I Samuel 18 - Ma Zhiklè

¹ Aman ta goɗ a Saul klèng ma, Jonathan ta gso mandala a David, a woyaʼa ara man a woy nshèffè na.

² Saul a mfeda David a gi na a pats sa, a mva na civèɗ ndè a deɓa a gi bab na asaɓai.

³ A Jonathan a nda David ta derzʼa ma ta, te man a woyaʼa kumba.

⁴ Jonathan a nsuɗa dawar maslaka na auda a va, a mva na David. Skwi var nengaʼa ba, a tsakwal nengaʼa, a lèkèd nengaʼa, a skwi mʼmèn hwaɗ nengaʼa ba.

⁵ A sam man Saul a nzlündo David a pa, maya na zhè, a Saul a nfu a nsal ndohi var tèlèba. Ndohi tèlèba, ɓèlèlihi Saul ba, ta woya kumba.

Saul a gi srak a géɗ David

⁶ Aman ta shkè ngwai, te deɓ man David a gu a ngul ndo Philistie ma, ngwozi ta shkè auda te kokwar Israel tèlèba a ta sli dimèsh, a ndohi ta gècè, a ta zli gèɗ a bi Saul, a ganga, a ganzavar, a ta wuffè.

⁷ Ngwozi ta slu dimèsh: Saul a mbazla mayamhi na 1.000; aman David a mbazl ta mayamhi na 10.000.

⁸ A Saul a ngu ndav a vata. Ma haha ambaha ɓai, a ngaɗa: Ta gaɗa a David 10.000, a ga ga sèi gozhèm staɗ. Njèkè na ngi bi mènè!

⁹ A Saul a ngu srak a géɗ David, a hinè a pats nasa, a ndè a ma ma.

¹⁰ Te mangoslèmaʼa, mèzhèɓ ambaɓiaʼa a ngso Saul te gi na, gèɗ na ndzakaɓa. A David a ntsu ganzavar, ara man a gu pats ngiɗè. Saul a tsakwal te rai.

¹¹ A Saul a ngeda tsakwal, a huro: I tizhè David a va dergai. Aman David a mbezla va na. Saul a nkola a tsakwal sak cèw.

¹² Saul a gi zlau David. Aman Zhiklè a zhè a nda David, a njèkeda Saul.

¹³ Gar haha Saul a nckoɗauda te gi na, a mfeda a bi ndohi 1.000, a ngaʼa a bi sojè, a gu do var, a shkè na ngwai.

¹⁴ Aman maya David a zhè a civèɗ nengaʼa tèlèba. Ndo nzi pèc pècèk a zhè a nda nengaʼa.

¹⁵ Aman Saul a nrkaʼa, maya David a zhè a vata, Saul a gudzi tototoʼa.

¹⁶ Ndohi Israel a Juda tèlèba ta woya David a ndav ta. Nengaʼa ndo ncè ta ma.

¹⁷ Saul a ngaɗa na David: Na haha, Mérab, tsuvom dem ga. I woy a i va ka a ngwoz. Aman sèi ka gi slagama, a ka gi var man Ndo nzi pèc pècèk a woya a ngiaʼa. Saul a nhur te ndav: I woy a i lama na a ri ga azɓai. Sèi ndohi Philistie da keɗaʼa.

¹⁸ David a ngaɗa na Saul: I wa? Gwoli ga, verzi bab ga te Israel wa, a i ndi a mèsh bai?

¹⁹ Aman a pats man ta woy a ta va na Mérab, dem Saul, a David, ta va na David ɓai, ta va na Adriel, te Mehola.

²⁰ Aman Mical, dem Saul, a woya David a ndav na. Aman ta ngra na Saul, ambaha.

²¹ Saul a nhur te ndav: I woy a i va na, a da ndi a gadda a ndohi Philistie ta keɗaʼa.

²² Saul a mfa ta ma a gèɗ a ɓèlèlihi nengaʼa tèlèba: Va-gaɗa na David a metsar: Na haha, ka ambaha bai, ka ambaha ta ɓèlèlihi nengaʼa tèlèba. Sei ka ndi a mèsh Saul.

²³ Ɓèlèlihi Saul ta gaɗa na David arsa. David a ngaɗa: Kin hur, ngi a mèsh bai, skwi nkèshèa dè? I ndo ntawassaʼa, i mbelaw ndo.

²⁴ Ɓèlèlihi Saul ta gaɗa na Saul arsa, a ta menda na: David a goɗ kata kata.

²⁵ A Saul a ngaɗa: Va-gaɗa na David: Bai a jhèɗè skwi ngwoz azɓai, sèi mbèbèc ngwon ndohi Philistie 100, a i ngècè skwi man ndohi Philistie a ta pelkay gèɗ. Aman Saul a nhur a woya ndohi Philistie ta da keɗa David.

²⁶ Aman ɓèlèlihi David ta menda na ma haha a David, ambaha David, a nʼnga a mèsh bai.

²⁷ A David a mdo, a nda ndohi na, a mbazl ta ndohi 200. A nhul mbèbèc ngwon tengaʼa, a ngeda na bi tèlèba, aman a ngi a mèsh bai. A Saul a mva na Mical, dem nengaʼa, a ngwoz.

²⁸ Aman Saul a nrka, Ndo nzi pèc pècèk a zhè a nda David, a ndohi Israel tèlèba ta woyaʼa,

²⁹ a gi zlau holholaʼa. A Saul a David ta mba a va asaɓai a mèdèp.

³⁰ A bihi Philistie to do var. Pèc pècèk man to do var, maya David a zhè a fena man a ɓèlèlihi Saul ngiɗè. A ta nzala nzlembaɗ nengaʼa a vata.