I Rois 7 - Ma Zhiklè

Salomon a rèm gi bai, a rom gi ngiɗè

¹ A Salomon a nrom gi bi nengaʼa ba. Ta gu mizlinè a pa mvi 13, a nrufa gi nengaʼa tèlèba.

² A nrom gi ngiɗè a sam nhèyè wof te Liban. Ngurè nengaʼa a tsi ri 100, nguzlohaʼa a tsi ri 50, njüv na a tsi ri 30. Wof ndaha makar, a wof ɗawai, a ta ga na wof ɗawai ngiɗè a gèɗ.

³ Gi man a géɗ sak gai mvidèʼa a wof ɗawai, sak gi 45, 15 te civèɗ ngiɗè staɗ staɗ.

⁴ Nvakavar civèɗ makar, a wof te tsagiaʼa, nvakavar ngiɗè zuraʼa a nvakavar ngiɗè, dal te ndevaʼa a tsi ri cèw.

⁵ Ntamagi a nvakavar tèlèba, a zlogomhi fad, tèlèba lèmèlèmè te verziaʼa, te tsagiaʼa. Nvakavar ngiɗè a ngiɗè, dal te ndevaʼa a tsi ri cèw.

⁶ A ngau mozodo a ma gai, a ta ngeda wof a vèvèɗ, ngurèʼa a tsi ri 50, nguzlohaʼa a tsi ri 30. A ta ngala na gi ngiɗè a ma, a ta ngeda wof a vèvèɗ, a skwi man ta tivè a pa a maʼa.

⁷ A ngu gi man sam nʼnzi bi nengaʼa te pa, sam mbèzlè kita. Nengaʼa gi mbèzlè kita. Dergai a vargai, ha ndikè a géɗèʼa, mbè te pa a wof ɗawai.

⁸ Gi bi nengaʼa ngiɗè, kalak mʼmèn na, te daɓagi ngiɗè, te man a hwaɗ mozodo, ta gau lèmèlèmè. A nʼnga na gi a ngwoz na, dem Pharaon, lèmèlèmè ara mozodo matsa.

⁹ Tèlèba ngaʼa a kwa nshfaʼa, man ta paslaʼa, a ta lèmdè lèmèlèmè, ntasla tsagi cèw nlèmdè fhèʼa, tʼhwaɗ gi ba, tʼuda ba, a ta hüno te godok, ha ndè a géɗ gai, a ma gai ha ndè a daɓagai.

¹⁰ Ko verzi gai, a kwa nshfaʼa, kwa mbiaʼa, kwa man a tsi ri 10, a kwa man a tsi ri 8.

¹¹ A ta va na kwa nshfaʼa ngiɗè a géɗ ngiɗè, mpasla lèmèlèmè, a ta menda na wof ɗawai a gèɗ.

¹² A zlazlar a dalmagi mbiaʼa ta gu a kwa mpasla lèmèlèmè, ngiɗè a géɗ ngiɗè makar, a wof ɗawai a géɗèʼa, ara man ta gu a dalmagi a sam gi Ndo nzi pèc pècèk tʼhwaɗaʼa, a sam mozodo.

Hiram, ndo nsun mizlinè

¹³ A bi Salomon a nzlündo ndo, da bahka na Hiram te Tyr.

¹⁴ Masli sa, ngwozla, kra ngwoz mazai te verzi Nephthali. Bab nengaʼa ndo Tyr, a sun mvidè züdo. A sun maya mizlinè, mwosla te ngi mizlinè haha tèlèba. A nengaʼa a mshkè a sam bi Salomon, a nʼnga na mizlinè haha tèlèba.

¹⁵ A nvüɗo sak gi cèw a züdo. Sak gi staɗ, ngurè nengaʼa a tsi ri 18, ndazl nengaʼa gogumi man a tsi ri 12 a slaha a nderzlaʼa. Vèvèd tʼhwaɗaʼa, ndakama nengaʼa nara hwaɗ rai. Sak gi macecèwaʼa lèmèlèmè arsa.

¹⁶ Te deɓaʼa a mvüɗo züdo ngiɗè cèw, a nʼnüɓa ta a gèɗ. Züdo staɗ, ngurè nengaʼa a tsi ri 5, macecèwaʼa ba a tsi ri 5 arsa.

¹⁷ A nɗoho zlèl züdo cèw, a nkelawda a pa, a sam züdo man a nüɓa na gèɗ, a teɓa züda a derzla na va jèrɓi man a gèɗ sak gai. Tsaraɗ a sam ngiɗè man a kalama na gèɗ tsuɗuslaʼa, tsaraɗ a sam ngiɗè.

¹⁸ Te deɓaʼa a ngau züdo ndèlèlk-ndèlèlkaʼa, a nderzla na va zlèlè a sam züdo a géɗ sak gai. Lèmèlèmè a sam macecèwaʼa.

¹⁹ Züdo man ta nüɓa na va a sak gai te mozodo, nara nwurzhè bèmbèzl, ngurè nengaʼa a tsi ri fad.

²⁰ A züdo a géɗ sak gi cèw, te géɗèʼa, a sam man a hezlama na gèɗ tsuɗuslaʼa, man a shkè auda a sam zlèlè, skwi ndèlèlk-ndèlèlkaʼa a pa, civèɗ cèw, 200 te civèɗ ngiɗè, 200 te civèɗ ngiɗè, tèlèba a gi 400. Skwi ndèlèlkaʼa a sam zlèl züdo ngiɗè, skwi ndèlèlkaʼa a sam zlèl züdo ngiɗè.

²¹ A nʼnga sak gai a sam gi nʼngalaʼa, a ma gi Zhiklè. Nengaʼa te civèɗ ri mandai, nzlembaɗ na Jakin. Ngidè man a ngaʼa te civèɗ ri gula, nzlembaɗ na Boaz.

²² Aranta ta rufa mizlinè sak gai.

²³ Te deɓaʼa a ngau skwi mpèn va, man ka tseda ri a ndevaʼa, a tsi ri 10, ndalalkaʼa, njüv na a tsi ri 5. Gogumi man a tsi ri 30 a slaha a nderzlaʼa.

²⁴ A maʼa, mveɗkaɗna nara waʼai, a civèɗ cèw, a tsi ri 30.

²⁵ Sak skwi mpèn va nara zlèhi 12. Makar ta pu di a civèɗ man a géɗèʼa, makar a civèɗ nkèl pats, makar a dukwaɗ, makar a civèɗ mvèng pats. Skwi mpèn va a deɓ tengaʼa. Zlèhi ta derzla verzai.

²⁶ Nckè nengaʼa nara hwaɗ rai. A ta para na ma a deɓa nara nwurzhè bèmbèzl. Iyam a dè a pa duzlakhi 2.000.

²⁷ A ngau kreblom züdo 10. Staɗ, ngurè nengaʼa a tsi ri 4, nguzlohaʼa a tsi ri 4, njüv na a tsi ri 3.

²⁸ Ta gu aranta: Ta peda züdo ngiɗè a hai, a ta manda na ngiɗè a deɓa.

²⁹ A va züdo man ta manda na a deɓa, te ndev züdo tʼhai, marizhèlèhai, zlèhai achérubimhai ta zhè. A sam züdo tʼhai lèmèlèmè arsa. Nte géɗèʼa ba, nte godok ba. Skwi man ta tseda pa a zhè.

³⁰ Kreblom staɗ staɗ tèlèba a sak züdo fad, skwi nderzla sak a züdo, a skwi ngshè sak fad mwosla na va tʼhwadaʼa a sam tassa züdo.

³¹ Hototok sam man ta feda skwi mpèn va a pa, ndalalkaʼa, ngaʼa ara ɗawak. Sam hototokoʼa dazlaʼa a tsi ri staɗ a rèta, a skwi tsaɗ tsaɗ ntseda pa. Züdo man ta manda na a deɓa, zlogomhiaʼa faɗ, az ndalalkaʼa ɓai.

³² Sak fad tʼhwaɗ züdo man ta manda na a deɓaʼa, skwi ngshè sak nderzla te va kreblom. Njüv sakaʼa a tsi ri I a rèta.

³³ Sak ngaʼa ara sak mota. Züdo man a deɓa, züdo te man a hwaɗaʼa, züdo te ndevaʼa, tèlèba mvidèʼa.

³⁴ Züdo di man a humda nte ndevaʼa, nte deɓaʼa tèlè mvidèʼa. A skwi ngshè sak a sam zlogomhi kreblom staɗ staɗ tèlèba. Skwi ngshè sak ntkotsa te va kreblom.

³⁵ A géɗ kreblom, skwi staɗ a pa, ndalalkaʼa, a tsi ri rètaʼa, skwi nderzla ta te verzi kreblom. Züdo tʼhai nʼnderzla, te vaʼa.

³⁶ Tsagi mvècèʼa a chérubimhai, marizhèlèhai a wof gangar a nwurzhè skwi tsaɗ tsaɗ.

³⁷ A ngu kreblom 10 aranta. Mviɗ ta lèmèlèmè tèlè, nliv ta lèmèlèmè tèlè, nlèmdè ta lèmèlèmè tèlèba.

³⁸ A ngau tassa züdo 10, tassa staɗ staɗ tèlèba a hil duzlak 40. A tsi ri te ndevaʼa fad. A géɗ kreblom staɗ staɗ tèlèba, tassa staɗ staɗ.

³⁹ A mpeda kreblom 5 a sam gi Zhiklè te civèɗ ri gula, 5 te civèɗ ri mandai. Skwi mpèn va a mfeda a ma gi Zhiklè, te man a tsagai, te ndevaʼa.

⁴⁰ A Hiram a ngau kokwi ba a gandaf, a kizlèɗ nhil mèrwèc. Aranta Hiram a nrufa mzilinè tèlèba ara man Salomon a va na, mizlinè gi Zhiklè tèlèba.

⁴¹ Sak gi cèw, a züdo man ta nüɓa ta a gèɗ sak gai. Zlèlè züdo man ta kelawa na va züdo a géɗ sak gai.

⁴² Skwi ndèlèlkaʼa 400 a va zlèlè cèw, skwi ndèlèlkaʼa 200 te civèɗ cèw a sam zlèlè cèw cèw.

⁴³ Kreblom 10, a tassa züdo 10 a géɗ kreblom.

⁴⁴ Skwi mpèn va a deɓ zlèhi 12.

⁴⁵ Tassa nhil mèrwèc, a skwi mpècèʼa, a kokwi ngéj iyam. Kolongwi haha tèlèba man Hiram a nga na Salomon a géɗ gi Zhiklè. Nʼnga tèlèba a züdo nterkaslaʼa.

⁴⁶ Bai a goɗo aman ta vidèʼa a ma woyam Jourdain, a ta rama na rɓasl a deɓa te ndev Succoth a Tsarthan.

⁴⁷ Salomon a livè kolongwi azɓai, a géɗ man kumba, züdo kumba, a livè azɓai.

⁴⁸ A ngau kolongwi tèlèba te gi Ndo nzi pèc pècèk: sam mvi skwi a Zhiklè guro, table guro, man movar nkezlaʼa a pa.

⁴⁹ Skwi nfi vogwa, zlam te civèɗ ri mandai, zlam te civèɗ ri gula, a sam nkezli nkezlaʼa, a guro ndaɓalaʼa, a nwurzhè guro, a skwi nhél sam a piɗökihai,

⁵⁰ a kokwi a gwèsh a ndèlèk a tassa a shiɗèf man ta ndèr skwi te pa, ngaʼa a guro ndaɓalaʼa. Skwi nderzla ntamagi a gi tʼhwaɗaʼa, a sam nkezli nkezlaʼa ba, a ntamagi gi Zhiklè ba, a gi mbiaʼa, tèlèba a guro, ndaɓalaʼa.

⁵¹ Aman mizlinè tèlèba nga ma, man Salomon a ngau a sam gi Ndo nzi pèc pècèk, a nhulko skwi man David, bab na, a mva na Zhiklè, a mpeda a gi man skwi mèshèlè te pa te gi Zhiklè: gurso a guro a kolongwai.