I Samuel 16 - Ma Zhiklè

Samuel a mbada na mbar a gèɗ a David, a ngi a bai

¹ Ndo nzi pèc pècèk a ngaɗa na Samuel: Ka lèyè Saul tè ngèmè? I kwola ma, i goɗ da gau bi Israel asaɓi ma. Ndheda mbar a gatsak, do, i woy a i zlinde ka a sam Isai, ndo Bethléhem. I ngots te va wudahi nengaʼa staɗ a bai.

² Samuel a ngaɗa: I slaha a i dè dè? Aman Saul nda tsenaʼa, a da keɗyè. Ndo nzi pèc pècèk a ngaɗa na: Co kra zlè a ko do a ka gaɗa: I shkè aman i da zli skwi a Ndo nzi pèc pècèk.

³ A ka baha na Isai a pa. Iyè a ri ga i da ngra ka skwi man ka da giaʼa. Ka da bada na mbar a gèɗ a nengaʼa man i da ngra ka.

⁴ Samuel a ngau ara man Ndo nzi pèc pècèk a gaɗa na. Aman a nshkè Bethléhem, ndohi nhalaʼa te kokwar ta haka na ma a zlau a ta gaɗa: Ka shkè amba genè cè?

⁵ Nengaʼa a ngaɗa: Halau! I shkè a i da zli skwi a Ndo nzi pèc pècèk. Va-tila ndav kinè, a kin ndi skwi man nga zli a Zhiklè! A ngaɗa na Isai a wudahi nengaʼa ba, aman ta tila ndav ta, a mbaha ta a sam skwi man a zla na Zhiklè.

⁶ Aman ta shkè, Samuel a nrka Eliab, a nhur te ndav: A vava nengaʼa man Ndo nzi pèc pècèk a woya a bai, a woya a mbada na mbar a gèɗ.

⁷ Aman Ndo nzi pèc pècèk a ngaɗa na Samuel: Ndo da ga ka di ɗokɗoka ɓai! Ka hur a géɗ ndo ngurèa ɓai! I woy nengaʼa ɓai. Zhiklè a woy ndo te di azɓai, ara man ndohi ta woyaʼa. Ndohi ta woy ndo te dai; aman Zhiklè a pi di a ndav.

⁸ A Isai a mbaha na Abinadab, aman a zlècè a sam Samuel. Samuel a ngaɗa: Ko nengaʼa ba, Ndo nzi pèc pècèk a nhera a géɗ nengaʼa ɓai.

⁹ A Isai a mbaha na Shamma. Samuel a ngaɗa: Ndo nzi pèc pècèk a nhera a gèɗ nengaʼa ɓai.

¹⁰ A Isai a mbaha ta wudahi nengaʼa 7 a sam Samuel. Aman Samuel a ngaɗa na Isai: Ndo nzi pèc pècèk a nhera a gèɗ tengaʼa ɓai.

¹¹ A Samuel a ndzhoɗo Isai: Ndèl wud ngurhi ngaya ma ɗè? A mʼmbeɗa na a ma: Njèkè ntabawaʼa, a wèr tambakihai. Samuel a ngaɗa na Isai: Zlündo ndo, da bahka na. Nga ndi skwi nʼndi azɓai, sèi nengaʼa a zhè.

¹² A ta zlündo ndo a ta baha na. Gola, ndo ntevaʼa, va nengaʼa amba sandalangaʼa, kra amba te dai hudemshaʼa. Ndo nzi pèc pècèk a ngaɗa na Samuel: Slambaɗa! Bada na mbar a gèɗ. Nengaʼa!

¹³ A Samuel a nco gatsak a mbar, a mbada na a gèɗ, te ndev kramamhi nengaʼa, a Mèzhèɓ Ndo nzi pèc pècèk a nshkè a gèɗ David, a hinè te pats sa, a nʼnza a géɗ nengaʼa. A Samuel a nslambaɗa, a ndo Rama.

David a tsi ganzavar te gi Saul

¹⁴ Aman Mèzhèɓ Ndo nzi pèc pècèk a mshkè auda a géɗ Saul ma, mèzhèɓ ambaɓiaʼa man Ndo nzi pèc pècèk a nzlündo a sam na, a nʼnga na matakwan.

¹⁵ Bèlèlihi Saul ta gaɗa na: Mèzhèɓ ambabiaʼa a ga ka matakwan!

¹⁶ Bi nga da goɗa! Ɓèlèlihi ngaya ta zhè ta da woy ndo, man a sun ntsi ganzavar amba. Aman mèzhèɓ ambaɓiaʼa a ga ka, da tsu ganzavar, a da gi daraʼa.

¹⁷ Saul a ngaɗa ta ɓèlèlihi nengaʼa: Vo-do, va-woy ndo mènè, ndo man a sun ntsi ganzavar: a kin ckoɗa sam ga.

¹⁸ Staɗ te va ɓèlèlihi nengaʼa a ngaɗa: Na haha, i rka kra Isai te Bethlèhem man a sun ntsi ganzavar, ndo slagama, ndo ncèmma, va nengaʼa daɓaraʼa, Ndo nzi pèc pècèk a zhè a nengaʼa.

¹⁹ Saul a nzlündo ndo a sam Isai, a ngaɗa na: Zlündokoy David, kra ngaya, man a wèr tambakihai.

²⁰ Isai a nhul movar kula, duzlak barassa a kra ɓok, a nzlinda na Saul a ri a David.

²¹ David a hinè mizlinè a sam Saul, a Saul a woya kumba, a ngaʼa a ndo nzuɓa na skwi var na.

²² Saul a nzlündo ndo a sam Isai, a ngaɗa na: Va na civèɗ a David, da nza a sam mizlinè ga, aman nengaʼa ambahayè kumba.

²³ Aman mèzhèɓ ambaɓiaʼa a ga na Saul, David a nco ganzavar, a ntsiaʼa. A va Saul a nga langlangaʼa, a nʼnga na daraʼa, a mèzhèɓ ambaɓiaʼa a mʼmende va na a deɓa a sam na.