I Rois 3 - Ma Zhiklè

Salomon a cè dem Pharaon a ngwoz

¹ A Salomon a nco dem Pharaon, bi Egypte, a ngwoz, a nʼnda a mèsh na, a nckoɗa kokwar David, ha a nrufa gi bi na, a nrufa gi Zhikjè, a zlazlar Jérusalem.

² Te ndev nasa ta va na skwi a Zhiklè a géɗ za dai, a géɗ man ta rom gi a nzlembaɗ Ndo nzi pèc pècèk di ɓai.

³ A Salomon a woy Ndo nzi pèc pècèk a ndav na, a ndzodzora ara ma nkwèr David, bab na. Aman skwi man a zla na Zhiklè, a ɓurdi man a ndara na a Zhiklè, a da a géɗ za.

Salomon a jhèɗè maya a sam Zhiklè

⁴ A bai a mdo Gabaon, aman a vi skwi a Zhiklè. Nengaʼa sam mvi skwi a Zhiklè mbiaʼa, a fena matakahiaʼa. A Salomon a mvau skwi 1.000 a sam mvi skwi a Zhiklè.

⁵ Te Gabaon, Ndo nzi pèc pècèk a ngudoko na va a di a Salomon te nshunè a vaɗ. Zhiklè a ngaɗa: Dzhoɗo skwi man ka woya a sam ga, i da va ka.

⁶ A Salomon a ngaɗa: Ka gu skwi man amba a vata a sam ɓèl ngaya, David, bab ga, te man a ndzadzar ka a vava, te ngi zuraʼa, a ndav nzuraʼa, a ka va na pombai, a ka va na kra nguraʼa man a nzi a géɗ sam nʼnzi bi nengaʼa a patsna.

⁷ Anai, Ndo nzi pèc pècèk, Zhiklè ga, ka, ka giyè a bai te di man a David, bab ga. Iyè, i wudahi dai, i sun maya nshèffè di ɓai.

⁸ I zhè a sam ndohi man ka par ta, ndohi kumba holholaʼa, man ndo a slaha a nʼnger ta ɓai, a m winde ta ɓai.

⁹ Anai vay ndav man a hér maya, man a slaha a ngi kita ndohi ngaya, a sun ndèl skwi man amba te va skwi man ambaɓai. Man ɓai, nslaha a ngi kita ndohi ngaya mbiaʼa haha wa?

¹⁰ Ma haha ambaha Bi Zhiklè, a géɗ man Salomon a ndzhoɗo skwi arsa.

¹¹ Zhiklè a ngaɗa na: A géɗ man ka dzhaɗ skwi mèshèlè a va ngaya ka ɓai, ka dzhaɗ ndohi mayamhi ngaya ɓai, aman ka dzhaɗ maya aman ka sun ndèl kita,

¹² na haha i gi ara ngèɗ ngaya, a i va ka ndav man a hér maya, man a sun skwai, ara ndo ngiɗè a nʼngatsa zlèzlèa ɓai, ko a ma ma ba azɓai.

¹³ A skwi man ka dzhada ɓai, i va ka a vaʼa: skwi mèshèlè, nʼnjèlè. Bi ngiɗè a gi ara man a ngaya azɓai.

¹⁴ Aman ka da dè a civèɗ ga, a ka jèjèr ma nkwèr ga a ma kita ga, lèmèlèmè ara David, bab ngaya, i da va ka nshèffè man a nzi dai.

¹⁵ A Salomon a mpidèkwe na, na haha nshunè man a keɗaʼa. A mdo a deɓa a kokwar Jérusalem, a nzlatsa a sam koti nderzlè-ma Bi Zhiklè, a nʼndara na skwi a Zhiklè a nshid gèɗ, a ngu ngolala a nda ndohi mizlinè nengaʼa tèlèba.

Salomon a mam wudahi cèw

¹⁶ A fali ngwozi ngiɗè cèw ta shkè a sam bai, a ta zlatsa a sam na.

¹⁷ Ngwoz ngiɗè a ngaɗa: Mbali, bi ga! Nga a ngwoz haha, nga te gi nstaɗ. I yau kra a tsagi nengaʼa, te gai.

¹⁸ Te deɓ mʼmèn makar, ngwoz haha ba a nyu kra. Nga zhè a sam staɗ, ndo ngiɗè az a sam nga ɓai, sèi nga cèw a vna genè.

¹⁹ A kra ngwoz haha a mʼmets na a vaɗ, a mʼmana na gèɗ, a nkeɗaʼa.

²⁰ A nslambaɗa, a vaɗ, a ncè-may kra ga auda a tsagai, a mfeda a wa na. Aman i nzhun ga, a mfeda kra man a mets na a wa ga.

²¹ A prèk i woy a i vi wa a kra ga, na haha a mʼmets na ma. A prèk i war zuraʼa, kra ga ka ɓai.

²² Aman ngwoz sa a ngaɗa: Aʼai! Kra man a zhè a nshèffè, nengaʼa kra ga! Kra ngaya a mʼmets na! A ngiɗè a ngaɗa: Aʼai! Kra man a mets na, kra ngaya, kra ga a zhè a nshèffè! A ta verslè a sam bi ar haha.

²³ A bai a ngaɗa: Ngidè a gaɗa: Na haha kra ga man a zhè a nshèffè, kra ngaya a mʼmets na! A ngiɗè a gaɗa: Aʼai! Kra man a mets na, kra ngaya, kra ga a zhè a nshèffè!

²⁴ A bai a ngaɗa: Va-woykay gwèsh! A ta cko na gwèsh a bai.

²⁵ A bai a ngaɗa: Va-cizla kra man a zhè a nshèffè te va! Rèta ngiɗè va-va na ngwoz ngiɗè, rèta ngiɗè va-va na ngwoz ngiɗè.

²⁶ A ngwoz man kra nengaʼa a zhè a nshèffè, a ngaɗa na bai, a géɗ man kra a sia te va: Wa bai, bi ga, sèi ka va na kra man a zhè a nshèffè a ngwoz haha mènè, ka keɗa ɓai! Aman ngiɗè a gaɗa: A ga ka ɓai, a ngaya ka ɓai, va-cizlaʼa!

²⁷ A bai a ngaɗa: Va-va na kra man a nshèffè a ngwoz haha, kin keɗa ɓai. Nengaʼa mam kra!

²⁸ A ndohi Israel tèlèba ta tsena ara man Salomon a bèzlè kita nengaʼa, a ta slébèrdè bai. Ta rkaʼa, maya nengaʼa man a bèzlè kita a zhè, man a shkè te ri Zhiklè.