗ a sam ga, a nde Bethléhem.

²⁹ A ngaɗa: Vay civèɗ, gwoli ga ta da zli skwi a Zhiklè a samaʼa, a kramamhi ga ta bahayè a pa. Aman i ambaha ka, vay civèɗ a i dè, a i da ngela ta di a kramamhi ga. A géɗ nasa a ndikakaɗa a sam skwi nʼndi bi ɓai.

³⁰ Saul a ngu ndav kumba a géɗ Jonathan, a ngaɗa na: Ka kra ngwoz mphomaʼa! I suna, ka woy, kra Isai a ndav ngaya. Hori a di kinè a mam ngaya.

³¹ Aman kra Isai a zhè tʼherkeda, ko ka, ko kokwar-bi ngaya a til azɓai. Gar haha zlündo ndo, a ta ckoɗa sam ga. Sèi a metsi na!

³² Jonathan á mʼmbeɗa na a ma Saul, bab na, a ngaɗa na: Da mets na èhèmè? A ge mè?

³³ A Saul a nzlatseda tsakwal, a woya a nkèlè kra na a vna. A Jonathan a suna, bab na a mʼmana ndav na, a woya a nkéɗè David.

³⁴ Jonathan a nslambaɗa a sam skwi nʼndai. Ndav a ndza na worworaʼa, a njè-keda skwi nʼndai te mʼmèn ki macecèwaʼa a zhiklè. A hér gèɗ a géɗ David, man bab na a dérɗèʼa.

³⁵ A prèk Jonathan to do a gol na a dak, ara man ta goɗ a David,

³⁶ a ngaɗa na gol na: Hau, a ka hulkoy sulomhi man i ɓèrèʼa. Aman gol nengaʼa a mhau, a mɓor sulom a ma gol na.

³⁷ Aman gola a ndikè a sam man sulom Jonathan a mɓoro a nkala a pa, Jonathan a mbaha na gol na: Sulom a ma ngaya!

³⁸ A Jonathan ambaha na gol na: Yau, yau, vaso va! Ka zlatsahi ɓai! A gol Jonathan a mɓic ta sulomhai, a nhelka ta a deɓa a sam bi na.

³⁹ Gola a sun skwi ngiɗè ɓai. Sèi Jonathan a David ta suna.

⁴⁰ Te deɓaʼa Jonathan a mva na skwi var a gol nengaʼa, a ngaɗa na: Do, a ka da a kokwar.

⁴¹ Aman gola a mdo, David a nslambaɗa a sam kwazlazlam, a nkala a herkeda, a nʼngheda di na, a ngurɓahi sak makar. A mandalahi cèw ta kelawda ri a daʼai a ta kuɗau a vata cèw cèw ba holholaʼa David,

⁴² A Jonathan a ngaɗa na David: Do a gumai! Skwi man nga cèw nga mbada a nzlembaɗ Ndo nzi pèc pècèk, Ndo nzi pèc pècèk a gi malwudai te ndev nga a ka, te ndev ndohi verzi ga a ndohi verzi ngaya a mèdèp.

⁴³ A David a nslambaɗa, a ndo na. A Jonathan a mʼmen na a deɓa a ngwai a kokwar na.