I Samuel 12 - Ma Zhiklè

Samuel a gaɗa ta ndohi Israel

¹ Samuel a ngaɗa ta ndohi Israel tèlèba: Na haha i gu skwi tèlèba ara man kin dzhoɗo a sam ga, a i va kinè bai.

² Anai, bai a dè a ma kinè. Aman iyè, i hala ma, makozlar te gèɗ ga ma, a wudahi ga ta zhè a sam kinè. I do a ma kinè daga man i gola, ha patsna.

³ Anai i zhè! Va-gu malwudai a géɗ ga, a sam Ndo nzi pèc pècèk, a sam ndo man nengaʼa a mbada na mbar a gèɗ: Zlè ngè, kɗèh ngè, man i co? Ndo wa man i ga na matakwan, man i ga na wuɗai? Ndo wa nruɓyè, a i ga na kita a di staɗ? I da pela kinè a deɓa!

⁴ Ta gaɗa: Ka ga nga matakwan ɓai, ka ga nga wuɗi ɓai, ka co skwi te ri ndo ɓai.

⁵ A ngaɗa ta: Ndo nzi pèc pècèk a gi malwuɗi a sam kinè; ndo nengaʼa man a mbada na mbar a gèɗ, ndo malwudai a patsna: kin ngatsa skwi ndo ngiɗè te ri ga ɓai. Ta gaɗa: Nengaʼa ndo malwudai!

⁶ Te deɓaʼa Samuel a ngaɗa ta ndohai: Ndo nzi pèc pècèk a gi malwudai, nengaʼa man a nfu Moise a Aaron, nengaʼa man a nhelka ta babhi kinè auda te kokwar Egypte.

⁷ Gar haha vo-washkè a sam ga, a nga gèɗè a sam Ndo nzi pèc pècèk, a i ngreda kinè skwi man amba tèlèba man Ndo nzi pèc pècèk a nga kinè, a nʼnga ta babhi kinè.

⁸ Aman Jacob a wudahi nengaʼa ta shkè a kokwar Egypte, ndohi Egypte ta ga ta matakwan. A babhi kinè ta kuɗi a sam Ndo nzi pèc pècèk, a Ndo nzi pèc pècèk a nzlinda ta Moise a Aaron. Ta helka ta babhi kinè auda te kokwar Egypte. A va ta civèɗ a ta nzi te kokwar haha.

⁹ A géɗ man Ndo nzi pèc pècèk a mpca ta a gèɗ, a mpre ta ma a ri Sisera, bi sojè Hatsor, a ri ndohi Philistie, a ri bi Moab. A ta gu var a nda ta.

¹⁰ Ta kuɗi a sam Ndo nzi pèc pècèk, a ta gaɗa: Nga gu malai, te man nga jèkeda Ndo nzi pèc pècèk, a nga tsu ri a Baalhai a Astar-téhai. Aman antanta, mbel nga te ri mayamhi nga, a nga woy a nga gi mizlinè ngaya.

¹¹ A Ndo nzi pèc pècèk a nzlündo Jerubbaal, Bedan, Jephthé a Samuel, a mʼmbel kinè te ri mayamhi kinè man ta tèuda kinè a pa, a kin nzi a gumai.

¹² Aman kin rka Nachash, bi Ammon, a shkè a ngi var a nda kine, kin gaɗayè: Aʼai, nga woya bi nga! – Ko Ndo nzi pèc pècèk, Zhiklè kinè, a zhè, nengaʼa bi kinè.

¹³ Na haha bi man kin ngotskoɗauda man kin dzhoɗo. Na haha Ndo nzi pèc pècèk a mfeda bi a géɗ kinè.

¹⁴ Aman kin da gi zlau Ndo nzi pèc pècèk, kin da gi mizlinè nengaʼa, kin da fi zlembaɗ a ma nengaʼa, skwi man Ndo nzi pèc pècèk a gaɗa kinè, kin giaʼa, a kinè a bi kinè kin nzi nlèɓèslèa a sam Ndo nzi pèc pècèk, Zhiklè kinè, a da gi amba.

¹⁵ Aman kin da fi zlembaɗ a ma Ndo nzi pèc pècèk azɓai, a kin gi mèdègèɗ a sam ma man Ndo nzi pèc pècèk a gaɗa kinè, kita Ndo nzi pèc pècèk a zhè a gèɗ kinè, a géɗ bi kinè.

¹⁶ Anai vo-washkè a sam ga, a kin rka skwi mbiaʼa man Ndo nzi pèc pècèk a gi a sam di kinè.

¹⁷ Antanta ngwar ka ɓi dè? I woy a i tsi ri a Ndo nzi pèc pècèk, aman a gi a iyam a ntsai, a iyam a ngai, a kin da suna, a kin rkaʼa, kin gu mali mbiaʼa a sam di Ndo nzi pèc pècèk, a gèɗ man kin dzhoɗo bi kinè.

¹⁸ A Samuel a ntsu ri a Ndo nzi pèc pècèk. A Ndo nzi pèc pècèk a ngu aman iyam a tsai, a iyam a gai, a pats nasa. Zlau Ndo nzi pèc pècèk, a zlau Samuel, a ndza ta ndohi tèlèba a vata.

¹⁹ Ndohi tèlèba ta gaɗa na Samuel: Tsu ri a Ndo nzi pèc pècèk ngaya a géɗ ɓèlèlihi ngaya, nga da bèzl nga. Nga gau skwi ambaɓiaʼa ngiɗè a va mali nga, a nga dzhoɗo bai.

²⁰ Samuel a ngaɗa ta ndohai: Kin gu zlau ɓai! Kin gu skwi ambaɓiaʼa haha tèlèba gokwèn; aman kin jèkeda civèɗ Ndo nzi pèc pècèk ɓai, aman va-gu mizlinè Ndo nzi pèc pècèk a ndav tèlè,

²¹ a kin dzodzor mʼmbèh skwi ambali asaɓai! A takaha kinè azɓai, a mbel kinè azɓai, a géɗ man skwa ambalai.

²² Ndo nzi pèc pècèk a da kwol ta ndohi nengaʼa azɓai, a géɗ nzlembaɗ nengaʼa mbiaʼa, te man ambaha Ndo nzi pèc pècèk, aman a ge kinè a ndohi na.

²³ I ba i woy a i gi mali a sam Ndo nzi pèc pècèk azɓi ba, a i jèkè ntsi ri a géɗ kinè azɓai. Aman i woy a i ngreda kinè civèɗ man amba a nzuraʼa.

²⁴ Aman sèi kin gi zlau Ndo nzi pèc pècèk, sèi kin gi mizlinè nengaʼa nlèbèslèa a ndav tèlèba. Kin rka skwi mbiaʼa man a ga kinè ɓi dè?

²⁵ Aman kin da gu skwi ambaɓiaʼa, kinè a bi kinè tèlèba kin gédèsh kinè.