I Samuel 2 - Ma Zhiklè

Dimèsh Anne

¹ Anne a ntsu ri a Zhiklè, a ngaɗa: Ndav ga a wuffè te Ndo nzi pèc pècèk. Zhiklè a nslambaɗday gèɗ, a ndzegaryè a vata. Ma ga a winè twèng a sam mayamhi ga, aman i wuffè a gèɗ skwi man a takahayè a vna.

² Nkezlaʼa gar Ndo nzi pèc pècèk, nʼazbai. Ngiɗè azɓai, sèi ka. Sam gedeng-gedengaʼa ngar Bi Zhiklè nga, azɓai.

³ Kin tsurɗ ma ani asaɓai! Ma nfi va kin goɗ ɓai! Aman Ndo nzi pèc pècèk, Zhiklè man a sun skwi tèlè. Nengaʼa a livè skwi man ndohi ta gia tèlèba.

⁴ Lèkèɗ ndohi slagama ta pasl ta. Ndohi man wuɗi ta azbai ta dzawa va ta a ta ngècè wuɗai.

⁵ Ndohi man hwaɗ a gèɗ sèi ta dè a ta gi mizlinè hwaɗ; aman ndohi man hwaɗ az a gèɗ ɓai ta slaha ta gi ngolala. Ngwoz man delai a yi wuda tsaraɗ, a nengaʼa man wuda na a zhè a vata, a ngél na te ndeva ngiɗè.

⁶ Ndo nzi pèc pècèk a cè nshèffè, a vi nshèffè, a kédè ndo a vèvèɗ, a ckoɗauda te vèvèɗ.

⁷ Ndo nzi pèc pècèk a tèwèshè-dè ndo, a wèldè ndo, a manda na gèɗ a hi a ndo, a slambaɗa na gèɗ a ndo.

⁸ Mbelaw ndo a ftkoɗauda te mèrwèc, ndo ntawassaʼa a ckoɗauda te va koskosai, aman a nʼnzede ta a va bihai, a va ta sam nʼnzi bi mbiaʼa. Aman skwi ngshè verzi herkeda, a Ndo nzi pèc pècèk. A nfa na herkeda a gèɗ.

⁹ A ɓer sam sak ndohi nengaʼa man ta woy Zhiklè. A ndohi man ta woy Zhiklè ɓai, ta zi ta te ruva. Aman ndo a slaha skwi a wuɗi na ɓai.

¹⁰ Mayamhi Ndo nzi pèc pècèk ta bèzl ta. Zhiklè a gèɗ skwi télè te zhiklè te géɗèʼa a henzasl ta, Ndo nzi pèc pècèk a gi kita herkeda tèlèba. Da va na wuɗi a bi na, da slambaɗda na gèɗ, do slubordo ndo nengaʼa man a mbada na mbar a gèɗ.

¹¹ Te deɓaʼa Elkana a ndo a ngwai a Rama. Aman kra a ngu mizlinè Ndo nzi pèc pècèk a sam Eli, ndo mvi skwi a Zhiklè.

Wudahi Eli, falihai

¹² Wudahi Eli, ndohi falihai. Ta fa na gèɗ a Ndo nzi pèc pècèk azɓai,

¹³ ta fa na gèɗ a skwi man ndohi mvi skwi a Zhiklè ta ngècèʼa azɓai. Pèc pècèk man ndo ngiɗè a zlaha na skwi a Zhiklè, a ta ta zluèdèʼa, bigol ndo mvi skwi a Zhiklè a shkè, a magats man zlagam a gèɗ makar,

¹⁴ a ntarda a shiɗèf, man ɓai a gandaf, man ɓai a shiɗèf züdo, man ɓai a kizlèɗ, a mbürzlkoɗa, dèha na ma magats, a ndo mvi skwi a Zhiklè a nceda a va na. A ta gu arsa a sam ndohi Israel tèlèba man ta shkè a ta va na skwi a Zhiklè te Silo.

¹⁵ A sam ngiɗè, ga ta fi vogwa a mbeza, bigol ndo mvi skwi a Zhiklè a gaɗa na ndo nzlèh skwai: Tsaka na zluèɗ a ndo mvi skwi a Zhiklè, a mpinèʼa. A woy zluèɗ ntaʼa ɓai, a woy zluèɗ man adi te ri ngaya.

¹⁶ Aman ndo sa a ngaɗa na: Sèi da fa na vogwa a mbeza di kla, te deɓaʼa a ka co skwi ara man ndav ngaya a woyaʼa, – a ngaɗa na: Aʼai, sèi ka vi antanta. Man ɓai i cèkè a wuɗai.

¹⁷ Aranta mali golahi sa a gi a mbiaʼa a sam Ndo nzi pèc pècèk, te man ta rka skwi man ta va na Zhiklè ara skwi ambalai.

¹⁸ Samuel a ngu mizlinè Ndo nzi pèc pècèk, gèlèɓi kra, a maslaka Ephod, ntsentsai a va.

¹⁹ Mam nengaʼa a ndaha na sajibèr a mvi a mvai, a nda na a pats man ta dè a bab na, a ta da vi skwi a Zhiklè.

²⁰ Eli a mpshè ta ma a Elkana a ngwoz na, a ngaɗa: Ndo nzi pèc pècèk da pa ka wuda te ngwoz haha, te di nengaʼa man a va na Zhiklè.

²¹ Te deɓaʼa to do ngwai a kokwar ta, a Ndo nzi pèc pècèk a mpshè na ma Anne, a ngu a hwaɗ, a myu wudahi makar, a dalahi cèw. Aman Samuel, kra nguraʼa, a grè a sam Ndo nzi pèc pècèk.

²² Eli nhala kumba; aman a ntsena skwi ambaɓiaʼa man wudahi nengaʼa ta ga ta ndohi Israel tèlèba, a ta mana a va ngwozi man ta gu mizlinè a ma gi mɓicè va nkezlaʼa,

²³ a ngaɗa ta: Skwi man i tsena a sam ndohi tèlèba, kin gu arsa èhè-mè?

²⁴ Kin gu arsa ɓai, wudahi ga! Ma man ndohi Zhiklè ta zlèzlèmè a haha, ma ambaɓiaʼa.

²⁵ Ndo man a gu mali a ndo ngiɗè, Zhiklè a bazla na kita. Aman ndo man a gi mali a sam Zhiklè, ndè bèzlè kita nengaʼa wa? Aman ta fa na zlembaɗ a ma bab ta ɓai; aman Ndo nzi pèc pècèk a nhur a ngaɗa i da bazl ta.

²⁶ Samuel, gèlèɓi kra, a grè a ma ma, a nʼngots pombai a ma ma a sam Ndo nzi pèc pècèk, a sam ndohai.

Kita a gèɗ Eli

²⁷ Ndo Zhiklè ngiɗè a mshkè a sam Eli, a ngaɗa na: Ndo nzi pèc pècèk a goɗ aranta: I gudoko ta va a dai a ndohi gi bab ngaya, aman ta te kokwar Egypte, ta ɓèlèlìhi Pharaon dai.

²⁸ A i parka ta te pa, te va ndohi verzi Israel tèlèba, a ta gi mizlinè mvi skwi a Zhiklè a sam ga, a ta shkè a sam ga, a sam mvi skwi a Zhiklè, a ta fi vogwa a skwi man ta ndarayè, a ta fi maslaka Ephod ga a va. A i va ta mizlinè nzlèhè skwi a Zhiklè ndohi Israel tèlèba a ri a ndohi te gi bab ngaya.

²⁹ Ka gi di a skwi man i gaɗa ta a ta vayè èhèmè? Ka slebarde ta wudahi ngaya a fena iyè, a kin ndi tsuvom skwi man ndohi Israel ta vayè a hwaɗ kinè èhèmè?

³⁰ A géɗ nengaʼa Ndo nzi pèc pècèk, Zhiklè Israel, a gaɗa: A matsa i gaɗa: Ndohi gi ngaya a ndohi gi bab ngaya sèi ta zhè a sam ga pèc pècèk a mèdèp. Aman antanta Ndo nzi pèc pècèk a gaɗa: Da ga arsa ɓai! Sèi ndo man a sleɓardyè, i ba i slébèrdèʼa. Ndo man a kwolyè, a gédèsh na.

³¹ Na haha patsaʼa a di a shkè, a i bazl ta ndohi gi bab ngaya te gola, ndo a hèlè te gi ngaya azɓai.

³² Te deɓaʼa skwi mbelaʼa man i da ga ta ndohi Israel tèlèba, a da zlaha ka dai. Aman ndo a da hèlè te gi ngaya azɓai.

³³ Sèi staɗ man i woy a i gedassedaussa azɓai te va ndohi man ta vay skwai; a di ngaya a di a krèwèzl na, a dza ka a ndav a vata. Ndohi te verzi ngaya, man ta shfa ma, ta da bazl ta.

³⁴ Ka da shinè te skwi haha: Hophni a Phinées ta da bazl ta a pats staɗ.

³⁵ Aman iyè i woy a i baha na ndo mvi skwi a Zhiklè nlèɓèslèa, man a gi ara man i hur te ndav ga. I woy a i rama na gi man a nzi dai, a zhè a sam ga pèc pècèk, a sam nengaʼa man i bada na mbar a gèɗ.

³⁶ Njèkèɗi ndohi te gi ngaya, a di ta shkè a ta kèlèhai a deɓ sak na, a ta woy dala staɗ, a movar kètè, a ta gaɗa: Kam, kam, vay mizlinè mvi skwi a Zhiklè, ko mizlinè mèmè, a i ngècè skwi nʼndi kètè.