I Samuel 10 - Ma Zhiklè

Samuel a mbada na mbar a gèɗ a Saul, a ngi a bai

¹ Samuel a nco gatsak mbar, a mbada na a gèɗ a Saul, a nhumbateda a ndav, a ngaɗa: Ndo nzi pèc pècèk, man a faɗa ka mbar a gèɗ, aman a ge ka a bi ndohi Israel nengaʼa. Gu bai a géɗ ndohi Ndo nzi pèc pècèk, a ka mbel ta te ri mayamhi tengaʼa man ta tèuda a pa. Na haha skwi man a ngra ka, Ndo nzi pèc pècèk a mfaɗa ka mbar a gèɗ, aman a ge ka a bi a géɗ skwi na:

² A patsna, aman ka jèkyè a pa, kin da zli gèɗ a ndohi cèw, a ma gi dzavi Rachel, a kuma kokwar Benjamin, te Tseltsach. Ta da gaɗa ka: Mam kɗèhi man ka woyaʼa, ta zhè. Na haha bab ngaya a hér ma kdèhihi asaɓai. Aman a gi zlau a géɗ kinè, a gaɗa: I da gi kè a kra ga?

³ Aman ka dè a ma ma, a ka ndikè a sam gètèl wof Thabor, kin da zli gèɗ a ndohi makar, man ta dè Béthel, a sam gi Zhiklè. Staɗ a wud ɓokwi te ri makar, ngiɗè a movar makar, mamakaraʼa a duzlak barassa.

⁴ Ta da ga ka mbalai, ta da va ka movar cèw. Hul te ri tengaʼa!

⁵ Te deɓaʼa ka da ndikè a sam Guibéa Zhiklè, a sam gi slaslam bi ndohi Philistie. Aman a pa ka de a kokwar, kin da zli gèɗ a ndohi nhadka ma mɓicaʼa, man ta shkèhai te za. Ta tsi ganzavar, ta tsi ganga, ta vèdè shingelèk, a ta tsi tèzlèzlèu a ma tengaʼa, a ta hodko ma.

⁶ Mèzhèɓ Ndo nzi pèc pècèk a di a shkè a gèɗ ngaya, a ka hodko ma a nda tengaʼa, a va ngaya a nʼngwoda na tsoɗ.

⁷ Aman skwi haha a da gi a sam ngaya, gau ara man Zhiklè a ngra ka.

⁸ Do Guilgal a ma ga! Te deɓaʼa i da dè a sam ngaya, a nga da zli skwi a nga da vi skwi a Zhiklè. Zhor mʼmèn 7, ha i dè a sam ngaya, a i da ngra ka skwi man ka da giaʼa.

⁹ Aman ta kezla gèɗ ta ma, a Saul a njè-keda Samuel, Zhiklè a nʼngwoda ndav Saul, a skwi man Samuel a nʼngreda na auda haha tèlèba a ngau a pats sa.

¹⁰ Aman ta ndikè a Guibéa, tsam-tsam ndohi nhadka ma kumba ta zlü gèɗ a vna, a Mèzhèɓ Zhiklè a mshkè a gèɗ nengaʼa. A Saul a nhodko ma a sam tengaʼa.

¹¹ Aman ndohi tèlèba man ta sun Saul te va nasa, ta rka ara man a nhodko ma a nda ndohi nhadka mai ndohi ngiɗè ta goɗ a va ta: Nʼnga na kra Kis mè? Saul ba te va ndohi nhadka ma dè?

¹² Staɗ te va tengaʼa a hinè a ngaɗa: Bab tengaʼa wa? A géɗ nengaʼa nglèlègèɗ-ma a gaɗa: Saul ba te va ndohi nhadka ma ɗè?

¹³ Aman nhèdè ma klèng, a ndo a géɗ za.

¹⁴ Kramam bab na a ngaɗa na Saul a ndo ntakaha: Kin deda ma? Saul a mʼmbeɗa na a ma: Ngo do, aman nga da woy mam kɗèhihai. Aman nga ngats ta ɓai, ngo do a gi Samuel.

¹⁵ Kramam bab Saul a ngaɗa: Ngrayè, Samuel a gaɗa kinè ma mè?

¹⁶ Saul a ngaɗa na kramam bab na: Samuel a nʼngra nga, ta ngots mam kɗèhi ma. Aman skwi man Samuel a gaɗa na a géɗ ngi bai, a nʼngreda na ɓai.

Samuel a ngra ta Saul a ndohi Israel

¹⁷ Samuel a mbaha ta ndohi tèlèba a sam Ndo nzi pèc pècèk te Mitspa.

¹⁸ A ngaɗa ta ndohi Israel: Ndo nzi pèc pècèk, Zhiklè Israel, a goɗ ar haha: I helka ta ndohi Israel auda te kokwar Egypte, a i mbel kinè te ri wuɗi ndohi Egypte, te ri bihi tèlèba man ta ga kinè matakwan.

¹⁹ Aman kinè, kin kwola Zhiklè kinè a patsna, nengaʼa man a mpre kinè auda te ri matakwan a skwi mwuɗitpa tèlèba, a kin gaɗa: Aʼai, sèi ka va nga bi nga! Anai, va-zlatsa a sam Ndo nzi pèc pècèk, ara verzi ndohi ngiɗè, ara verzi ndohi ngiɗè, go-zhèm staɗ, gozhèm staɗ, gozhèm staɗ.

²⁰ Aman Samuel a mbaha ta verzi ndohi Israel tèlèba a sam na, jimèr a nkala na a gèɗ verzi Benjamin.

²¹ Aman a mbaha ta ndohi te verzi Benjamin a sam na, gwoli ngiɗè, gwoli ngiɗè, jimèr a nkala na a gèɗ gwoli Matri. Aman a mbaha ta ndohi Matri a sam na, ndo staɗ staɗ a gèɗ na, jimèr a nkala na a gèɗ Saul, kra Kis. Aman ta woyaʼa, ta ngatsa ɓai.

²² A ta dzhoɗo a sam Ndo nzi pèc pècèk zaʼa: Masli sa a mshkè dè? Ndo nzi pèc pècèk a mʼmbeɗa ta a ma: Halau, a nʼngheda va na a va kolongwai.

²³ A ta hu a pa a ta gskoɗauda. Aman a nzlatsa te ndev ndohai, vangava a géɗ ndohi tèlèba.

²⁴ Samuel a ngaɗa ta ndohi tèlèba: Kin rka ndo man Ndo nzi pèc pècèk a ngotskoɗauda dè? Ndo ngar nengaʼa azɓai te ndev ndohi tèlèba. A ndohi tèlèba ta wuffè a ta boho: Zhiklè da va ka nshèffè a ma ma!

²⁵ Samuel a nʼngra ta skwi man bai a woyaʼa a sam ndohai, a Windo a ɗèlèwèr, a mfedahi a sam Ndo nzi pèc pècèk. Te deɓaʼa Samuel a mpre ta ndohi tèlèba, staɗ staɗ a gi na.

²⁶ Saul ba a mdo ngwai a Guibéa, a nda ngul ndohai, man Zhiklè a gaɗa ta te ndav ta.

²⁷ Aman ndohi falihi ngiɗè ta gaɗa: Ndo haha a slaha a ntakaha nga te mè? Ta rka Saul ara ndo ambalai, a ta va na skwi mbali ɓai.