I Samuel 14 - Ma Zhiklè

Var a ndohi Philistie

¹ Pats ngiɗè, Jonathan, kra Saul, a ngaɗa na gol nzuɓa na skwi var na: Washkè, ngo-do auna, a sam nʼngélè ndohi Philistie tʼwuda ngata. Nʼngra na skwi haha a bab na ɓai.

² Saul a nʼnza a ma kuma Guibéa, a verzi wof cozledök man a zhè a tsagi hedak. Ndohi var man ta zhè a sam na, ta gi 600.

³ Achija, kra Achithub, kramam I-Kabod, kra Phinées, kra Eli, ndo mvi skwi a Zhiklè te Silo, maslaka Ephod a va. Ndohi ta sun a ta gaɗa Jonathan kal na ɓai.

⁴ Civèd ndè a sam nʼngélè ndohi Philistie mpaʼa man Jonathan a woya a bizhè a pa, za a gu zlatska tʼuna, zlatska Tuna. Za ngiɗè ta baha na Botsets, ngiɗè ta baha na Séné.

⁵ Za ngiɗè a zlatskaɗa a ma Micmash, te civèɗ man a géɗèʼa, ngiɗè a ma Guéba, te tsagi ngiɗè.

⁶ Jonathan a ngaɗa na gol nzuɓa na skwi var nengaʼa: Washkè, ngo-do auna a sam nʼngélè ndohi man ngwon ta nʼngel ɓi mpaʼa. Gar Ndo nzi pèc pècèk a takaha nga. A sam Ndo nzi pèc pècèk wuɗi a te pa ɓai, a gi a ngul skwai, ko ndo a vata, ko ndo az a vata ɓai.

⁷ Gol nzuɓa na skwi var nengaʼa a mʼmbeɗa na a ma: Gau ara man ka woyaʼa. Iyè a sam ngaya. Skwi man ka woyaʼa, i ba i woyaʼa.

⁸ Jonathan a ngaɗa: na haha, nga woya nga dè auna a sam ndohai, a nga ngreda ta va dai.

⁹ Aman ta da gaɗa nga: Va-zlatsa a pa, ha nga ndi-kè a sam kinè! Nga zlècè a samaʼa, a nga dè a ma a sam tengaʼa azɓai.

¹⁰ Aman ta da gaɗa nga: Vo-washkè a sam nga dakwa! Nga woy a nga dè a sam ta. Ndo nzi pèc pècèk a mpe ta a ri nga ma. Nga da shinè te skwi haha.

¹¹ Aman ndohi mɓer dal var Philistie ta rka ta, ndohi Philistie ta gaɗa: War dai, ndohi Hébreu ta shkè auda te vèvèɗ man ta ngheda va ta a pa!

¹² A ndohi mɓer dal var ta baha na Jonathan a gol nzuɓa na skwi var na, a ta gaɗa: Vo-washkè a sam nga genè, nga da ngra kinè skwi ngiɗè! Jonathan a ngaɗa na gol nzuɓa na skwi var nengaʼa: Washkè a verzi ga! Aman Ndo nzi pèc pècèk a mpe ta a ri ndohi Israel ma!

¹³ Jonathan a nteva a pa a ri tʼhai, a gol nzuɓa na skwi var na a verzi nengaʼa. Ndohi Philistie ta woy a ta hi ta a Jonathan, a nengaʼa a nked ta a hai, a gol nzuɓa na skwi var na a mbazl ta a vèvèɗ a verzi nengaʼa.

¹⁴ Aranta, te var nshèlèkuraʼa sa, Jonathan a gol nzuɓa na skwi var na ta bazl ta ndohi 20.

¹⁵ Zlau a ngs ta ndohi var mɓicaʼa tèlèba, a ndohi mɓer dal var ba, a nʼngélè mpaʼa ta gi zlau. Herkeda a gudzai, a zlau Zhiklè a ndza ta.

¹⁶ Aman ndohi nwèr skwi a Saul te Guibéa te Benjamin ta pu dai, ta rka nrubi ndohai.

¹⁷ Saul a ngaɗa ta ndohi man ta zhè a sam na: Va-wora, ndo nde na te va nga wa? Aman ta wora, na haha, Jonathan a gol nzuɓa na skwi var nengaʼa, ta azɓai.

¹⁸ Saul a ngaɗa na Achija: Cko koti nderzlè-ma! A pats nasa koti Zhiklè a zhè a sam ndohi Israel.

¹⁹ Aman Saul ta géɗè a ndo mvi skwi a Zhiklè dai, ta rubi holholaʼa a sam ndohi var Philistie mɓicaʼa. Saul a ngaɗa na ndo mvi skwi a Zhiklè: Jèkeda!

²⁰ A Saul a ndohi tèlèba man ta zhè a sam na, ta ɓica va. Aman ta ndikè a sam var, na haha ta kèlè a va ndo, ta jèkèɓè va.

²¹ Ndohi Hébreu, tengaʼa man ta zhè te va ndohi Philistie nʼnzi a zhè ma, a to do var a verzi tengaʼa, tengaʼa ba ta gu var a verzi ndohi Israel a ta takaha ta ndohi Saul a Jonathan.

²² Aman ndohi Israel tèlèba man ta ngheda va ta te za Ephraim, ta tsenaʼa, ndohi Philistie ta hu ta, tengaʼa ba ta hu a verzi ta, a ta bazl ta.

²³ A pats nasa Ndo nzi pèc pècèk a ge ta ndohi Israel aranta a ngul ta. A ta gu var ha ta ndikè a Beth-Aven. Ndohi tèlèba ta humda a va Saul, ta gi 10.000. Za Ephraim tèlèba, sam var genè.

Saul a woya a keɗa Jonathan

²⁴ A pats nasa Saul a ndzhoɗo skwi mwuɗitpa a sam ndohai, a ndzhoɗ aman ta jèkeda skwi nʼndai, a gu aman ta mbada: Ndo da ndau skwi ɓai, sèi i fa ta gèɗ a ndohi mayamhi ga dai. Ndo man a ndiaʼa, da phomda! A ndohi ta nda skwa ɓai.

²⁵ Sopor vongwom a zhè te dak.

²⁶ Aman ndohi ta ndikè a pa, dazli nʼndha te pa, aman ndo a tèrè azɓai. Ndohi ta gi zlau a gèɗ mʼmbèdè.

²⁷ Aman Jonathan a ntsena ma ndohi man ta mbada na bab na ɓai. A ntarda gaɗa te ri na a va vongwom, a nʼndau. A di nengaʼa a nciɗ na.

²⁸ Ndo staɗ a sam ndohai a ngaɗa: Bab ngaya a ndzhaɗ ta ndohai, aman ta mbèɗè: ndo da ndau skwi a patsna ɓai. Ndo man a ndiaʼa, da phomda!

²⁹ Ndohai ta tiɗ ta. Jonathan a mʼmbeɗa ta a ma: Bab ga a woya a nga ta matakwan a ndohai. Va-wora, di ga a nciɗa ma, a géɗ man i tor vongwom haha kètè.

³⁰ Kos man agassa ndohi ta ndau skwai, ar mayamhi kumba ta bazl ta a patsna. Aman antanta ndohi Philistie ta ze kumba ɓai.

³¹ A pats nasa ta dzam ta ndohi Philistie te Micmash a ndè Ajalon. Ntulè a nked ta ndohi kumba.

³² A ndohi ta kala na va a skwi man ta dumkodai, a ta hul tambakihai, zlèhai, wud zlèhai, ta zloho tʼherkeda, a ndohi ta ndau zluèɗ a pombaza ba.

³³ Aman ndohi ngiɗè ta ngra na Saul: Na haha, ndohi ta gi malai a sam Ndo nzi pèc pècèk. Ta ndi zluèɗ a pombaza ba. Saul a ngaɗa: Kin gi mphömè! Va-gudumbolkoɗi kwa mbiaʼa a sam ga!

³⁴ A goɗ a vaʼa: Va-kezlu gèɗ a va ndohai, a kin gaɗa ta: Staɗ staɗ da hulko zlè a tambak nengaʼa a sam ga, da zloho a haha, da ndau te deɓaʼa. Kin gu mali a sam Ndo nzi pèc pècèk, a kin ndau zluèɗ a pombaza ɓai! A ndohi tèlèba, staɗ staɗ a nhulko skwi man a nʼngotso, a nzloho a pa, man sam nkezawa ma.

³⁵ A Saul a nrama na sam mvi skwi a Ndo nzi pèc pècèk. Nasa sam mvi skwi a Zhiklè nshèlèkuraʼa man a nrama na.

³⁶ Te deɓaʼa Saul a ngaɗa: Ngo-hokoy a verzi ndohi Philistie a vaɗ haha, ngo-dogokoy metsar a pa, ga sam nciɗa nga, a nga jèkè ndo a pa ɓai, ko staɗ. Ta mbeda na a ma: Gau ara man ambaha ka. Aman ndo mvi skwi a Zhiklè a ngaɗa: Ngo-zlotsokoy a haha a sam Zhiklè dai!

³⁷ A Saul a ndzhoɗo Zhiklè: I do a verzi ndohi Philistie dè? Ka da pe ta a ri ndohi Israel dè? Aman Zhiklè a mʼmbeɗa na a ma a pats nasa ɓai.

³⁸ Saul a ngaɗa: Va-zlatsa a haha, kin tsuvomhi ndohi tèlèba, va-wora, ngu mali haha a patsna wa?

³⁹ Ara man Ndo nzi pèc pècèk a zhè a vava, nengaʼa man a ge ta ndohi Israel a ngul ndohai a patsna, ndo ngau, ko man Jonathan, kra ga, sèi a metsi na. Aman ndohi tèlèba ta mbeda na a pa ɓai, ko staɗ.

⁴⁰ Te deɓaʼa a ngaɗa ta ndohi Israel tèlèba: Kinè, va-zlatsa civèɗ ngiɗè, nga a Jonathan, kra ga, nga zlècè civèɗ ngiɗè. Ndohi ta gaɗa na Saul: Gau ara man ambaha ka.

⁴¹ Saul a ngaɗa: Ndo nzi pèc pècèk, Zhiklè Israel, ka mbeda na a ma a ɓél ngaya a patsna bi èhèmè? Aman mali ga, aman mali Jonathan, kra ga, Ndo nzi pèc pècèk, Zhiklè Israel, gau aman Urim a ngreda nga. Aman mali ndohi Israel ngaya, gau aman Thummim a ngreda nga. A malai a nkala ta a gèɗ a Jonathan a Saul, aman ndohai ta nzaʼa.

⁴² Saul a ngaɗa: Va-gu jimèr te ndev nga a Jonathan, kra ga. A jimèr a nkala na a gèɗ a Jonathan.

⁴³ Saul a ngaɗa na Jonathan: Ngrayè, ka ge mè? A Jonathan a nʼngra na, a ngaɗa na: I nèckoɗi vongwom a ma gaɗa te ri ga kèshkata genè. Ko i metsi ga, ambahay mènè!

⁴⁴ Saul a ngaɗa: Zhiklè da gay skwi ambaɓiaʼa – halau, Jonathan, sèi ka metsi ngaya!

⁴⁵ Aman ndohi ta gaɗa na Saul: Mè! Jonathan man a ge ta ndohi Israel a ndohi ngul ndohi mbiaʼa haha, da mets na dè? Wuɗitpa a sam nga! Ko gwots gèɗ nengaʼa staɗ da kala a herkeda ɓai! Aman skwi man a ngau a patsna, a ngau a nda Zhiklè. A ndohi ta prokodi Jonathan auda, aman a metsi azɓai.

⁴⁶ A Saul a njèkeda nhi a verzi ndohi Philistie, a ndohi Philistie to do ta ngwai.

Ndohi te verzi Saul

⁴⁷ Aman Saul a nʼngots bi kokwar Israel, a ngu var a mayamhi nengaʼa man ta tèu-da a pa tèlèba: a ndohi Moab, a Ammon, a Edom, a bi Tsoba, a ndohi Philistie. Ko sam man a ndo a pa tèlè, a ngu a ngul ta.

⁴⁸ A ngu skwi mbiaʼa, a mbazl ta ndohi Amalek, a mʼmbel ta ndohi Israel te ri tengaʼa man ta gu metsar a sam ta.

⁴⁹ Wudahi Saul: Jonathan, Jishvi a Malkishua. Dalahi nengaʼa: tsuvomaʼa Mé-rab, mbegéɗèʼa Mical.

⁵⁰ Ngwoz Saul, nzlembaɗ na Achinoam, dem Achimaats. Bi sojè nengaʼa, nzlembaɗ na Abner, kra Ner, kramam bab Saul.

⁵¹ Kis, bab Saul, a Ner, bab Abner, wudahi Abiel.

⁵² Ha Saul a mʼmets na, var a ndohi Philistie a ngéslè azɓai. Aman Saul a nrka nguraʼa amba a ngi var, ndo taraʼa, a bidèʼa a va ndohi var na.