I Rois 4 - Ma Zhiklè

Ndohi mizlinè Salomon

¹ A Salomon a ngu bi a géɗ Israel tèlèba.

² Na haha ndohi mizlinè nengaʼa: Azaria, kra Sadok, ndo mvi skwi a Zhiklè.

³ Elihoreph a Achija, wudahi Shisha, ndohi mwindè ɗèlèwèr. Josaphat, kra Achilud, ndo mɓer ɗèlèwèr.

⁴ Benaya, kra Jehoyada, bi-sojè. Sadok a Abiathar, ndohi mvi skwi a Zhiklè.

⁵ Azaria, kra Nathan, ndo mɓer bihi kokwar. Zabud, kra Nathan, mandal bai.

⁶ Akishar, ndo nʼnza a ma gi bai. Adoniram, kra Abda, bi ndohi var.

⁷ Salomon a nʼngots bihi kokwar 12 te Israel tèlèba. Ta gu maya skwi nʼndl bai a ndohi gi nengaʼa tèlèba. Staɗ staɗ a ngu mizlinè sa ki staɗ thwaɗ mvai.

⁸ Na haha nzlembaɗ tengaʼa: Kra Hur, te Ephraim.

⁹ Kra Deker, te Makats, te Shaalbim, te Beth-Shémésh, te Elon a Beth-Haman.

¹⁰ Kra Hesed, te Aroboth. Ndohi te kokwar Hépher ba nte ri nengaʼa.

¹¹ Kra Abinadab, a der za Dor tèlèba. Nengaʼa a nco Taphat, dem Salomon, a ngwoz na.

¹² Baana, kra Achilud, te kokwar Thaanac a Megido, te Beth-Shean tèlèba man a zhè a tsagi Sartan, te Jizréel man a géɗèʼa, ha ndè Abel-Mehola, ha ndè Yokneam.

¹³ Kra Guéber, te Ramoth, te Galaad, a nʼngots gi ndohi Jair, wudahi Manassé man ta zhè te Galaad, a kokwar Argob ba man a zhè te Basan, kokwarhi mbibihiaʼa 60 nʼngalda pa, mɓarda pa a züdo.

¹⁴ Akinadab, kra Iddo te Mahanaim.

¹⁵ Akimas te Nephthali. Nengaʼa a nco Basmath, dem Salomon, a ngwoz na.

¹⁶ Baana, kra Hushai, te Aser, te Bealoth.

¹⁷ Josaphath, kra Parush, te Issacar.

¹⁸ Shimei, kra Ela, te Benjamin.

¹⁹ Guéber, kra Uri, te kokwar Galaad, kokwar Sihon, bi ndohi Amor, a Og, bi Basan. Ndo mɓer kokwar haha tèlèba, na staɗgenè.

²⁰ Ndohi Juda a Israel ta ngrè azɓai, ta kumba ara wyak te woyam. A ta ndu skwai, a ta su skwai, a ta nza a m wuffè.

Skwi mèshèlè a maya Salomon

²¹ A Salomon a ngu bai a géɗ kokwar bihi tèlèba, a hinè te woyam, ha ndè a kokwar Philistie, ha ndè a kuma kokwar Egypte. A ta tsokolkoɗi skwi a gi bai, a ta fi gèɗ a ma Salomon a pats nshèffè nengaʼa tèlèba.

²² Skwi man ta ndiaʼa te gi Salomon, a pats a pats: Gufa dau bho 60; gufa makala bho 120;

²³ zlè kudom 10; zlè dak 20; tambak 100; mènèɗ a bhwal a ngudobokihai ta te va ɓai.

²⁴ A géɗ man bai, kala wud woyam tèlèba, a hinè te Tiphsak, ha ndè Gaza, a géɗ bihi kokwar tʼwud woyam tèlèba, gumi a zhè a sam tèlèba.

²⁵ Juda a Israel ta nza a gumai, staɗ staɗ te gi dau na, te verzi wof na, a hinè te Dan, ha ndè Bersabée, a pats nshèffè Salomon tèlèba.

²⁶ Salomon a nʼngots gi plèshi 4.000 a kiki a verzi ta, a plèshi 12.000 man ta dè a deɓaʼa.

²⁷ Bihi kokwar ta hulko na skwi nʼndi a gi Salomon, staɗ staɗ tèlèba ki staɗ, a bi Salomon a ndohi man ta ndau skwi a sam na ta ngeza. Skwi tèlè a zhè, skwi man azɓi ba azɓai.

²⁸ A dau a ksof plèshihai a plèsh man kiki a verzai, ta hulkoda sam bai, staɗ staɗ tèlèba ara man bai a dzhoɗo.

²⁹ A Zhiklè a mva na maya a Salomon, a sun skwi kumba kumba, a maya nengaʼa a zhè kumba, ngimaʼa azɓai.

³⁰ Maya Salomon a fena maya ndohi te civèɗ mvèng pats tèlèba, a fena maya ndohi Egypte tèlèba.

³¹ Maya nengaʼa a fena maya ndohi tèlèba. A fena man a Ethan, ndo Esrak, a Héman a Calcol a Darda, wudahi Machol. Labar ma nengaʼa a zlèzlèmè tʼherkeda tèlèba.

³² Salomon a nʼngots ngèlègèd ma 3.000, a dimèsh nengaʼa man a gau 1.005.

³³ A goɗ ma a géɗ wof, a géɗ wof ɗawai te Liban, a géɗ hysope man a ngreka te slrats kwa. A goɗ ma a géɗ skwi a sak fad, a géɗ ɗiakihai, a géɗ skwi nda-a-hwaɗhai, a géɗ klèfihai.

³⁴ Te va ndohi tèlèba ta shkè, aman ta tsena ma maya Salomon. Bihi ba ta shkè, tèlèba a géɗ herkeda man ta tsena labar ma maya Salomon, a ta va na skwi mbalai.