I Samuel 13 - Ma Zhiklè

Saul a gi mizlinè ndo mvi skwi a Zhiklè a ri na

¹ Mvi Saul 30 aman ta feda a bai; a ngu bi a géɗ Israel mvi 2,

² a mpar ta ndohi 3.000 te ndev ndohi Israel: 2.000 ta humda va a nda Saul te Micmash, a za Béthel. 1.000 ta humda va a nda Jonathan te Guibéa, te Benjamin. Njèkèɗi ndohai a mpre ta staɗ staɗ a kokwar na.

³ Jonathan a nkeɗa bigol ndohi Philistie man a nza te Guéba. A ndohi Philistie ta tsena ara man ndohi ta gaɗa: Ndohi Hébreu ta jèkeda Saul. Aman Saul a ntsu tolom te kokwar tèlèba. Ndohi Israel tèlèba ta tsena ma haha:

⁴ Saul a nkeɗa bigol ndohi Philistie, a ndohi Israel ta ndara ta ndohi Philistie. A ndohi Israel tèlèba ta ɓica va a ta dzodzor Saul a Guilgal.

⁵ Aman ndohi Philistie ta ɓica va ma, a ta gi var a ndohi Israel. Kiki var 3.000. Ndohi plèsh 6.000. Ndohi sak rèdèdèa ara dzarai. Ta shkè a ta mana te Micmash, a tsagi Beth-Aven, te civèɗ mvèng pats.

⁶ Aman ndohi Israel ta rka, ndohi Philistie ta da ga ta matakwan, a da gi wuɗitpa a sam ta, ta ngheda va ta a gi za, te vèvèɗ, te slrats, a di kwa, a bodom, a vèvèɗ iyam.

⁷ Ndohi ngiɗè ta tèwèɗè woyam Jourdain, a to do a kokwar Gad a Galaad. Saul te Guilgal dai. A ndohi man a tsagi na tèlèba ta gi zlau.

⁸ Saul a zhèr Samuel mʼmèn 7. Aman Samuel a mshkè Guilgal ɓai. Aman ndohi var ta jèkeda Saul a pa a ta venda gèɗ ta,

⁹ Saul a ngaɗa: Vahelkay skwi man i zla na a i ndara na a nga humdè a Zhiklè. A Saul a nʼndara na skwi a Zhiklè.

¹⁰ Aman a ndara na skwi a Zhiklè klèng ma, tsam-tsam Samuel a mshkè. Saul a mdo aman a nga na mbalai.

¹¹ A Samuel a ngaɗa na: Ka ga mè? Saul a mʼmbeɗa na a ma: Aman i rka, ndohi ta jèkyè, ta venda gèɗ ta, a ka, ka shkè te pats mpèsl ri ɓai, a ndohi Philistie ta ɓica va ta te Micmash ma,

¹² i hur te ndav: Antanta ndohi Philistie ta da shkè a Guilgal, ga i va na skwi a Zhiklè. A i sassaya di ga, a i ndara na skwi a Zhiklè.

¹³ Samuel a ngaɗa na Saul: Ka gau ambaɓai! Aman agassa ka dzodzor ma man Ndo nzi pèc pècèk, Zhiklè ngaya, a gaɗa ka, ar Ndo nzi pèc pècèk a nzala ka bi ngaya te Israel antanta a mèdèp.

¹⁴ Aman arsa kokwar bi ngaya a nzi azɓai. Ndo nzi pèc pècèk a nʼngots ndo ngiɗè ara man ndav nengaʼa a woyaʼa, a fedahi a bi ndohi na, a géɗ man ka co ma Ndo nzi pèc pècèk ɓai.

¹⁵ Samuel a nslambaɗa te Guilgal, a mdo a ma a civèɗ. Njèkèɗi ndohai to do a verzi Saul, aman ta gi var, a ta shkè te Guilgal, a to do Guibéa te Benjamin. Te pa Saul a mpor te va ndohi man ta zhè a sam na, a gi 600.

¹⁶ Saul a Jonathan, kra na, a ndohi man ta zhè a sam ta, ta nza te Guibéa te Benjamin. Ndohi Philistie ta ɓica va te Micmash.

¹⁷ Ndohi Philistie ta pu nʼngélè makar. Nʼngélè staɗ a mdo a civèɗ Ophra, tʼherkeda Shual.

¹⁸ Nʼngélè macecèwaʼa a civèɗ Beth-Horon, mamakaraʼa a civèɗ Gébaman man a zhè te géɗèʼa, a slrats Tseboim, a civèɗ ndè hèshèkèɗ.

¹⁹ Aman te kokwar Israel tèlèba, ndo mvidè züdo azɓai. Ndohi Philistie ta hur a ta gaɗa: ambaɓai aman ndohi Hebreu ta slaha ta gi tsakwal a sulom.

²⁰ A géɗ nengaʼa ndohi Israel tèlèba sèi ta dè a kokwar Philistie, aman ta woy a ta tèslè devar vogwa, devar géɗ kda, dzana a gwodza.

²¹ Aman dzana, a devar gèɗ kda, a devar vogwa a nʼnde na, ta dè ta tèslèʼa.

²² A géɗ nengaʼa a pats var te Micmash, ko tsakwal, ko sulom staɗ a te ri ndohi ɓai, man ta zhè a sam Saul a Jonathan. Sèi Saul a Jonathan, kra na, ta ngots skwi ta.

²³ Nʼngélè ndohi Philistie ngiɗè a mdo a slrats Micmash.