I Rois 9 - Ma Zhiklè

Ma mpèsl ri Zhiklè

¹ Aman Salomon nrufa gi Zhiklè, nrufa gi bi a skwi man a woya a ngiaʼa tèlèba ma,

² Ndo nzi pèc pècèk a ngudoko na va a di macecèwaʼa a Salomon, lèmèlèmè ara te Gabaon nshèlèkuraʼa.

³ A Ndo nzi pèc pècèk a ngaɗa na: I tsena ntsi ri a kuɗa ngaya man ka herdakay va a vna. I ga gi man ka rom a nzlembaɗ ga a gi nkezlaʼa a mèdèp. Di ga a pa, ndav ga a pa pèc pècèk.

⁴ Aman ka, man ka da dzadzarkayè ara David, bab ngaya, a ndav nlèɓèslèa a nzuraʼa, a ka gi skwi tèlèba ara man i njè ka a gèɗ, a ka jèjèr ma nkwèr ga a ma man i de kinè a vna,

⁵ sam nʼnzi bi ngaya te kokwar-bi Israel a dè a ma ma a mèdèp, ara man i pasla na ri a David, bab ngaya, man i gaɗa na: verzi ngaya a nzi a géɗ sam nʼnzi bi Israel pèc pècèk.

⁶ Aman kinè a wudahi kinè kin da ngwoday deɓa, a kin jèjèr ma nkwèr ga a ma kita ga azɓai ara man i va kinè, a kin dè a kin jèjèr zhiklèhi ngiɗè a kin tsi ri a tengaʼa,

⁷ i da zedko Israel auda te kokwar man i va ta, a i kwola gi haha man i baha na a nzlembaɗ ga. A ndohi ngiɗè a géɗ herkeda ta livèʼa, a ta ngwossaha ta ndohi Israel.

⁸ Gi haha a da mbeɗ na. Ndohi tèlèba man ta da bizhè a samaʼa, ta da rzl ta, a ta ngwèshè a pa, a ta jhèɗèʼa: Ndo nzi pèc pècèk a nʼnga ta ndohi kokwar, a gi haha, aranta èhèmè?

⁹ A ta da gèɗèʼa: A géɗ man ta jèkeda Ndo nzi pèc pècèk, Zhiklè tengaʼa, man a helka ta babhi tengaʼa auda te kokwar Egypte, a ta dzodzor zhikièhi ngiɗè tsaɗ, a ta tsu ri a tengaʼa, a ta gu mizlinè tengaʼa. A géɗ nengaʼa Ndo nzi pèc pècèk a nʼnga ta matakwan haha.

Hiram a wuffè azɓai a géɗ skwi ntul na

¹⁰ Te deɓ mvi 20, man Salomon a rom gihi cèw—gi Zhiklè, a gi bai — bi Salomon a mpa na kokwar 20 te Galilée a Hiram, ara man a ndzhoɗo.

¹¹ Salomon a nʼngots wof ɗawai, a wof lakalak a guro tèlèba a sam Hiram, bi Tyr.

¹² A Hiram, a njèkeda Tyr, aman a dè a zeɓi kokwarhi man Salomon a mpa na. A kokwarhi sa ambaha ɓai.

¹³ A ngaɗa: Kokwarhi mè man ka pay a haha, kramam ga? A baha ta Cabul, nasa nzlembaɗ tengaʼa ha patsna.

¹⁴ A Hiram a nzlündo guro te di Suli gozhèm gozhèm 120 a sam bai te va nasa.

Kokwar man Salomon a ntilda pa

¹⁵ Sam man bi Salomon a mpar ta ɓèlèlihi man ta rom gi Zhiklè, a gi bi na, a kokwar Millo, a zlazlar man ta ngalda pa: Hatsor, Megiddo a Guézer.

¹⁶ Pharaon, bi Egypte, a mdo a nduma Guézer, a nfa na vogwa, a mbazl ta ndohi Canaan man ta nza te kokwar, a mva na kokwar a skwi mbalai a dem na, ngwoz Salomon.

¹⁷ A Salomon a ntilda Guézer a pa zaʼa, Beth-Horon nte godok,

¹⁸ Baalath, a Thadmor a ma hèshèkèɗ,

¹⁹ a kokwarhi man bi Salomon a hayda skwi nʼndi a pa, a kokwarhi man kiki var te pa, a kokwarhi man ndohi plèsh te pa, a skwi tèlèba man Salomon a woya a nrèmè te Jérusalem, te Liban, te kokwar-bi nengaʼa tèlèba.

²⁰ Njèkèɗi ndohi te verzi Amor, Heth, Phérez, Hevi a Jébus, tengaʼa man verzi ndohi Israel ka ɓai,

²¹ wudwud tengaʼa man ta jèkaha va a kokwar, man ndohi Israel ta slaha ta dzam ta ɓai, Salomon a mpar ta a ɓèlèlihi ha patsna.

²² Aman wudahi Israel, Salomon a nʼnga ta a ɓèlè ɓai, tengaʼa ndohi var, a ndohi mizlinè nengaʼa, golahi bai, ndohi nhèd kikai, bihi kiki var a ndohi plèsh.

²³ Tengaʼa man bihi kokwar, man Salomon a mpe ta a mizlinè, ta 550, a ta ɓer ndohi mizlinè.

²⁴ Aman dem Pharaon a mshkè auda te kokwar David, a mdo a gi na man Salomon a rama na, gi nte Millo.

²⁵ A Salomon a nʼndara na skwi a sam mvi skwi a Zhiklè man a rama na Ndo nzi pèc pècèk, sak makar, makar, tʼhwaɗ mvai a nshida na gèɗ. Aman a nrufa gi Zhiklè, a nʼndor skwi a vodzok a dè a sam Ndo nzi pèc pècèk.

Wuromhi Salomon

²⁶ A bi Salomon a ngum wuromhai te Etsjon-Guéber, a tsagi Eloth, a ma iyam mbiaʼa nduzoa, tʼherkeda Edom.

²⁷ A Hiram a nzlinde ta ɓèlèlihi nengaʼa, ndohi nwurr wurom man ta sun iyam, a ta gi mizlinè a nda ndohi mizlinè Salomon.

²⁸ A ta shkè Ophir, a ta hulko guro, te di gozhèm gozhèm kumba, man ta cko na bi Salomon.