I Samuel 19 - Ma Zhiklè

Saul a woya a nkeɗa David

¹ Saul a ngaɗa na Jonathan, kra na, a ɓèlèlihi nengaʼa tèlèba: Ngo-kudokoy David! Aman Jonathan, kra Saul, a woy David kumba.

² A nʼngra na ma Saul a David, a ngaɗa: Saul, bab ga, a woya a nked ka. Aranta angoslèm a prèk, gau maya, a ka nghede va ngaya, a ka nza a sam nʼnghedaʼa.

³ I woy a i dè a i zlècè a tsagi bab ga te dak, man ka zhè a pa, a nga gèɗè a bab ga a gèɗ ngaya. Skwi man i da tsenaʼa, i da ngra ka.

⁴ A Jonathan a goɗ amba a gèɗ David a sam Saul, a ngaɗa na: Bai da gu mali a sam David, ɓèl na, ɓai! Aman nengaʼa a nʼnga mali a sam ngaya ɓai. Nengaʼa a ntakaha ka te skwi tèlèba kumba.

⁵ A nlaya nshèffè na ɓai, a nkeɗa ndo Philistie, a Ndo nzi pèc pècèk a nge ta ndohi Israel a ngul ndohi mbiaʼa. Ka ba ka rka a di ngaya, a ka wuf-fè a géɗèʼa. Ka woy a ka gi mali a sam ndo man nʼnga mali ɓai, a ka keɗa David ambali èhèmè?

⁶ A Saul a ntsena ma Jonathan, a ngaɗa: da metsa ɓai, ara man Ndo nzi pèc pècèk a zhè a vava.

⁷ Jonathan a mbaha na David, a nʼngra na ma haha tèlèba. A Jonathan a nʼnda David a sam Saul, a nengaʼa a nʼnza a sam na zaʼa, ara mpats ngiɗè.

⁸ Aman var a zhè zaʼa, a David a ndo var a ndohi Philistie, a ndzam ta, a ta hu ta auda a sam na.

⁹ Mèzhèɓ ambaɓiaʼa man Ndo nzi pèc pècèk a nzlündo, a ngso Saul. Saul a nʼnza te gi na, a tsakwal te rai, a David a ntsu ganzavar.

¹⁰ Saul a woya a nteza na David a va dergai, a tsakwal. Aman nengaʼa a mbezla va na, a tsakwal a ndza na dergai. Aman David a mhu na, a mwuc na a vaɗ.

¹¹ A Saul a nzlinde ta golahi nengaʼa a ntamagi David, a ta ɓerèʼa, aman a prèk ta da kéɗèʼa. Aman Mical, ngwoz David, a nʼngra na a metsar, a ngaɗa: Aman a vaɗ haha ka mbelda va ngaya azɓai, angoslèm a prèk ta da keɗ ka.

¹² A Mical a mbezda David auda a nvakavar, a David a mdo, a mhu na, a mwuc na.

¹³ A Mical a nco Théraphim, a mʼmanda a sam mʼmènè, a mbè gèɗ a gwots ɓok, a mva na maslaka a deɓa.

¹⁴ A Saul a nzlinde ta golahi nengaʼa, aman ta cko David. A nengaʼa a ngaɗa: Mbelakaɓai.

¹⁵ A Saul a nzlinde ta golahi nengaʼa zaʼa, a ta wèrèʼa, a ngaɗa: Va-zuɓkada sam mʼmènè na, a i keɗaʼa.

¹⁶ Aman golahi nengaʼa ta shkè, na haha Théraphim a sam mʼmènè, a gwots ɓok a sam nfi gèɗ na.

¹⁷ Saul a ngaɗa na Mical: Ka ngwodyè arsa èhèmè, a ka va na civèɗ a mayam ga, a mʼmbel na! Mical a ngaɗa na Saul: Nengaʼa a ngaɗayè: Jèkyè, man ɓai i keɗ ka!

¹⁸ A David a mhu na, a mwuc na, a mshkè a sam Samuel te Rama, a nʼngra na tèlèba man Saul a ga na. A to do a Samuel a ta nza te Najoth.

¹⁹ Ndohi ngiɗè ta ngra na Saul: Na haha, David a zhè te Najoth, a tsagi Rama.

²⁰ A Saul a nzlinde ta golahi nengaʼa, aman ta cko David. Aman ta rka mɓicè ndohi nhadka ma man ta hodko ma, a Samuel a ma tengaʼa, Mèzhèɓ Zhiklè a mshkè a gèɗ golahi Saul, a tengaʼa ba ta hodko ma.

²¹ Aman ta ngra na Saul, a nzlinde ta golahi ngiɗè; aman tengaʼa ba ta hodko ma. A nzlündo sak mamakaraʼa; aman tengaʼa ba ta hodko ma.

²² A nengaʼa a mdo Rama a ri na. Aman a ndikè a sam thal iyam Sé-cou, a ndzhoɗo: Samuel a David, ta tema? A ta mbeɗa na a ma: Te Najoth, a tsagi Rama.

²³ Aman te pa a ndo a ma a Najoth te Rama, Mèzhèɓ Zhiklè a mshkè a géɗ nengaʼa, a nhodko ma a civèɗ tèlèba, ha a ndikè a Najoth te Rama.

²⁴ A nengaʼa ba a nsuɗa maslaka nengaʼa auda a va, a nhodko ma a sam di Samuel, a nʼnza a pa adai, a pats sa, a vaɗ sa. A géɗ nengaʼa ta gèɗè a ta ngala na gèɗ: Saul ba te ndev ndohi nhadka ma dè?