I Samuel 17 - Ma Zhiklè

Goliath a zlècè a sam ndohi Israel

¹ Ndohi Philistie ta ɓica ndohi ta a var, a ta ɓicko va a Soco, te kokwar Juda, a ta nza a ta ɗaha va te ndev Soco a Azeka, a tsagi Ephès-Dammim.

² Saul a ndohi Israel ta ɓicko va a ta nza te verzi za, a slrats Térébinthes, a ta jèwè va ta, aman ta da gi var a ndohi Philistie.

³ Ndohi Philistie ta a der za ngiɗè, a ndohi Israel a der za te civèɗ ngiɗè, slrats te ndevaʼa.

⁴ Te va ndohi Philistie, ngul ndo staɗ a mshkè auda, nzlembaɗ na Goliath, te kokwar Gath. Ngurè nengaʼa a tsi ri 6 a rètaʼa.

⁵ Pokwa züdo te gèɗ, limbèt a va, züdo a gi kilo 75.

⁶ Kotokoroh züdo te sak, a tsakwal züdo a daʼai.

⁷ Gaɗa tsakwal nengaʼa dazla ara nciɓè, züdo sulom a gi kilo 8. Ndo nzuɓa na gambar na a ndo a ma na.

⁸ A nzlatsa a mbaha ta ndohi Israel: Kin shkè a kin dzawa va a var haha èhèmè? I ndo Philistie, kinè bèlèlihi Saul ka ɓi dè? Va-zlündekoɗi ndo te va kinè staɗ, a nga da zli gèɗ a vna.

⁹ Aman nga gi var a vna, aman a slaha a nkedyè, nga tèlèba nga gi a ɓèlèlihi kinè. Aman i fenaʼa, a i keɗa nengaʼa, kin ndi a bèlèlihi nga.

¹⁰ Ndo Philistie a ngaɗa: A patsna i ngwossaha ta ndohi var Israel. Va-zlündekoy ndo staɗ, a nga gi var a vna!

¹¹ Saul a ndohi Israel tèlèba ta tsena ma ndo Philistie, a ndav ta a mbedè, a ta gu zlau a vata.

¹² David, kra ndo Ephrata te Bethléhém, te Juda, man nzlembaɗ na Isai. Wudahi nengaʼa 8. Isai nhala ma, hurnjüfnjüfaʼa, te ndev man Saul bi dai.

¹³ Tsuvomhi Isai makar to do var a nda Saul. Nzlembaɗ wudahi makar sa, man to do var: Tsuvomaʼa Eliab, mbegéɗèʼa Abinadab, mamakaraʼa Shamma.

¹⁴ David, ntabaw ta. Tsuvomhia sa makar to do a verzi Saul.

¹⁵ David, pats ngiɗè pats ngiɗè a njèkeda Saul, a ndè wèr tambakhi bab na te Bethlèhem.

¹⁶ Ndo Philistie a nzlatsa a pa a prèk, a dakwaɗ, a prèk, a dakwaɗ.

¹⁷ Isai a ngaɗa na David, kra na, pats ngiɗè: Na haha dau maras agoda 10, a movar 10, hulo a ka da ta kramamhi ngaya a dal var.

¹⁸ Mbar wa 10 da na bi sojè, a ka ngela ta di a kramamahi ngaya, ta nza genè dè? Dzhoɗo, aman ta vaka ka skwi a rai.

¹⁹ Saul a ndohi Israel tèlèba ta te slrats Térébinthes, aman ta gi var a ndohi Philistie.

²⁰ David a nslambaɗa a prèk te gai, a njèka ta tambakihi a ri ndo nwar ta, a nco skwai, a ndo, ara man Isai a ngra na. A ndikè a sam mɓicè ndohi var, a ndohi var ta ɗaha va a ta guzlai.

²¹ Ndohi Israel a ndohi Philistie ta ɗaha va kurrèʼa.

²² David a nzuɓda skwi na hai, a mva na a ri mdo mwèr kolongwai, a mhi a va ndohi var, a ndè wèr kramamhi na.

²³ Aman ta gèɗè a nda ta, ngul ndo, nzlembaɗ na Goliath, ndo Philistie, te Gath, a mshkè auda te va ndohi var Philistie, a ngaɗkaɗa lèmèlèmè ara pèc pècèk, a David a ntsenaʼa.

²⁴ Ndohi Israel tèlèba ta hu ta, aman ta rka ndo sa; ta gu zlau nengaʼa.

²⁵ Ndohi Israel ta goɗ a va ta: Kin rka ndo nzlatsa haha cè? A zlatskaɗa, a ngwossaha Israel. Ndo man a keɗaʼa, bai a woya a nʼnga a ndo mèshèlè, a va na dem nengaʼa a ngwoz, a gi bab na a da pi budu asaɓai te Israel.

²⁶ David a ndzhaɗ ta ndohi a sam na: Ndo man nda keɗa ndo Philistie haha, a ncèma na hori auda a di a Israel, ta da ga na kè? Ndo Philistie, man ngwon nʼngela ɓi haha, wa, aman a shkè a derde ta ndohi var Zhiklè man a zhè a nshèffè.

²⁷ Ndohi ta gaɗa na lèmèlèmè: ndo nkeɗaʼa a ngè-cè kata kata kata.

²⁸ Aman Eliab, kramam na tsuvomaʼa a ntsenaʼa, ta goɗ a ndohai, a ngu ndav a géɗ David, a ngaɗa: Ka shkè mè, ka jèkeda tambaki tʼhèshèkèɗ a ri ngè? I suna, ka gre gèɗ ngaya, a ka hur skwi ambaɓiaʼa te gèɗ. Ka shkè a ka wèr var genè.

²⁹ David a mʼmbeɗa na a ma: I ga be mè? I slaha i gèɗè a ndo ɓi ɗè?

³⁰ A njèkeda a pa, a ndzhoɗo a sam ndo ngiɗè, a ndohi ta gaɗa na lèmèlèmè ara nshèlèkuraʼa.

David a keɗa Goliath

³¹ Aman ndohi ta tsena ma David, ta menda na Saul. A nengaʼa a mbaha na.

³² David a ngaɗa na Saul: Bi ga, ka gu zlau ɓai! Ɓèl ngaya a dè a gi var a nda ndo Philistie.

³³ Aman Saul a ngaɗa na David: Ka slaha a ka dè a sam ndo Philistie haha a ka gi var a nengaʼa ɓai. Ka wudahi dai, aman nengaʼa ndo var daga gola.

³⁴ David a ngaɗa na Saul: Ɓèl ngaya a wèr tambakhi bab na. Aman marizhèlè, aman kokoya, a mshkè, a ngso tambak a rèwè staɗ,

³⁵ i hai a i koldokoɗa, a i keɗaʼa, a i wurkoɗauda te ma nengaʼa. Aman a nslambaɗkay a va, i gshè daʼaiaʼa, a i keɗaʼa.

³⁶ Ɓèl ngaya a keɗa marizhèlè a kokoya: a ndo Philistie man ngwon nʼngela ɓi haha, da ga na lèmèlèmè ar haha, a gèɗ man a nderɗe ta ndohi var Zhiklè man a zhè a nshèffè.

³⁷ David a ngaɗa: Ndo nzi pèc pècèk man a mbelyè te ri marizhèlè a kokoya, a da mbelyè te ri ndo Philistie haha ba. A Saul a ngaɗa na David: Do, Ndo nzi pèc pècèk da zhè a ka!

³⁸ Saul a mva na maslaka var a va David, a mva na pokwa züdo a gèɗ, a limbèt a va.

³⁹ A mva na kafahi gwèsh, a zlazlar, a va skwi var a va nengaʼa. A David a hinè ndè, nsleba aranta di ɓai. David a ngaɗa na Saul: I slaha a i dè a vna ɓai, i senda di ɓai. A David a nsuɗda skwi var a hi tèlèba.

⁴⁰ A nceda gaɗa na a rai, a mpor krengaz zlam te woyam, a mpeda gozhèm, man a war tambakhi a vna, a va. A mco vangava, a nzlatsa na va a ndo Philistie.

⁴¹ Ndo Philistie a nherda na va a David a maya maya, a ndo nzuɓa na gambar na a ma na.

⁴² Ndo Philistie a mpu dai, a nrka David, a ngwèshè a géɗèʼa, a gèɗ man wudahi dai, ndo ntevaʼa, ndo amba te dai hudemshaʼa.

⁴³ Ndo Philistie a ngaɗa na David: I kda dè, aman ka shkè a sam ga a gaɗa? A nzurɗo David a nzlembaɗ zhikhlèhi na.

⁴⁴ Te deɓaʼa a ngaɗa na David: Washkè genè, i da vi zluèɗ va ngaya a mohodokihai tʼhwaɗ gidfèk, a skwi dakhai.

⁴⁵ Aman David a ngaɗa na ndo Philistie: Ka, ka shkè a sam ga a tsakwal, a kafahi gwèsh, a gambar; aman iyè i dè a sam ngaya a nzlembaɗ Ndo nzi pèc pècèk, Zhiklè Bi wuɗai, Zhiklè ndohi Israel man ka derɗaʼa.

⁴⁶ A patsna Ndo nzi pèc pècèk a mvay ka a rai, i da keɗe ka, a i ngela gèɗ ngaya. I da va ta nckondohi Philistie a patsna a mohodokihai tʼhwaɗ gidfèk, a skwi dakhai. A herkeda tèlèba da suna, Zhiklè te Israel a zhè,

⁴⁷ a ndohi var haha tèlèba ta suna, Ndo nzi pèc pècèk a gi ndo a ngul ndo a tsakwal a kafahi gwèsh ka ɓai; aman var a Ndo nzi pèc pècèk, a nengaʼa a da pe kinè tèlèba a ri nga.

⁴⁸ Aman Goliath a nslambaɗa a mshkè, a nherda na va a David, tsam-tsam David a mhu a civèɗ ndohi var Philistie, a sam ndo Philistie.

⁴⁹ David a ntarda ri a gozhèm, a mco krengaz staɗ, a mfeda vangava, a nkelwaɗaʼa, a nkè-lèʼa, a ndza na ndo Philistie a medi na. A ndo Philistie a ntuzlomahi a ma.

⁵⁰ Arsa David a mfena ndo Philistie a vangava a krengaz, a ndza na ndo Philistie, a nkeɗaʼa, kafahi gwèsh a te ri na ɓai.

⁵¹ David a mhau, a mbatsaha sak a va ndo Philistie, a mpho kafahi gwèsh ndo Philistie, a nkeɗaʼa a vèvèɗ, a nʼngelama na gèɗ. Aman ndohi Philistie ta rkaʼa, ngul tengaʼa a mʼmets na ma, ta hu ta.

⁵² A ndohi Israel a ndohi Juda ta slambaɗa, ta rubai, a ta dzam ta ndohi Philistie ha ndè Gath, a ntamagi Ekron. Nckondohi Philistie ta mana a civèɗ, a hinè te Shaaraim, ha ndè Gath a Ekron.

⁵³ Te deɓaʼa ndohi Israel ta jèkeda nhi a verzi ndohi Philistie, a ta menkada deɓa, a ta hul skwi a sam nhèyè va Philistie.

⁵⁴ David a nco gèɗ ndo Philistie, a ndaʼa a Jérusalem. Aman skwi var nengaʼa a mfeda a gi na.

Saul a slébèrdè David

⁵⁵ Aman Saul a nrka, ara man David a keɗa ndo Philistie, a ngaɗa na Abner, bi sojè: Abner, kra haha, kra ngè? Abner a ngaɗa: Bai, ara man ka zhè a nshèffè, i sun ɓai.

⁵⁶ Bai a ngaɗa: Dzhoɗo, kra haha kra ngè?

⁵⁷ Aman David a mshkè a deɓa, te deɓ man a ngul ndohi Philistie ma, Abner a nco, a ndaʼa a sam Saul. David, gèɗ ndo Philistie te rai.

⁵⁸ Saul a ngaɗa na: Kra ga, ka kra ngè? David a ngaɗa: Kra Isai, ɓèl ngaya, te Bethléhem.