I Samuel 1 - Ma Zhiklè

Nyi Samuel

¹ Te va ndohi kokwar Ramathaim-Tsophim, te za Ephraim, ndo ngiɗè a zhè, nzlembaɗ nengaʼa Elkana, kra Jerobam, kra Elihu, kra Thohu, kra Tsuph, te verzi Ephraim.

² Ngwozi Elkana cèw: staɗ, nzlembaɗ nengaʼa Anne, ngiɗè nzlembaɗ nengaʼa Peninna. Wudahi Peninna ta zhè. Anne a nya kra ɓai.

³ Ndo sa, a mvi a mvai a slèmbèɗè te kokwar na a nde a kokwar Silo, aman a ntsi rai, a mvi skwi a Zhiklè bi wuɗai. Hophni a Phi-nées, wudahi Eli, ta zhè a pa; ta ndohi mvi skwi a Zhiklè.

⁴ A pats man Elkana a va na skwi a Zhiklè, a kezla ta skwi staɗ staɗ a Peninna a wudahi a dalahi nengaʼa.

⁵ A Anne a mpa na nengaʼa cèw, te man a woy nengaʼa a mfena ngiɗè, ko Zhiklè a mva na kra ɓai.

⁶ A ndurɗi na a dèlè a rai, a géɗ man Zhiklè a mva na kra ɓai.

⁷ A mvi a mvai a gu arsa. Pèc pècèk man ta dè a gi Zhiklè, ndurɗi na a ga na matakwan arsa. A Anne a kuɗai, skwi nʼndi a dè hwaɗ azɓai.

⁸ Elkana, baki na, a ngaɗa na: Anne, ka kuɗ mè? Ka ndi skwi nʼndi azɓi èhèmè? Ndav ngaya a kuɗi èhèmè? I ambaha ka ɓi dè, i fena wud ngurhi 10 ɓi ɗè?

⁹ A pats ngiɗè, man ta nda skwi te Silo ma, a ta sa skwi klèng ma, Anne a nslambaɗa. Eli, ndo mvi skwi a Zhiklè nʼnzaʼa a sam nʼnzi na, a ma gi Zhiklè.

¹⁰ Anne a ntsu ri a Zhiklè, a nkuɗu te ndav na, kuɗa a di sraffsraffaʼa.

¹¹ A ngaɗa na ma a hi a Zhiklè: Ndo nzi pèc pècèk, Zhiklè bi wuɗai! Aman ka rka matakwan ɓèl ngaya, a ka héryè, a ɓèl ngaya a pca ka a gèɗ azbai, a ka da vay kra nguraʼa, i woy a i va ka a ka, Ndo nzi pèc pècèk, a mèdèp, a ta fi pidök a gèɗ nengaʼa azɓai.

¹² Aman a ntsu ri a sam Ndo nzi pèc pècèk nshèk va a zhè, Eli a mpa na di a ma nengaʼa.

¹³ Anne a gèɗè ma genè, tapiɗaf ma nengaʼa a gidè va genè, aman a tsena daʼai nengaʼa ɓai. Eli a nhur, zom a Kedma.

¹⁴ A ngaɗa na: Ka gu ara ndo zom, zom ngaya haha a keɗe ka ta ahngwa? Dzurɓa gèɗ, a zom a shkè auda te gèɗ ngaya!

¹⁵ Anne a mʼmbeɗa na a ma: Aʼai, a bi ga, i ngwoz man matakwan a gay kumba. I sa zom ɓai, i sa barassa ɓai, i hadka kuɗa a ndav Ndo nzi pèc pècèk.

¹⁶ Ka rka ɓèl ngaya ara fali ngwoz ɓai! I goɗko matakwan a nlèyè ga mbiaʼa auda aranta.

¹⁷ Eli a ngaɗa na: Do a gumai! Zhiklè Israel a da va ka skwi man ka dzhoɗo te ri nengaʼa.

¹⁸ A nengaʼa a ngaɗa: ɓel ngaya da ngots pombai a sam di ngaya! A mdo na, a ndi skwi ma, a nsassaya di na.

¹⁹ Te mangoslèmaʼa a prèk ta tsu ri a sam Ndo nzi pèc pècèk, a ta men ta a deɓa a ngwai a Rama. Aman Elkana ta mana a Anne, ngwoz na, Ndo nzi pèc pècèk a nhur Anne.

²⁰ A Anne a ngu a hwaɗ tʼhwaɗ vi sa, a myu kra nguraʼa, a mbaha na Samuel, a ngaɗa: I dzhoɗo te ri Ndo nzi pèc pècèk.

Anne a va na Samuel a ri a Zhiklè

²¹ Aman Elkana, baki nengaʼa, a ndohi gi nengaʼa tèlèba, to do a ta vi skwi a Zhiklè, ara man to do a mvi a mvai, ara man ta gaɗa na ma a hi a Zhiklè.

²² Anne nʼnda ɓai, a ngaɗa na baki na: I dè di azɓai, sèi kra a njèkeda wa di kla, a i dèʼa. Te deɓaʼa i da va na Ndo nzi pèc pècèk, da nza a pa a mèdèp.

²³ Elkana, baki na, a ngaɗa na: Gau ara man ka woyaʼa. Nza, ha kra a njèkeda wa. Ndo nzi pèc pècèk da gu ara ngèd ngaya. A ngwoz a nʼnza na a ngwai, a ngre kra, ha kra a njèkeda wa.

²⁴ Aman a njèkeda wa ma, a mco kra, a to do, a mari matsamakaɗ, a gufa dau shiɗèf staɗ, a duzlak barassa staɗ, a mhelda a gi Ndo nzi pèc pècèk te Silo. Kra, wudahi dai.

²⁵ A ta zlaha zlè, a Anne a nda kra a sam Eli, a ngaɗa:

²⁶ Susai, bi ga, ara man nshèffè ngaya a zhè, bi ga! I ngwoz mʼadatsuta man i zlatsa a sam ngaya a i tsu ri a Ndo nzi pèc pècèk.

²⁷ I dzhoɗo kra haha te ri Zhiklè. A Zhi-klè a mvay skwi man i tsu ri mbuh mbuhaʼa a sam nengaʼa.

²⁸ Gar haha i ba i cèʼa a i va na a ri Ndo nzi pèc pècèk, a nʼnzi a sam nengaʼa a mèdèp. A ta gurɓahai a sam Ndo nzi pèc pècèk.